Read Te Tusi Tapu I Te Gana Tuvalu Lomiga Lua 2 PETELU 3 Bible Online

2 PETELU 3 - Te Tusi Tapu I Te Gana Tuvalu Lomiga Lua bible

2 PETELU 3

¹Oku taugasoa pele, tenei te lua o aku tusi ki a koutou. I tusi konei e lua, ne taumafai au o 'fagu koutou ki ne mafaufauga fou, i te fakamanatu atu ne au a mea konei.

²Au e manako ke masaua ne koutou a muna ne faipatigina ne pelofeta 'malu i aso ko teka, mo te fakatonuga mai te Aliki Fakaola tela ne tuku atu ki a koutou ne apositolo.

³A te mea muamua e 'tau o fai, e 'tau o malamalama koutou me e isi ne tino ka 'sae mai i aso fakaoti, ka ko latou konei e pulea olotou olaga ne olotou manakoga masei. Ka fakatauemu atu ki a koutou penei:

⁴“Ne folafola mai ne ia me i a ia e vau. E tonu? Tefea nei a ia? A otou tupuga ko leva ne 'mate, kae e seai eiloa se 'fuliga o mea katoa talu te kamataga o te lalolagi!”

⁵E fakapuli ne latou a te mea nei: ne faipati a te Atua i aso ko teka, ko te mea eiloa ko iai te lagi mo te lalolagi. A te lalolagi ne tupu ake i te vai kae ne siomia ne te vai,

⁶ka ko te vai foki tena ko te lolo ne fakamasei ne ia a fenua o te lalolagi mua.

⁷Ka ko te lagi mo te lalolagi konei e iai nei e se tumau eiloa, e 'sunu ki te afi e alatu i te muna a te Atua. E tuku eiloa pena ke oko ki te aso e fakamasino kae fakamasei ei a tino amio masei.

⁸Oku taugasoa pele, ke mo a e puli i a koutou a te mea tenei e tasi! E seai se kesekesega o te aso e tasi mo te afe o tausaga i te kilokiloga a te Aliki; e pau katoa ki a ia a mea kona e lua.

⁹Fai mai nisi tino me vave fakataunu ne te Aliki a te mea ne folafola ne ia, kae i nisi taimi e fai pena. Ka ko ia e fakatalitali mo te kufaki me se manako a ia ke malaia se tino, tena te pogai e fakatuai ei a ia o fakataunu ana folafolaga, ko te mea ke lava se taimi e salamo ei a tino.

¹⁰A te Aso o te Aliki e oko mai e pela mo se tino kaisoa. I te Aso tena ka palele atu te lagi mo te 'gulu fakamataku, kae ka 'sunu a mea katoa i ei kae fakamaseigina foki, e pena foki te lalolagi mo mea katoa i ei.[4]

¹¹Kafai ko fakamaseigina a mea katoa pena, se vaega olaga la pefea e fia ola koutou i ei? E 'tau o fakamalu kae fakatapu otou olaga mō te Atua.

¹²Ka koi fakatalitali koutou ki te Aso o te Atua, kae olioli eiloa ke na oko mai; i te Aso tena ko te Aso e 'sunu ei te lagi kae fakamasei, mo mea foki i ei e 'sunu ke liu suavai.

¹³Ka ko te Atua, ko oti ne folafola mai ne ia te lagi fou mo te lalolagi fou, e nofo i ei a te amiotonu, kae tenei eiloa e fakatalitali tatou ki ei.

¹⁴Tela la e oku taugasoa, ka koi fakatalitali koutou ki te Aso tena, taumafai malosi eiloa ke 'ma kae 'lei koutou i mua o te Atua, ka ke ola filemu foki koutou mo ia.

¹⁵Mafaufau ki te kufaki o te Aliki io me ko te avanoa ko tuku atu ne ia ki a koutou ke fakasao ei koutou, e pela eiloa mo te tusi a te tou taina pele ko Paulo ki a koutou, i te fakaaoga ne ia o te poto ne tuku atu ne te Atua ki a ia.

¹⁶Tenei te mea e tusi sale ne ia i ana tusi katoa manafai e faipati ki te mataupu tenei. E isi ne mea faigata i ana tusi kola e fakamatala 'se ne tino va'lea mo te se toka, e pela eiloa mo te mea e fai ne latou i nisi vaega o te Tusi. Tela la, e salasala eiloa ne latou te lotou kaitoa.

¹⁷Ka ko koutou e oku taugasoa, ko leva eiloa ne iloa ne koutou a te mea nei. Tela la, ke matapula koutou, ke mo a e takitaki 'se koutou ne te 'se o tino ofa tulafono kae paku ei koutou mai otou tulaga mautakitaki.

¹⁸Kae taumafai eiloa o ola i te alofa tauanoa mo te poto o te tou Aliki Fakaola ko Iesu Keliso. Ke i a ia te vikiga, nei ke oko ki te se gata mai! Amene.