Read Te Tusi Tapu I Te Gana Tuvalu Lomiga Lua EPELU 3 Bible Online

EPELU 3 - Te Tusi Tapu I Te Gana Tuvalu Lomiga Lua bible

EPELU 3

¹Oku taina kelisiano, kola ne kalagagina foki ne te Atua! 'Kilo la ki a Iesu, ko te Apositolo mo te Faitaulaga Pule o te fakatuanaki tenei e folafola atu ne tatou.

²E fakamaoni eiloa a ia ki te Atua, tela ne filifili ne ia a ia ke fai a te galuega tenei, e pela foki eiloa mo Mose, ne fakamaoni ki tena galuega i loto i te kaiga o te Atua.

³A te tino e faite ne ia te fale, e sili atu tona 'malu i lo te fale. E pena foki a Iesu, e takua me sili eiloa tona 'malu i lo Mose.

⁴E tonu i fale katoa e faite ne se tino, ka ko te Atua ko ia tena ne faite ne ia a mea katoa.

⁵A Mose ne fakamaoni eiloa i loto i te kaiga katoa o te Atua. A ia se tavini, kae ne faipati foki e uiga ki mea ka faipatigina ne te Atua i aso e o'mai.

⁶Ka ko Keliso e fakamaoni ona ko ia ko te Tama tela e pule i te kaiga o te Atua. A tatou ko tona kaiga, manafai e mautakitaki te tou loto 'toa mo te fakatuaga ki te mea e fakamoemoe tatou ki ei.

⁷Me penei a muna a te Agaga Tapu i te Tusi: “Kafai e lagona ne koutou a te leo o te Atua i te aso nei,

⁸Sa loto make'ke e pela mo taimi ko teka, i te otou 'tekega ki te Atua, E pela mo te aso tela ne iai koutou i te koga lavaki, ne tofotofo ei ne koutou a ia.

⁹Muna a te Atua, tena te koga ne tofotofo ei au ne otou tupuga, Kae ne matea foki eiloa ne latou a mea 'lei ne fai ne au mō latou i te fa sefulu tausaga.

¹⁰Ona ko te mea nei, ne kaitaua ei au ki tino kona, Fai ake ei au penei, ‘E 'se faeloa latou i mea e mafaufau latou ki ei, E seki tauloto eiloa ne latou oku auala.’

¹¹Au ne ita, fai ei taku tautoga penei: ‘E se mafai lele eiloa latou o ulu mai ki loto o malolo mo au i toku manuia! ”’

¹²Oku taina: fakaeteete ke seai se tino i a koutou na e maua ne te loto masei mo te se talitonu, me mana teka ei keatea a ia mai te Atua ola.

¹³Kae 'tau mo koutou o fakatau fesoasoani i aso katoa, me i te muna tela i te tusi, “a te aso nei,” e faka'tau tonu eiloa ki a tatou; i te mea mana faka'segina ei koutou i te agasala mo te loto makeke.

¹⁴Me i a tatou e galue tasi katoa mo Keliso, manafai e taofi mautakitaki tatou ki te fakamaoni ki a ia tela ne iai mo tatou mai te kamataga ke oko ki te fakaotiga.

¹⁵Konei a muna a te Tusi: “Kafai e lagona ne koutou a te leo o te Atua i te aso nei, Sa loto ma'keke e pela mo taimi ko teka, I te otou 'tekega ki te Atua.”

¹⁶Ko oi ne lagona ne latou a te leo o te Atua kae 'teke ki ei? Ko tino katoa kola ne takitaki keatea ne Mose mai Aikupito.

¹⁷Ko oi foki ne ita ki ei te Atua i tausaga e fa sefulu? Ne ita ki tino ne agasala, kola ne 'mate i te koga lavaki.

¹⁸Ko oi ne fakauiga ki ei a te muna a te Atua i tena tautoga penei: “E se mafai lele latou o ulu mai ki loto o malo'lo mo au”? Ne fakauiga ki a latou kola ne 'teke ki a ia.

¹⁹Tela la, ko matea nei ne tatou, me ne seki mafai ne latou o ulu ki loto ona ko te lotou se talitonu.