Read Te Tusi Tapu I Te Gana Tuvalu Lomiga Lua FAMASINO 10 Bible Online

FAMASINO 10 - Te Tusi Tapu I Te Gana Tuvalu Lomiga Lua bible

FAMASINO 10

¹I te mateatuga o Apimeleko, kae tu mai a Toula, te tama tagata a Pusa kae ko te mokopuna o Toto, o fakasao Isalaelu. A ia se tagata i te matakaiga o Isakala kae e nofo i Samila i te fenua maugā o Efalaima.

²E luasefulu tolu tausaga ne fai ei a ia mo takitaki o Isalaelu. Ne mate atu a ia, kae ne tanu i Samila.

³Ne mate atu Toula, kae tu mai a Iaila se tagata mai Kileata. Ne takitaki ne ia Isalaelu i tausaga e luasefulu lua.

⁴E tino tolu ana tama tagata, kola e tofu mo asini a latou. E tolusefulu fa'kai lasi o latou i te fenua o Kileata, konei koi fakaigoa eiloa ko fa'kai o Iaila.

⁵A Iaila ne mate kae ne tanu i Kamono.

⁶Ne toe agasala te kau Isalaelu ki te Aliki, me ko tapuaki atu ki a Paala mo Asitate, pela foki ki atua o Sulia, Saitonu, Moapi, Amoni mo atua o Filisitia. Ne fulitua latou ki te Aliki, seki toe tapuaki atu eiloa ki a ia.

⁷Tena, ne kaitaua te Aliki ki tino Isalaelu, kae tuku atu ne ia ke fakatakavale ne tino Filisitia mo tino Amoni.

⁸E sefulu valu tausaga ne fakapuapuaga ei ne latou a tino Isalaelu kola e nofo i te fenua o tino Amoli, i Kileata, i te feitu ki te saegala o te Iolitana

⁹Ne olo atu foki eiloa a tino Amoni ki te sua feitu o te Iolitana o taua atu ki matakaiga o Iuta, Peniamina mo Efalaima. A Isalaelu ko oko eiloa i te puapuaga.

¹⁰Tena, ne ka'laga atu a tino Isalaelu ki te Aliki kae fai atu penei, “Te Atua, a matou ko agasala atu ki a koe, me ko fulitua atu matou ki a koe o tapuaki atu ki a Paala.”

¹¹Tenei te tali ne tuku mai ne te Aliki ki a latou: “A koutou ne fakapuapuaga ne tino Aikupito, tino Amoli, tino Amoni, tino Filisitia,

¹²tino Saitonu, tino Amaleka mo tino Maono i aso mua, kae ne tagi mai koutou ki a au. E a, e seki fakasao ne au koutou mai a latou?

¹³Kae e fulitua mai faeloa koutou ki a au o tapuaki atu ki nisi atua. Tela la, ka se toe fakasao ne au koutou.

¹⁴Olo o tagi atu ki atua kona ne tapuaki koutou ki ei, ke fakasao ne latou koutou i taimi e maua ei koutou ne puapuaga.”

¹⁵Ka ko tino Isalaelu ne fai atu eiloa ki te Aliki penei, “A matou ko agasala. Fai so se mea e manako koe o fai ki a matou, kae fakamolemole fakasao mai matou i te aso nei.”

¹⁶Tena, ne pei keatea ne latou olotou atua fakaatea, kae tapuaki atu ki te Aliki; tena ne saga atu ei te Aliki ki te puapuaga o latou.

¹⁷Ne fakatoka te kautau a Amoni mo te taua, olo atu ei o ma'nava i Kileata. Ne maopoopo mai a tagata Isalaelu o ma'nava i Mesepa, i Kileata.

¹⁸I kona ne fesili sale ei a tino mo takitaki o Isalaelu penei, “Ko oi ka taki ne ia te kautau a tatou o fakafeagai a tino Amoni? Te tino e fai ne ia te tofi tena, ka fai eiloa mo takitaki o tino katoa i Kileata.”