Read Te Tusi Tapu I Te Gana Tuvalu Lomiga Lua 1 IOANE 2 Bible Online

1 IOANE 2 - Te Tusi Tapu I Te Gana Tuvalu Lomiga Lua bible

1 IOANE 2

¹Aku tama, ko tusi atu ne au ki a koutou a te mea nei, ke se agasala koutou; kae kafai e isi se tino e agasala, e iai i a tatou a Iesu Keliso, ko te tino amiotonu, tela e fautua mo tatou ki te Tamana.

²Me i a Keliso, ko ia tena ko te auala e fakamagalo ei o'tou agasala, e se ko agasala fua a tatou, kae pela foki mo agasala a tino katoa.

³Kafai e faka'logo tatou ki fakatonuga a te Atua, ko iloa 'lei ei ne tatou me e iloa ne tatou a ia.

⁴Kafai se tino e fai mai, “E iloa ne au a te Atua,” kae se fakalogo ki ana fakatonuga, a te tino tena se tino loi kae e seai eiloa se mea tonu i a ia.

⁵Ka ko te tino e fakalogo ki tena muna, ko te tino tela ko faka - katoatoagina a tona alofa ki te Atua. Tenei te fakatalitonuga i a tatou e ola i te Atua:

⁶a ia tela e fai mai me ola i te Atua, e 'tau eiloa o ola e pela eiloa mo te olaga o Iesu Keliso.

⁷Oku taugasoa pele, a te fakatonuga tenei ko tusi atu ne au e se se mea fou; kae se fakatonuga ko leva, tela ko leva foki ne iai mo koutou mai i te kamataga. A te fakatonuga mua ko te talaiga tena ko leva ne lagona ne koutou.

⁸Ka ko te fakatonuga tenei ko tusi atu ne au ki a koutou e fou, ka ko tona tonuga e matea i a Keliso pela foki mo koutou. Me ko teka atu te pouliga, ka ko leva ne maina mai a te mainaga tonu.

⁹A ia tela e muna mai i a ia e nofo i te mainaga, kae e se alofa ki tona taina, koi nofo eiloa a ia i te pouliga ke oko mai eiloa ki te taimi tenei.

¹⁰A ia tela e alofa ki tona taina, e tumau a ia i te mainaga, tela la, e seai se mea i tona loto ka fakaagasala ei ne ia a te sua tino.

¹¹Ka ko ia tela e se alofa ki tona taina, ko tona uiga koi tumau eiloa a ia i te pouliga; e sasale i ei, kae e se iloa foki ne ia me fano a ia ki fea, me ko 'kivi ona mata ona ko te pouliga.

¹²Aku tama! Ko tusi atu au ki a koutou, me ko fakamagalogina otou agasala ona ko te igoa o Keliso.

¹³Tamana, ko tusi atu au ki a koutou, i te mea e iloa ne koutou a ia tela ko leva ne iai mai i te kamataga. Tamataene, ko tusi atu au ki a koutou, i te mea ko oti ne fakatakavale ne koutou a te Tino Masei.

¹⁴Aku tama, ko tusi atu au ki a koutou me e iloa ne koutou te Tamana. Ko tusi atu au ki a koutou tamana ona ko te mea e iloa ne koutou a ia tela ne iai mai i te kamataga. Tamataene, ko tusi atu au ki a koutou ona ko koutou e malosi; e ola te Muna a te Atua i otou loto, ka ko oti foki ne fakatakavale ne koutou a te Tino Masei.

¹⁵Sa tuku otou loto ki te lalolagi io me ko so se mea faka te lalolagi. Kafai e alofa koutou ki te lalolagi, ko tona uiga e se alofa koutou ki te Tamana tela e i loto i a koutou.

¹⁶Konei katoa a mea e taku ko mea faka te lalolagi: ko manakoga agasala, ko mea e matea ne tino kae manako ki ei, mo mea katoa i te lalolagi nei kola e fakamatamata ki ei a tino. E seai eiloa se mea o mea konei e mafua mai i te Tamana; e mafua katoa mai i te lalolagi.

¹⁷A te lalolagi mo mea katoa i ei kola e manako ki ei a tino e palele atu katoa; ka ko te tino tela e fai ne ia a te mea e loto ki ei a te Atua e ola ki te se gata mai.

¹⁸Aku tama, ko pili mai te gataga! Ne taku atu ki a koutou me e vau te Fili o Keliso; kae nei e tokouke a fili o Keliso ko leva ne matea atu, tela la, ko iloa nei ne tatou me ko pili mai te gataga.

¹⁹A tino konei e se kau tatou, tena te pogai ko tiakina ei tatou ne latou; moifai ne kau tatou, penei e 'nofo eiloa mo tatou. Ka ko olo keatea ko te mea ke iloa 'lei me e seai eiloa se tino o latou e kau tatou.

²⁰Ko oti ne maua ne koutou a te Agaga Tapu ne 'ligi atu ne Keliso ki luga o koutou, tela la, ko iloa katoa ne koutou te mea tonu.

²¹Ko tusi atu au, e se ona ko te mea e se iloa ne koutou a te mea tonu; kae ona ko te mea e iloa ne koutou, kae e iloa foki ne koutou me e seai se mea loi kai maua mai i te mea tonu.

²²Tela la, ko oi te tino loi? Ko ia tela e fai mai i a Iesu e se ko te Keliso. A te tino tenei, ko te Fili o Keliso. E 'teke ki te Tamana pela foki ki te Tama.

²³A ia tela e 'teke ki te Tama, e 'teke foki ki te Tamana; a ia tela e talia ne ia te Tama, e talia foki ne ia te Tamana.

²⁴Tela la, ke fakamaoni koutou o tausi i otou loto a te talaiga ne lagona ne koutou mai i te kamataga. Kafai e tumau i otou loto a te mea ne lagona ne koutou mai i te kamataga, ko tona uiga e ola faeloa koutou i te 'soko tasi mo te Tama pela foki mo te Tamana.

²⁵Kae tenei te mea ne folafola mai ne Iesu Keliso, me tuku mai ne ia ki a tatou: ko te ola se gata mai.

²⁶Ko tusi atu ne au a te mea nei ki a koutou ona ko latou kola e taumafai o fakaloiloi koutou.

²⁷Kae ki a koutou, ko oti ne 'ligi atu ne Iesu Keliso a tena Agaga ki a koutou. Ko te mautakitaki o tena Agaga i a koutou, ko tona uiga e se toe manako koutou ki se tino ke akoako ne ia koutou. Me i te Agaga e akoako ne ia koutou ki mea katoa, ka ko te mea e akoako ne ia, se mea tonu, kae e se se mea loi. Tela la, faka'logo ki akoakoga a te Agaga, kae tumau i a Keliso.

²⁸E tonu e aku tama, ke mautakitaki koutou i a ia, ko te mea ke 'fonu tatou i te loto malosi manafai e toe vau, ka ko se manako foki tatou o 'muni mo te tae'ma i te Aso e vau ei a ia.

²⁹E iloa ne koutou i a Keliso e amiotonu; tela la, e 'tau o iloa ne koutou a te mea nei, me ko so se tino e fai ne ia a te mea tonu, se tama a te Atua.