Read Te Tusi Tapu I Te Gana Tuvalu Lomiga Lua 1 PETELU 3 Bible Online

1 PETELU 3 - Te Tusi Tapu I Te Gana Tuvalu Lomiga Lua bible

1 PETELU 3

¹E pena foki koutou e fafine, e 'tau mo koutou o faka'logo ki otou avaga, ko te mea kafai e isi ne tagata mai i a latou e se talitonu ki te muna a te Atua, e mafai o tosina mai latou ke talitonu ona ko otou amioga. E se manakogina foki te faipati o koutou ki ei,

²me e matea eiloa ne latou te 'ma mo te tonu otou amioga.

³E se 'tau mo koutou o fakaaoga mea faka te foitino e fakagaligali ei koutou, e pela mo te teuteuga otou ulu, io me ko fatu taua e fakaaoga ne koutou, io me ko gatu e pei ei koutou.

⁴E 'tau mo te otou taulekaleka o foliga ki te tino se lavea ko te loto, ko te taulekaleka tumau tela ko te loto malalo mo te agaga filemu, kola ne mea taua i mua o te Atua.

⁵I te faiga tenei, ko fafine 'lotu o aso ko teka atu, kola ne fakamoemoe ki te Atua, e teu fakagaligali foki latou; kae ne faka'logo eiloa ki olotou avaga.

⁶E pena foki a Sala, ne fakalogo ki a Apelaamo, kae ne taku ne ia a ia ko “Toku Pule.” A koutou ko ana tama fafine manafai e fai ne koutou te 'lei, kae sa mataku foki ki so se mea.

⁷A koutou e tagata, i te otou 'nofo tasi mo otou avaga, e 'tau o iloa ne koutou me vaivai latou; tela la, e 'tau mo koe o atafai ki ei mo te ava, me maua fakatasi ne koutou mo latou a te meaalofa a te Atua ko te ola. Ke fai ne koutou a te mea nei, ko te mea ke seai se mea e fakalavelave atu ki otou talosaga.

⁸Ke fakapalele atu aku muna: e 'tau o tasi katoa otou mafaufauga pela foki mo otou lagona; ke fakatau alofa koutou e pela mo ne tautaina, ke fakatau atafai kae loto malalo foki koutou.

⁹Sa taui te masei ki te masei, io me taui atu te muna fetu ki te muna fetu; e 'tau mo koutou o taui atu ki te fakaamutia atu, me i te fakaamutia atu, se mea ne folafola atu ne te Atua me e tuku atu ne ia ki a koutou manafai e kalagagina ne ia koutou.

¹⁰E pela mo muna a te Tusi: “So se tino e manako o fakafiafia tena olaga, ko te mea ke fiafia i aso katoa, E 'tau mo ia o se toe faipati masei, io me faipati loi.

¹¹E 'tau mo ia o fuli keatea mai te masei, kae fai te mea 'lei. E 'tau mo ia o salasala te filemu kae taofi mau ki ei.

¹²Me i te Aliki e sagatonu eiloa ona mata ki tino amiotonu, Kae fakalogo faeloa ki olotou 'talo; Kae saga fakaatea mai tino kola e fai ne latou te masei.”

¹³Ko oi e fakatiga ne ia koutou manafai ko ma'nako eiloa koutou o fai te mea 'lei?

¹⁴Ko oko eiloa te otou fiafia manafai e puapuagatia eiloa koutou ona ko te fai o te mea 'lei! Sa mataku ki tino, kae sa 'pole foki.

¹⁵Kae ava ki a Keliso i otou loto, kae ke fai foki ne koutou a ia ke fai mo otou Aliki. Ke toka koutou i so se taimi o fakamatala atu ki so se tino e fesili mai ki a koutou, ke fakamatala atu a te fakamoemoega tena e i a koutou.

¹⁶Kae ke fai ne koutou i te loto malalo mo te ava. Tausi ke 'ma otou mafaufau, me kafai e muna maseigina koutou, ko tino kola ne faifai muna ki otou amioga, ka tau'tali i a Keliso ona ko koutou. E toe tae'ma eiloa latou e tusa mo olotou pati ne fai.

¹⁷Me e sili te puapuagatia mō te mea 'lei, manafai ko te loto eiloa tena o te Atua, i lo te fai o te mea masei.

¹⁸Me i a Keliso ne mate[1] mo koutou; ne mate fakatasi mō agasala katoa a tino, ko te tagata amiotonu mo tino masei, ko te mea ke takitaki ei koutou ki te Atua. Ne mate a ia faka te foitino, kae ne toe ola a ia faka te Agaga,

¹⁹kae i tona toe ola mai faka te Agaga, ne fano a ia o talai ki agaga ko fakapagotagina.

²⁰Konei agaga o tino kola ne se faka'logo ki te Atua, i te taimi ne fakatalitali ei a ia mo te kufaki i aso ne faite ei ne Noa te vaka. A mu tino fua kola ne i te vaka, e tokovalu fua latou ne 'sao katoa mai te vai.

²¹A te vai tenei se fakatusa e fakauiga ki te papatisoga tela ko fakaola ne ia koutou, e se i te faka'ma ne ia a lailai mai i otou foitino, kae i te folafolaga ne fai ki te Atua mai te mafaufau 'lei. A te papatisoga e fakaola ne ia koutou e alatu i te toetu o Iesu Keliso,

²²tela ko fano ki te lagi, kae e nofo nei i te feitu taua tela ko te feitu fakaatamai o te Atua, o pule i agelu katoa pela foki mo mea katoa i te lagi.