Read Te Tusi Tapu I Te Gana Tuvalu Lomiga Lua IAKOPO 1 Bible Online

IAKOPO 1 - Te Tusi Tapu I Te Gana Tuvalu Lomiga Lua bible

IAKOPO 1

¹Ko au ko Iakopo, te tavini a te Atua mo te Aliki ko Iesu Keliso: Talofa! Ko tusi atu au ki Kelisiano katoa kola e salalau i te lalolagi katoa.

²Oku taina, e 'tau mo koutou o fia'fia malosi, manafai e fetaui koutou mo tofotofoga kesekese,

³me e iloa ne koutou, ko te tofotofogina o te otou fakatuanaki, e tupu mai ei te lotomau.

⁴Ke 'tau foki eiloa te otou lotomau o katoatoa tena galuega i loto i a koutou, ko te mea ke 'lei kae katoatoa foki koutou, ke seai foki se mea e tasi e ma'tiva ei koutou.

⁵Kafai se tino o koutou e se maua ne ia te poto, e 'tau mo ia o 'talo ki te Atua, me ko ia tena ka tuku mai ne ia ki a ia; me i te Atua e tuku mai fua ne ia te poto ki tino katoa i te agaga alofa mo te kaimalie.

⁶E 'tau mo koutou o 'talo mo te fakatuanaki, kae sa fakalotoloto lua; me ko so se tino e fakalotoloto lua, e pau eiloa a ia mo se peau o te moana, e ave sale kae fepeipeiaki ne te matagi.

⁷Ko te vaega tino pena, ke se 'tau eiloa mo ia o mafaufau pela me ka maua ne ia se mea e tasi mai i te Aliki,

⁸i te mea i a ia e fakalotoloto lua, kae se toka tona mafaufau i ana faifaiga katoa.

⁹A te taina mativa e 'tau mo ia o fakamatamata manafai e fakamasiki ake a ia ne te Atua,

¹⁰ke fakamatamata foki te tino maumea manafai e tuku ifo a ia ki lalo. Me i te tino maumea e galo atu e pela mo pula o lakau.

¹¹Me kafai e sae ake te la mo tona 'vela malosi, ko mage'mage ei a lakau; kae tatela olotou pula ki lalo, palele atu ei foki mo te lotou gali. E pena foki te tino maumea, ka galo atu foki pena a ia ka koi saga o fakasoasoa ana mea e fai.

¹²Amutia a te tino tela e kufaki i taimi o tofotofoga, me kafai e manumalo a ia i te tofotofoga, ka maua ne ia te foualiki o te ola tela ne poloaki mai ei te Atua ki tino kola e a'lofa ki a ia.

¹³Kafai e fakaosoosogina se tino, ke sa manatu ake pela, “Au ko fakaosoosogina ne te Atua.” I te Atua e se mafai o fakaosoosogina ne te masei, kae se fakaosooso foki ne ia tino ki te masei.

¹⁴Ka ko te tino e fakaosoosogina manafai ko to keatea a ia, kae faka'segina ne ona manakoga ma'sei.

¹⁵Tela la, kafai ko faitama te manako masei, ko fanau mai ei te agasala; kae kafai ko matua te agasala, ko fanau mai ei te mate.

¹⁶Oku taina fagasele mo a ma faka'segina koutou.

¹⁷A mea 'lei katoa kola e maua fua mo meaalofa katoatoa takitasi, e mai te Atua i te lagi, tela ko te Tamana o te mainaga tela e tumau kae seai sona mafuliga foliki.

¹⁸Mai i tona loto katoatoa, ne fakafua ei ne ia tatou i te munatonu, ko te mea ke fai tatou mo uluaki o ana mea ne faite.

¹⁹Oku taina fagasele, masaua a te mea nei! A tino katoa e 'tau ke vave o fakalogo, kae ke fakatuatuai o fai'pati, ke se vave foki o kaitaua.

²⁰Me i te kaitaua o te tino, e se fesoasoani ki te faiga o te amiotonu a te Atua.

²¹Tela la, tiaki amioga lailai mo amioga masei katoa. Ke tuku atu koutou ki te Atua kae talia foki ne koutou a te muna tela ne toki ne ia i otou loto, ko te muna tena e mafai ne ia o fakaola koutou.

²²Ke fai koutou mo tino kola e tautali i te muna a te Atua, kae se na ko te fakalogo fua ki ei, i te mea mana faka'segina ei koutou ne koutou eiloa.

²³Me ko te tino tela e fakalogologo fua ki te muna kae se fai ne ia, e pau a ia mo te tino tela e onoono ki te kilo kae matea ne ia ona foliga tonu.

²⁴E onoono fua ki ona foliga, kae kafai e fano keatea mai i ei, puli fakavave ei i a ia me pefea ona foliga.

²⁵Ka ko te tino e tausi faka'lei ki te tulafono e fakakatoatoa ne ia te 'lei, tela ko te tulafono o te saolotoga, kae ola foki i ei a ia, kae se na ko te fakalogologo fua ki ei ko puli ei i a ia, kae e tausi fakamaoni eiloa ki ei, i te fai ne ia a mea e fakatonu mai. A te tino tena ka fakamanuia ne te Atua i ana mea e fai.

²⁶E isi se tino e mafaufau i a ia se tino lotu? Kafai e se mafai ne ia o taofiofi tona gutu, e seai se aoga o tena toaga ki lotu, ka ko faka'segina foki a ia ne ia eiloa.

²⁷Tenei te mea e taku ko te lotu mo te 'lei i mua o te Atua te Tamana: ko te tausi koutou ki tamaliki ko 'mate olotou matua, mo fafine ko 'mate olotou avaga i olotou puapuaga, ke mo a foki ma pisia se tino i amioga se 'lei faka te lalolagi.