Read Te Tusi Tapu I Te Gana Tuvalu Lomiga Lua EPELU 7 Bible Online

EPELU 7 - Te Tusi Tapu I Te Gana Tuvalu Lomiga Lua bible

EPELU 7

¹A Mekisateko tenei ko te tupu o Salema, ka ko te faitaulaga foki a te Atua Tafasili i te Maluga. E pela mo te fokimaiga a Apelaamo mai te taua tela ne tamate ei ne ia tupu, ne fakafetaui atu a Mekisateko kae fakamanuia atu foki ki a ia.

²Ne tuku atu ne Apelaamo ki a ia a te tasi vae sefulu o ana mea katoa. (A te uiga muamua o te igoa Mekisateko ko te “Tupu o te Amiotonu.” Ona ko ia ko te tupu o Salema, tela la, a te sua uiga foki o tena igoa, ko te “Tupu o te Filemu.”)

³E seai se tala tukufakasolo o ona mātua, io me ko se tino mai i ona tupuga; e seai foki se tala e uiga ki tena fanaumaiga io me ko tona mate. E pela eiloa a ia mo te Tama a te Atua: e fai eiloa a ia mo faitaulaga ki te se gata mai.

⁴Ko matea nei la ne koutou tona maluga! A Apelaamo te 'tou tupuga takutakua, ne tuku atu ne ia ki a Mekisateko te tasi vae sefulu o ana mea katoa ne maua i te taua.

⁵Ko fakatonu ne te Tulafono a fanau o te matakāiga o Levi kola ne faitaulaga, ke ao ne latou a te tasi vae sefulu o mea katoa mai tino Isalaelu. Ko tona uiga ko ao ne latou a te tasi vae sefulu o mea katoa mai tino tonu o te lotou fenua, kae ne fanau foki latou a Apelaamo.

⁶A Mekisateko e seki tupu mai i a Levi, ka ko te mea ne ao ne ia a te tasi vae sefulu o mea mai i a Apelaamo, kae ne fakamanuia atu foki ne ia a ia tela ne maua ne ia folafolaga a te Atua.

⁷Se mea tonu te mea nei, a ia tela e fakamanuia atu e sili atu i a ia tela e fakamanuiagina.

⁸Ki te feitu ki faitaulaga kola e oko foki ki ei te mate, e ao ne latou a te tasi vae sefulu; ka ko Mekisateko tela e ola faeloa, ne ao ne ia a te tasi vae sefulu, e pela eiloa mo muna a te Tusi.

⁹E se taumate e isi se tino ka fai ake pela, ko Levi tenei ne maua ne ia a te tasi vae sefulu o mea mai tino, ka ko ia ne 'togi atu foki te tasi vae sefulu e alatu i a Apelaamo.

¹⁰Me i a Levi koi nofo eiloa i loto i te foitino o tona tupuna ko Apelaamo, i te taimi ne fetaui ei laua mo Mekisateko.

¹¹Tenei tonu eiloa a te pogai ne tuku atu ei a te Tulafono ki tino Isalaelu ona ko te matakāiga fakafaitaulaga o Levi. Moi fai ne 'lei katoatoa a te galuega a faitaulaga i te matakāiga o Levi, penei la e se toe manakogina se isi faitaulaga fakaatea ke toetupu mai i te fakasologa o Mekisateko,[8] kae se i te fakasologa o Alona.

¹²Me kafai ko sui te tofi fakafaitaulaga, ko 'tau foki o isi se suiga o te tulafono.

¹³A mea katoa konei e fai'pati ki ei tatou, e fakauiga katoa ki a Iesu. A Iesu ne tupu mai i te matakāiga fakaatea, kae e seai eiloa se tino o latou kai fai mo faitaulaga.

¹⁴Se mea ko iloa tonu eiloa me i a ia ne fanau mai i se tino o te matakāiga o Iuta; ka ko Mose ne seki takutaku eiloa ne ia a te kaiga nei i tena faipatiga ne fai e uiga mō faitaulaga.

¹⁵Ko gasolo mai eiloa o manino a te mea nei: ko toe vau te sua faitaulaga, e pela eiloa mo Mekisateko.

¹⁶E seki fai a ia mo faitaulaga i tulafono mo fakatonuga faka te foitino, kae ne fai mo faitaulaga e alatu i te mana o te ola tela e seai sona gatamaiga.

¹⁷E pela mo muna a te Tusi, “E fai koe mo faitaulaga ki te se gata mai, i te fakasologa o te tofi fakafaitaulaga o Mekisateko.”[9]

¹⁸A te tulafono mua ko tuku ake mua pela, i te mea e vaivai kae se aoga.

¹⁹Me i te Tulafono a Mose e se mafai ne ia o fai se mea ke 'ma katoatoa. Kae nei ko oti ne aumai ki loto a te fakamoemoega e sili atu, tela ko fai mo auala e fakapilipili atu ei tatou ki te Atua.

²⁰E se gata fua i kona, e isi foki se tautoga a te Atua. E seai eiloa se tautoga pena kai fai i te fakasopoga o nisi tino ki te tofi fakafaitaulaga.

²¹Ka ko Iesu ne fakasopo ki te tofi fakafaitaulaga mo te tautoga ne fai e uiga mō ia, e pela eiloa mo muna a te Atua ne fai ki ei, “Ko oti ne fai a te tautoga a te Aliki, Kae se toe fuli eiloa tona mafaufau: ‘E fai koe mo faitaulaga ki te se gata mai.’ ”

²²Tela la, ko fai te kesekesega tenei mo auala e fai ei a Iesu mo fakamaoniga o te feagaiga e sili atu i te 'lei.

²³E isi foki te sua kesekesega: e tokouke fua a isi faitaulaga, ona ko te mea e oko ki a latou te mate, kae se toe mafai ne latou o toe faka'soko te lotou galuega.

²⁴Ka ko Iesu e tumau eiloa tona ola ki te se gata mai, kae se mafai foki o tuku atu ki so se tino tena galuega fakafaitaulaga.

²⁵Nei, ko mafai ne ia i taimi katoa, o fakaola a latou kola e olo atu ki te Atua e alatu i a ia, i te mea e tumau tona ola ki te se gata mai o fautua ki te Atua mō latou.

²⁶Tela la, a Iesu ko te tou Faitaulaga Pule, ko ia tena e feagai mo o'tou manako! A ia e tapu; e seai foki sona 'se io me se agasala; ko oti foki a ia ne fakamavae keatea mai tino agasala, kae avake ke silia atu i lagi katoa.

²⁷E se aoga i a ia o ofo atu taulaga i aso katoa, e pela mo nisi faitaulaga e muamua o ofo atu taulaga mo olotou agasala eiloa kae fakamuli mō agasala a tino. E fakatasi eiloa te ofoga ne ia a te taulaga mō tino katoa, i te tuku atu o tona foitino mō tatou katoa.

²⁸A te Tulafono a Mose e filifili ne ia a tino kola e se 'lei katoatoa, ke fai mo faitaulaga pule; ka ko muna o te tautoga a te Atua, kola ne tuku mai fakamuli ifo i lo te Tulafono, ko tofia ei a te Tama tela e 'lei katoatoa ki te se gata mai.