Read Te Tusi Tapu I Te Gana Tuvalu Lomiga Lua 2 PETELU 1 Bible Online

2 PETELU 1 - Te Tusi Tapu I Te Gana Tuvalu Lomiga Lua bible

2 PETELU 1

¹Mai i a Simona Petelu, te tavini mo te apositolo a Iesu Keliso — Ki a latou kola ko oti ne i loto i te amiotonu a te tou Atua mo te Fakaola Iesu Keliso, kae kooti ne maua ne latou te fakatuanaki mo tena taua e pela mo tatou:

²Ke i a koutou a te alofa tauanoa mo te filemu i tena katoatoa, e alatu i te otou poto e uiga ki te Atua, pela foki mo Iesu Keliso te tou Aliki.

³Ko oti ne tuku mai ne tona mana fakaatua a mea katoa e ma'nako tatou ki ei mo te olaga fakaatua, e alatu i te tou poto e uiga ki a ia tela ne ana kalagagina tatou, ke kau fakatasi tatou i tona[1] 'malu mo tona 'lei.

⁴Ona ko te feitu tenei, ko tuku mai ei ne ia a folafolaga taua mo te sili, ko te mea kafai e maua ne koutou a mea ne folafola atu, ko mafai ei ne koutou o 'sao mai te malosi masei tenei e ola i te lalolagi, kae o'mai o 'kau fakatasi ki ona uiga fakaatua.

⁵Ona ko te feitu eiloa tenei, fai te mea e mafai ne koutou o fakaopoopo te 'lei ki te otou fakatuanaki; fakaopoopo ki te otou 'lei a te poto;

⁶ki te otou poto fakaopoopo ki ei te loto pulea; ki te otou loto pulea, fakaopoopo ki ei te kufaki; ki te otou kufaki fakaopoopo atu ki ei te amio atua;

⁷ki te otou amio atua fakaopoopo atu ki ei te alofa fakataina; ki te otou alofa fakataina fakaopoopo atu ki ei te alofa.

⁸Konei a mea e manakogina ne koutou, kae kafai e uke a mea penei i a koutou, e fai ne latou koutou ke fai mea mafai, kae fakatupu malosi foki ei a te poto i a koutou e uiga ki te tou Aliki ko Iesu Keliso.

⁹Ko te tino e se maua ne ia a mea kona, ko te tino e se matea 'mao ne ia a mea, ka ko puli foki i a ia me i ana agasala i aso ko teka ko faka'magina.

¹⁰Tela la e oku taina, taumafai malosi o fai a te kalaga a te Atua mo tena filifiliga ki a koutou ke fai mo lagona mautakitaki; me kafai e fai pena ne koutou e se toe mafai eiloa o toe pa'ku keatea koutou.[2]

¹¹I te feitu tenei, e tuku atu ki a koutou a te saolotoga tonu o ulu atu ki te Malo se gata mai o te tou Aliki mo te tou Fakaola ko Iesu Keliso.

¹²Tenei te pogai e fakamasaua atu ne au a mea konei, e tiga eiloa me ko iloa ne koutou kae mautakitaki i ei, kae 'tau eiloa o fakamasaua atu.

¹³I toku manatu se mea 'tau mo au o fakaola otou mafaufau i mea konei i aso katoa koi ola ei au.

¹⁴Me e iloa ne au me e tuku keatea ne au te foitino mate tenei, me ne fai tonu mai eiloa pena ki a au a te tou Aliki ko Iesu Keliso.

¹⁵Tela la, ka fai eiloa ne au a te mea e mafai ne au o salasala se auala e masaua ei ne koutou a mea konei i taimi katoa, manafai ko mate au.

¹⁶Ne seki fakaaoga ne matou a tala 'kai kola ne fai ne tino, i te takuatuga ke iloa ne koutou a te foki mai o te tou Aliki ko Iesu Keliso mo te 'malu. Ne 'kilo tonu eiloa omotou mata ki tona sili!

¹⁷Ne iai foki matou i kona i te taimi ne tuku atu ei ne te Atua te Tamana ki a ia a te vikiga mo te 'malu, i te okomaiga o te leo ki a ia mai i te 'Malu Tafa Sili e penei: “Tenei eiloa taku Tina Tama Fagasele, tela e fiafia au ki ei!”

¹⁸Ne lagona ne matou a te leo tenei ne vau mai i te lagi, i te taimi ne 'nofo tasi ei matou mo ia i te mauga tapu.

¹⁹Tela la, e sili atu te talitonu omotou loto ki te talaiga tela ne folafola ne pelofeta. Ka manuia otou galuega manafai e faka'logo ki ei, me e pela eiloa mo se moli e maina atu ki te koga pouli, ke oko ki te mafaga o te ata, mo te mainaga o te fetu ao e maina i otou loto.

²⁰Ka ko te mea sili i mea katoa, ke masaua a te mea nei: E seai se tino e mafai ne ia o fakamatala a muna fakapelofeta i te Tusi.

²¹Me e seai eiloa se talaiga fakapelofeta kai vau mai i te loto eiloa o te tino, ka ko te Agaga Tapu e fakatasi atu ki tino kola e folafola atu ne latou a te talaiga tela ne aumai mai i te Atua.