Read Te Tusi Tapu I Te Gana Tuvalu Lomiga Lua IAKOPO 2 Bible Online

IAKOPO 2 - Te Tusi Tapu I Te Gana Tuvalu Lomiga Lua bible

IAKOPO 2

¹Oku taina, kafai e taofi koutou ki te fakatuanaki ki te tou Aliki 'malu ko Iesu Keliso, e se 'tau la mo koutou o fakailoga tino.

²Kafai e vau se tino e pei ki gatu 'lei mo mama aulo i ona lima ki loto i otou tapuakiga, kae ulu mai ei foki se tino mativa mo ona gatu masei,

³e tali fakaaloalo atu koutou ki te tino tela e pei ki gatu 'lei, kae fai atu ki a ia, “Vau o sagasaga i te koga gali tenei,” kae ka fai atu koutou ki te tino mativa penei, “Tu i kona, io me vau o sagasaga i oku tua.”

⁴E a, e se fakailoga tino koutou i te mea tena? Ko fakavae foki otou fakamasinoga i luga i manatu se tonu.

⁵Fakalogo mai e oku taina fagasele! Ne filifili ne te Atua a tino mativa o te lalolagi nei ke maumea i te fakatuanaki, kae ke maua foki ne latou a te Malo tela ne folafola mai ne ia ki tino e a'lofa ki a ia.

⁶Ka ko koutou ko se fakaaloalo ki tino ma'tiva! Ko oi e fakasaua ki a koutou, kae toso foki ne latou koutou ki mua o famasino? Ko tino maumea!

⁷Ko latou kona e fakamasei ne latou a te igoa 'lei tela ko oti ne fakaigoa ei koutou.

⁸Ko oko eiloa i te 'lei manafai e tausi fakalei ne koutou a Tulafono a te Malo o te Atua, tela e maua mai loto i te Tusi, “Alofa ki tou tuakoi e pela eiloa mo koe ki a koe.”

⁹Kae kafai e fakailoga tino koutou, ko agasala koutou, e fakasala foki koutou ne te Tulafono, i a koutou ne tino ofa tulafono.

¹⁰Kafai e tausi ne se tino a fakatonuga katoa o te Tulafono, kae tapasala a ia i se tama mea e tasi, ko agasala a ia i te ofaga o te Tulafono katoa.

¹¹Kafai e fai mai se tino, “Sa mulilua,” kae toe fai mai foki, “Sa tatino,” kae kafai la e se mulilua koe kae tatino, ko tona uiga a koe se tino ofa tulafono eiloa.

¹²Ke faipati koutou kae fai foki ne koutou a mea e faipatigina ne koutou, e pela eiloa mo tino kola e fakamasinogina ne te tulafono o te saolotoga.

¹³Me i te Atua e se fakaasi tona alofa ki te tino tela e seai sona alofa; ka ko te mea e manumalo eiloa a te alofa i te fakamasinoga.

¹⁴Oku taina, se a te mea 'lei e maua mai i te tino e muna mai i a ia e fakatuanaki, kae seai ne ana galuega? E mafai ne tena fakatuanaki o fakaola a ia?

¹⁵Kafai e isi se taina kelisiano me se tuagane kelisiano e fia maua ne lavalava, kae se lava foki ne meakai e kai ei,

¹⁶se a la te aoga o tau pati e fai atu ki a latou, “Ke fakamanuia atu te Atua ki a koutou! Ke tuku atu foki ne ia ne gatu e pei ei koutou, ka ke 'kai ma'kona foki koutou,” kae tela la e se tuku atu ne koe a mea e manako ki ei.

¹⁷E pena foki te fakatuanaki, e mate manafai e seai ne galuega alofa e fai ne tatou.

¹⁸Kafai e fai ake pela se tino, “E maua ne koe te fakatuanaki, kae maua ne au a galuega.” A taku tali ki ei, “Fakaasi mai me mafai pefea o maua ne koe te fakatuanaki, kae seai ne au galuega e fai; kae nei ko fakaasi atu ne au ki a koe a toku fakatuanaki e alatu i aku galuega.”

¹⁹E talitonu koutou me tokotasi eiloa te Atua? Ko oko eiloa i te 'lei! E talitonu foki a temoni ki ei, kae pole'pole mo te ma'taku.

²⁰Tino va'lea! E se iloa ne koe i te fakatuanaki e aunoa mo galuega, e seai lele eiloa sona aoga?[1]

²¹E a, e seki takuamiotonugina Apelaamo te tou tamana i galuega, i tena tukuatuga tena tama ko Isaako ki luga o te fata faitaulaga, ke fai mo ana taulaga?

²²E a, e se iloa ne koutou? A tona fakatuanaki mo ana galuega e olo tasi eiloa; ne 'lei katoatoa tona fakatuanaki e alatu i ana galuega.

²³Ko fakamaoni ei a muna a te tusi ne fai mai, “Ne fakatuanaki Apelaamo ki te Atua, tena te pogai ne takua ei a ia se tino amiotonu, kae se taugasoa foki o te Atua.”

²⁴Ko iloa nei ne koutou me takuamiotonugina te tino i ana galuega, kae se i tona fakatuanaki fua.

²⁵E pena foki eiloa te takuamiotonugina o Lahapa. A ia ko te fafine tali tagata ne takuamiotonugina i ana galuega, i te tali'leiga ne ia a avefekau a tino Iutaia, kae fesoasoani atu ki a latou ke olo i te sua auala.

²⁶A te foitino e mate manafai e seai se agaga, e pena foki a te fakatuanaki e mate manafai e seai ne galuega.