Read Te Tusi Tapu I Te Gana Tuvalu Lomiga Lua IAKOPO 5 Bible Online

IAKOPO 5 - Te Tusi Tapu I Te Gana Tuvalu Lomiga Lua bible

IAKOPO 5

¹Tino maumea, faka'logo mai ki a au! 'Tagi kae 'tagi fanoanoa ki mea faigata ka oko mai ki luga i a koutou!

²Ko pala otou koloa, ko katia foki ne mogamoga otou gatu.

³Ko to'toto otou aulo mo siliva, ka ko te lotou to'toto tena e fai mo molimau ki a koutou, me ka kai ne ia otou foitino e pela eiloa mo se afi e 'sunu ne ia. Ko oti ne fakaputuputu ne koutou otou koloa mō aso fakapalele.

⁴E seki 'togi ne koutou a tino kola ne galue i otou fatoaga. Fakalogo ki olotou 'tagi se malie, a te tagi o tino kola ne fakaputuputu a fua otou fatoaga ko lagona ne te Atua, tela ko te Aliki e o ia te malosi katoatoa!

⁵A te otou olaga i te lalolagi nei se olaga maumea mo te fiafia; ko fakaputaputa foki ne koutou otou foitino mō te aso o te tamatega.

⁶Ko oti ne fakaseaoga kae tamate ne koutou a te tino amiotonu, e se 'teke foki ne ia a koutou.[2]

⁷Tela la, ke kufaki koutou e oku taina, ke oko ki te toe foki mai o te Aliki. Kiloke, a te tino toki lakau e kufaki a ia, kae fakatalitali ki tona manafa ke fua mai ne fuataga 'lei. E kufaki eiloa a ia pena ke oko ki aso e ma'tua ei a taukai.

⁸E 'tau eiloa mo koutou o kufaki! Ke fakama'losi otou loto, me ko pili mai a te aso o te toe foki mai o te Aliki.

⁹Taina, ke sa muimui te sua tino ki te sua tino, ke mo a e fakamasino koutou ne te Atua; i te Famasino tenei fua e tu mai i te mataloa, ko toka o vau ki loto!

¹⁰Taina, ke masaua ne koutou a pelofeta kola ne faipati i te igoa o te Aliki. Ke fai latou mo fakaakoakoga o te loto kufaki i puapuaga.

¹¹E taku ne tatou latou me e fiafia, i te mea e loto kufaki latou. Ko oti ne lagona ne koutou te kufaki o Iopu, ka ko iloa foki ne koutou i te Aliki ne fesoasoani atu ki a ia i te fakaotiga. Me i te Aliki e fonu i te alofa 'nau mo te alofa fesoasoani.

¹²Kae sili i mea katoa e oku taina, kafai e tauto koutou o fai se mea, sa tauto ki te igoa o te lagi, io me ko te lalolagi io me ko se isi mea ake foki. E 'tau eiloa o tali atu koutou “Ao”, manafai e tonu me fakamaoni koe ki ei o fai, io me “Ikai”, manafai e se fakamaoni koe ki ei o fai, ko te mea ke mo a e maua koutou i te fakamasinoga a te Atua.

¹³Kafai e isi se tino o koutou ko puapuagatia, e 'tau mo ia o 'talo. Kafai e isi se tino e fiafia, e 'tau mo ia o 'viki atu.

¹⁴Kafai e isi se tino o koutou e masaki, e 'tau mo ia o fai atu ki toeaina o te Ekalesia ke 'talo mō ia, kae 'mili te sinu ki luga i a ia i te igoa o te Aliki.

¹⁵A te 'talo tenei, se 'talo e fai i te fakatuanaki, kae ka fakaola ne ia te tino masaki: ka toe fakafoki atu ne te Aliki te malosi ki a ia, ka ko ana agasala ne fai ka fakamagalogina.

¹⁶Tela la, ke fakatau fakaasi otou agasala, kae 'talo foki te sua tino mō te sua tino, ko te mea ke malosi koutou mai otou masaki. A te 'talo a te tino amiotonu e lasi tona mana.

¹⁷A Elia se tino e penei eiloa mo tatou. Kae ne 'talo mo te loto fakatauanau ke seai ne vaiua e 'to, tela e tusa mo te tolu mo te afā tausaga e seki 'to ne vaiua i te fenua tena.

¹⁸Ne toe 'talo a ia fakamuli ke 'to vaiua, tela 'to ifo ei a vaiua mai te lagi, fua mai ei ne te laukele ona fua.

¹⁹Oku taina, kafai se tino o koutou e fano keatea mai te munatonu, kae toe fakafoki mai a ia ne se tino ki ei,

²⁰ke masaua la a te mea nei: so se tino e 'fuli ne ia a te tino agasala mai ona ala 'se, ka fakaola ne ia te agaga o te tino agasala[3] mai te mate, ka aumai ei te fakamagaloga o agasala e uke.