Read Te Tusi Tapu I Te Gana Tuvalu Lomiga Lua EPELU 9 Bible Online

EPELU 9 - Te Tusi Tapu I Te Gana Tuvalu Lomiga Lua bible

EPELU 9

¹A te feagaiga muamua e isi ona tulafono mō tapuakiga, e isi foki se koga ne faite ne tino mō fai tapuakiga.

²Ne fakatu te fale tapuaki ave sale i malaga, mo te potu ki tua e fakaigoa ki te Potu Tapu. I loto i kona e iai te moli, te taipola, mo te falaoa ne ofo atu ma te Atua.

³Mai tua o te lua o 'pui, e tu i ei te Potu e Sili i te Tapu.

⁴I loto i te potu tena e tu i ei a te fata faitaulaga e faite ki aulo, e fakaaoga mō fai a taulaga 'sunu; e iai foki i kona a te pusa o te feagaiga, e ufi katoa ki aulo. A mea i loto i te pusa, ko te tiā aulo mo te manai e tuku i loto, ko te tokotoko o Alona mo ona lau ko kamata o 'tupu ake, mo ma papa ei e lua kola e tusi i ei muna o te feagaiga.

⁵Mai luga o te pusa tena e 'tu i ei a kelupi, kola e fakaasi mai ne laua i te Atua e iai i kona, mo o la kapakau e fakapulou ne laua a te koga tela e fakamagalo ei agasala (Nofoga o te Alofa). Kae se tenei la te taimi e fakamatala likiliki ei a mea katoa.

⁶Kafai ko oti ne fakatoka a mea konei, ko fai ei a taulaga i aso takitasi ne faitaulaga i te Potu Tapu.

⁷Ka ko te Faitaulaga Pule fua e ulu atu ki loto i te Potu e Sili i te Tapu, kae fakatasi i te tausaga. E ave ne ia a toto o ofo atu ki te Atua, ke magalo ana agasala pela foki mo agasala a tino.

⁸E akoako fakalei mai ne te Agaga Tapu mai luga i fakatonuga konei, i te auala ki te Potu e Sili i te Tapu e seki matala eiloa, i te mea koi tu eiloa te Potu Tapu.

⁹A te fakatusa tenei, e fakauiga eiloa ki aso nei. Ko tona uiga a meaalofa mo taulaga o manu e ofo atu ki te Atua, e se mafai eiloa ne latou o fai a te loto o te tino tapuaki ke katoatoa.

¹⁰E fakasino fua a mea kona ki meakai, meainu, mo nisi sauniga ake mō te faka'maga. A mea nei ne tulafono katoa faka te foitino, kae oti te lotou aoga manafai ko toe fakafou ne te Atua a mea katoa.

¹¹Ka ko Keliso ko leva ne vau e pela mo se faitaulaga pule o mea 'lei ko leva ne i konei.[10] A te fale tapuaki ave sale i malaga e galue ei a ia, e lasi atu kae sili foki i te 'lei katoatoa; ne seki faite foki ne tino, ko tona uiga e se se mea o mea ne faite i te lalolagi.

¹²Ne ulu fakatasi a Iesu ki loto i te Potu e Sili i te Tapu e i loto i te fale tapuaki ave sale i malaga, ne seki ave ne ia a toto o kouti io me ko tamā pulumakau o ofo atu ke fai mo taulaga, kae ne ave eiloa ne ia ko tona toto, maua ei foki i kona mai i a ia a te fakaolataga se gata mai mō tatou katoa.

¹³A te toto o kouti mo pulumakau tagata mo lefu o tamā pulumakau ne 'sunu, e fakamaligiligi i luga i tino kola e se 'ma, ke faka'ma ei latou mai olotou olaga se 'ma.

¹⁴Ona ko te tonu o te mea nei, e sili atu eiloa a te lasi o te galuega ne fai ne te toto o Keliso! Ne tuku atu a ia ke fai mo taulaga 'ma katoatoa ki te Atua, e alatu i te Agaga Tapu o te se gata mai. Ko tona toto foki e faka'ma ne ia o'tou mafaufau ke 'lei mai galuega masei, ko te mea ke tavini atu tatou ki te Atua ola.

¹⁵Ona ko te feitu tenei, a Keliso ko ia tena ko fakatoka ne ia te feagaiga fou, ko te mea ko latou katoa kola ne kalagagina ne te Atua, e maua ne latou a te fakamanuiaga se gata mai tela ne folafola ne te Atua. E mafai o fai a te mea nei, ona ko te mate o Iesu tela e fakasaoloto ne ia a tino mai olotou mea 'se ne fai, ka koi 'nofo latou mai lalo o te feagaiga muamua.

¹⁶Kafai e fai se togi, e fatoa fakaaoga a te togi manafai ko mate a te tino e a ia te togi.

¹⁷Me e seai se aoga o te togi manafai koi ola a te tino e a ia te togi ne fai, fatoa aoga tena togi manafai ko mate a ia.

¹⁸Tena te pogai ne fakaaoga te toto i te feagaiga mua, me i te toto ko tona uiga ko te mate.

¹⁹Ne muamua eiloa a Mose o taku atu ki tino katoa a fakatonuga kola e fakamau i te Tulafono. Oti, puke ei ne ia a toto o kouti mo tamā pulumakau mo vai, te fulufulu mamoe kula, mo te isopo, kae fakamaligiligi ne ia i luga i te tusi o te Tulafono mo tino katoa,

²⁰kae fai atu penei: “Tenei te toto e fakamautakitaki ei a te feagaiga tela ne fakatonu atu ne te Atua ke fakalogo koutou ki ei.”

²¹E pena foki a Mose, ne fakamaligiligi ne ia te toto i loto i te fale tapuaki ave sale i malaga, mo mea katoa kola e fakaaoga mō te tapuakiga.

²²E tonu, e tusa mo te Tulafono, e faka'magina a mea katoa i te toto; tela la, e seai se fakamagaloga o agasala, manafai e se fakamaligi te toto.

²³A mea konei, ko fakatusa o mea tonu i te lagi, e faka'magina i te auala tenei. Ka ko mea faka te lagi konei, e manakogina a taulaga e sili atu i te 'lei.

²⁴A Keliso ne seki fano ki loto i se potu tapu ne faite ne tino, tela ko te fakatusa fua o te mea tonu. A ia ne fano ki te lagi, tela ko fai nei a ia mo sui o tatou i mua o te Atua.

²⁵A te Faitaulaga Pule faka-Iutaia, e ulu ki te Potu Tapu mo te toto o te manu i tausaga takitasi. Ka ko Keliso, ne seki ulu sale ki loto o ofo atu a ia mō fai te taulaga;

²⁶tela la, ne 'tau o uke a taimi ne puapuagatia ei a ia, talu mai te faitega o te lalolagi. Kae nei, ko oti ne fakaasi mai fakatasi a ia kae mō taimi katoa, manafai ko pili mai aso o te gataga o te lalolagi, aso kola e ave ei ne ia keatea agasala a tino i te ofo atu o ia ke fai mo taulaga.

²⁷A tino katoa e 'mate takifakatasi, fakamuli ifo, ko fakamasino ei ne te Atua.

²⁸E pena foki a Keliso e fakatasi tona tukuatuga ke fai mo taulaga, ke fakamagalo ei agasala a tino e tokouke. E toe vau i te fakalua, e se o fakamasino agasala, kae o fakaola a latou kola e fakatalitali ki a ia.