Read Te Tusi Tapu I Te Gana Tuvalu Lomiga Lua EPELU 6 Bible Online

EPELU 6 - Te Tusi Tapu I Te Gana Tuvalu Lomiga Lua bible

EPELU 6

¹E 'tau mo tatou o sasale ki mua, ki te katoatoaga o akoakoga tāua a Keliso, kae tuku a akoakoga faka kelisiano kola e faigofie ne kamata ki ei tatou i taimi koi valea ei tatou. E se toe ma'nako matou o toe faipati ki akoakoga faigofie konā, e pela mo mea konei: ko te salamo, ko te fakatuanaki ki te Atua;

²ko te akoakoga e uiga mo te papatisoga[6] mo te fakaekega o lima, ko te toetu o tino mate mo te fakamasinoga se gata mai.

³Kae o'mai tou olo ki mua, me tenei te mea e 'tau mo tatou o fai, manafai e loto ki ei te Atua.

⁴Se a te auala e toe mafai ei o fakafoki mai a latou kola ko pa'ku atu ki te masei ke toe salamo? Ne 'nofo muamua eiloa i te mainaga o te Atua. Ne 'tofo foki latou ki meaalofa faka te lagi, ne maua foki ne latou te Agaga Tapu.

⁵Ne iloa 'lei foki eiloa ne latou i te muna a te Atua e 'lei, ko lagona foki te 'mana o aso konei e o'mai.

⁶Kae ne pa'ku atu latou ki te masei! Tenei la, ko oko eiloa i te faigata o toe aumai latou ke toe salamo, i te mea ko toe fakasataulo fakalua ne latou a te Tama a te Atua, kae fakamasiasi foki ne latou i mata o tino.

⁷A te Atua e fakamanuia atu ki te laukele tela e inu ne ia te vaiua e 'to sale, kae ola ei a lakau e aoga mō latou kola ne ala ei o 'toki.

⁸Kae kafai e 'tupu mai ei ne lakau makaikai mo mouku, ko se aoga, ko tu nei i te tulaga o te fakamalaia ne te Atua, kae fakamasei i te 'sunu ki te afi.

⁹E tiga eiloa te motou faipati penei e taugasoa pele, kae e iloa 'lei eiloa ne matou a koutou. E iloa ne matou me isi te otou fakamanuiaga e sili atu e maua i te otou fakaolataga.

¹⁰Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mo ia e auala i otou galuega alofa kola ne fai mo otou taina kelisiano, kae koi fai nei eiloa ne koutou.

¹¹Ia, a te motou fakamoemoega maluga ke tumau te loto naunau o koutou ke oko eiloa ki te gataga, ko te mea ke taunu a mea kola e fakamoemoe koutou ki ei.

¹²E se loto foki matou ke paie koutou, kae ke pela mo tino fakatuanaki e loto kufaki, ke maua ei a te mea ne folafolagina ne te Atua.

¹³Ne fai ne te Atua a te folafolaga ki a Apelaamo, kae ne tauto foki me fai eiloa ne ia a te mea ko oti ne folafola ne ia. Ona ko te seai se tino e sili atu i a ia, tela fakaaoga eiloa ne ia a tona igoa tonu i te faiga o tena tautoga.

¹⁴Ana muna, “Au e muna tonu atu, e fakamanuia atu au ki a koe, kae fakatokouke foki au fanau.”

¹⁵Ne kufaki eiloa Apelaamo mō te folafolaga tena, kae ne maua eiloa ne ia a te mea ne folafola atu ne te Atua ki a ia.

¹⁶Kafai se tino e fai sena tautoga, e fakaaoga ne ia se igoa o se tino tela e sili atu i a ia, ka ko te tauto e fakatoka ne ia a finauga katoa i va o tino ke 'lei.

¹⁷Ne manako a te Atua o fakamalamalama faka'lei ki a latou kola e maua ne latou a te mea ne folafolagina, me se mafai lele eiloa ne ia o toe fuli tena fuafuaga; tena te pogai ne toe fai ei tena tautoga ki tena folafolaga.

¹⁸E isi la ne mea konei e lua, kola e se mafai o 'fuli kae se mafai o loi i ei te Atua. Ko tatou kola ko maua te olaga 'lei i a ia, ko fakamalosigina o'tou loto ke puke mautakitaki o'tou lima ki te fakamoemoega tela e takato mai i o'tou mua.

¹⁹Ko iai i a tatou a te fakamoemoega tenei ko fai mo taula i o'tou loto. Se fakamoemoega e iloa tonu kae mautakitaki, e mafai ei o ulu atu ki loto i te potu tapu e tu ki loto atu o te 'pui.

²⁰ I te fai o ia mo sui o tatou, ko leva foki a Iesu ne mua i a tatou o ulu ki loto i kona mo tatou. Ko oti foki ne fai a ia mo faitaulaga pule ki te se gata mai, i te fakasologa o te tofi fakafaitaulaga o Mekisateko.[7]