Read Te Tusi Tapu I Te Gana Tuvalu Lomiga Lua FAMASINO 1 Bible Online

FAMASINO 1 - Te Tusi Tapu I Te Gana Tuvalu Lomiga Lua bible

FAMASINO 1

¹I te otiga ne mate a Iosua, ne fesili atu ei a tino Isalaelu ki te Aliki penei, “Ko oi matakaiga i a matou e mua o taua atu ki tino Kanana?”

²Ne tali mai te Aliki, “Ko te matakaiga o Iuta e mua. Ko oti ne tuku atu ne au ki a latou a te fenua.”

³Muna a tino Iuta ki tino o te matakaiga o Simeona, “O'mai ke olo tasi tatou ki te laukele ko oti ne tuku mai mo matou, ke taua fakatasi tatou ki tino Kanana. Ka oti ko olo fakatasi foki ei tatou ki loto i te fenua tela ko oti ne tuku atu mo koutou.” Tena ne olo tasi ei a matakaiga o Simeona mo Iuta o taua fakatasi ki o la fili.

⁴Ne tuku atu ne te Aliki te manumalo ki a latou i tino Kanana mo tino Pelise, kae ne fakatakavale ne latou e sefulu afe tagata i Peseka.

⁵Ne maua ne latou a Atonipiseka i kona, taua atu eiloa latou ki ei.

⁶Ne tele Atonipiseka, kae ne afuli ne latou, maua ne latou, katikati ei ne latou ana matikao lima ma'tua, mo matikao vae ma'tua.

⁷Muna a Atonipiseka, “E tinofitu a tupu ne kati ne au olotou matikao lima ma'tua mo matikao vae ma'tua, kola ne taetae matutuga meakai i lalo o taku taipola. Ko fai nei ne te Atua ki a au a te mea ne fai ne au ki a latou.” Ne ave a ia ki Ielusalema mate eiloa i kona.

⁸Ne taua atu a tino Iuta ki Ielusalema puke eiloa ne latou. Ne tamate ne latou a tino i ei kae sunu te fa'kai.

⁹Mai kona ne olo atu latou o taua ki tino Kanana kola e nofo i te fenua mauga, i lalo o mauga, pela foki i fenua vela i saute.

¹⁰Ne olo atu latou o tau ki tino Kanana kola e nofo i te fa'kai lasi o Hepelona, tela e masani o fakaigoa sale ki a Kiliata Alapa. I kona ne fakatakavale ne latou a kaukaiga o Sesai, Aimanu mo Talamai.

¹¹Mai i kona, ne olo atu a tino o Iuta o taua ki te fa'kai o Tipeli; i te taimi tena e fakaigoa ko Kiliata Sefelo.

¹²E tokotasi mai i a latou, e igoa ki a Kalepo ne fai aka tena muna penei, “A te tino e mafai ne ia o fakatakavale a Kiliata Sefelo e avaga mo taku tama fafine ko Akesa.”

¹³Ko Otinielu, te tama tagata a te taina foliki o Kalepo e igoa ki a Kenasa, tena ne puke ne ia te fa'kai tena. Tena, ne tuku atu ei ne Kalepo tena tama fafine ko Akesa ke avaga mo Otinielu.

¹⁴I te aso o te fakaipoipoga, ne fai atu a Otinielu ki a Akesa[1] ke fai ki tena tamana ke maua mai se kogā laukele mo laua. Ne fanatu Akesa ki tena tamana i tena asini, kae sili mai tena tamana me se a te pogai ne vau ei a ia.

¹⁵Ne tali atu Akesa, “Au e manako ki ne vaipuna. A te fenua ne aumai ne koe e tu i te fenua vale.” Tena ne tuku atu ei ne Kalepo a te vai tafa ki luga mo te vai tafa ki lalo.

¹⁶A te gafa o te tamana o te avaga a Mose, te tagata Keni, ne olo tasi mo tino o matakaiga o Iuta mai i leliko, te fa'kai o lakau ko pama, ki te fenua se ola i te feitu ki saute o Alata, i Iuta. I kona ne nofo ei latou fakatasi mo tino Amaleka.

¹⁷Ne olo a tino o Iuta mo tino Simeona o taua ki tino Kanana kola e nofo i te fa'kai o Sefata, fakatakavale eiloa ne latou. Ne fakamalaia ne latou te fa'kai tena, kae fakamasei ne latou, kae fakaigoa ne latou ko Holema.[2]

¹⁸Ne fesoasoani te Aliki ki tino o te matakaiga o Iuta, tena ne puke ei ne latou a te fenua mauga tena. Kae seki puke ne latou a Kasa, Asekelona, io me ko Ekelona, fakatasi mo fa'kai foliki i olotou tafatafa. A tino kona e nofo pili ki te tai, e isi ne kaliota fiti a latou, tela la, e se maua ne te matakaiga o Iuta o afuli latou kona keatea.

²⁰ E pela mo te fakatonuga a Mose, a te fa'kai o Hepelona ne tuku ki a Kalepo, tela ne afuli ne ia a kaukaiga e tolu mai i te fa'kai tena, kola e tau olotou gafa ki a Anaki.

²¹ Ka ko tino o te matakaiga o Peniamina e seki afuli ne latou a tino Iepuse kola e nofo i Ielusalema tena la, ne nofo tasi eiloa latou ke oko mai ki aso nei.

²²Ne olo atu a matakaiga o Manase mo Efalaima o taua ki te fa'kai o Peteli, e fakaigoa i taimi kona ko Lusa. A te Aliki ne fesoasoani ki a latou. Ne uga ne latou a tino lamalama ke olo ki te fa'kai.

²⁴Ne matea ne tagata lamalama a te tagata e vau mai i te fa'kai, kae fai atu ki a ia penei, “Fakasino mai te auala ki loto i te fa'kai, kae ka se ta koe ne matou.”

²⁵Tena ne fakaasi ei ne te tagata tena te auala ki loto i te fa'kai, kae i te taimi ne takavale ei te fa'kai tena, ne tamate katoa ne tino o Efalaima mo Manase a tino katoa i te fa'kai tena, na ko te tagata fua tena ne fakasino ne ia te auala ki loto i te fa'kai, mo tena kaiga ei.

²⁶Fakamuli ifo ne fano a ia tena ki te fenua o tino Heti, faite ne ia se fa'kai i kona, kae fakaigoa ne ia ko Lusa, ko te igoa eiloa o ia ke oko mai ki aso nei.

²⁷ A te matakaiga o Manase, e seki afuli keatea ne latou a tino e nofo i te fa'kai o Peta Sana, Tanaka, Toa, Ipeleamo, Mekito, mo fa'kai foliki i olotou tafatafa; a tino Kanana ne nofo eiloa i kona.

²⁸I te taimi ne gasolo aka ei a Isalaelu o malosi, ne fakapologa ne latou a tino Kanana, kae e seki afuli keatea eiloa ne latou.

²⁹ A te matakaiga o Efalaima e seki afuli keatea ne latou a tino i te fa'kai o Kesela, tena la, ne nofo mai eiloa a tino Kanana fakatasi mo latou i kona.

³⁰A te matakaiga o Sepulona e seki afuli keatea ne latou a tino e nofo i fa'kai o Kitilona, mo Nalala, tena la, ne nofo tasi eiloa latou mo tino Kanana i kona, kae ne fakapologa ne latou.

³¹A te matakaiga o Asela, e seki afuli keatea ne latou a tino i fa'kai o Ako, Saitonu, Alapa, Akasipa, Helepa, Afeko mo Lehopa.

³²Tena la, ne nofo tasi eiloa latou mo tino Kanana, me e seki afuli keatea ne latou.

³³A tino i te matakaiga o Nafatali e seki afuli keatea ne latou a tino e nofo i fa'kai o Peta Semese, mo Petanata. Ne nofo tasi eiloa latou mo tino Kanana kona, kae ne fakapologa ne latou.

³⁴A tino Amoli ne afuli ne latou a te matakaiga o Tanu ki te fenua mauga, kae se talia ne latou ke olo ifo ki te koga laugatasi.

³⁵Ne nofo eiloa a tino Amoli i Aitialona, Salapima, mo te Mauga o Helesi, ka ko matakaiga o Efalaima mo Manase, e pule ne latou a tino Amoli kona, tena ne fakapologa foki ei ne latou.

³⁶I te feitu ki matu o Sela, e fano ei te tuakoi o Etoma, i loto i te auala o Akalapima.