Read Te Tusi Tapu I Te Gana Tuvalu Lomiga Lua FAMASINO 11 Bible Online

FAMASINO 11 - Te Tusi Tapu I Te Gana Tuvalu Lomiga Lua bible

FAMASINO 11

¹A Iefata, se sotia toa mai Kileata, ko te tama tagata a te fafine tali tagata.

²A tena tamana ko Kileata, e isi aka foki ne ana tama tagata i tena avaga, kae i te taimi ko matua ei a tama tagata kona, ne afuli ne latou a Iefata ke fano keatea mai i te fale. Muna a latou ki a ia penei, “E seai se mea e maua ne koe mai te motou tamana; a koe se tama a se fafine fakaatea.”

³Tena, ne sola a Iefata mai ona taina, fano ei o nofo i te fenua o Topa. I kona ne maua tena potukau, ne tagata seai ne aoga, tena ne olo sale eiloa mo ia.

⁴Fakamuli ifo, ko tino Amoni eiloa ko olo o taua ki tino Isalaelu.

⁵I te tupuga o te mea tena, ne olo atu ei a takitaki o Kileata o puke mai a Iefata mai i te fenua o Topa.

⁶Muna a latou, “Vau ke taki ne koe matou o taua atu ki tino Amoni.”

⁷Kae ne tali atu a Iefata, “A koutou ne takalialia ki a au, tela ne afuli ei ne koutou a au mai i te fale o toku tamana. E a, ko maua aka koutou ne te puapuaga, ko o'mai ei koutou ki a au.”

⁸Muna a latou ki a Iefata, “A matou ko manako nei ki a koe ke vau koe ke olo tatou o taua ki tino Amoni, kae ke fai foki koe mo takitaki o tino katoa o Kileata.”

⁹Muna a Iefata ki a latou, “Kafai e ave ne koutou au ki Kileata o taua ki tino Amoni, kae tuku mai ne te Aliki te manumalo ki a tatou, ko tau ei au o fai mo takitaki o koutou.”

¹⁰Ne tali mai latou, “Ko loto matou ki te mea tena. Ko te Aliki e molimau i te mea tena.”

¹¹Tena, ne olo atu ei a Iefata mo takitaki o Kileata, kae ne fai a ia ne tino mo takitaki o latou. Ne folafola ne Iefata a te mea e manako a ia ki ei i Mesepa, i mua o te Aliki.

¹²Ne uga ne Iefata ana avefekau ki te tupu o Amoni mo te fekau tenei, “Se a te mea e ita ei koe ki a matou? Ai a ko o'mai ei koutou o taua ki te motou fenua?”

¹³Ne tali mai te tupu o Amoni ki avefekau a Iefata penei, “I te 'maiga o tino Isalaelu mai Aikupito, ne puke ne latou toku laukele, mai te Vaitafe o Alinona ke oko ki te Vaitafe o Iapoka mo te Vaitafe o Iolitana E tau o fakafoki mai ne koe i se feitu filemu.”

¹⁴Ne toe uga atu ne Iefata a avefekau ki te tupu o Amoni

¹⁵mo te tali tenei: “E loi fua te tala tena me ne puke ne Isalaelu te fenua o Moapi io me ko te fenua o Amoni.

¹⁶Tenei te tonuga: i te tiakinaga ne tino Isalaelu a te fenua o Aikupito, ne ui atu latou i te vao o olo ki te Mataosoga o Akapa, oko atu ei ki Katesa.

¹⁷ I kona, ne uga ei ne latou a avefekau ki te tupu o Etoma ke talia mai latou ke ui atu i loto i tena fenua, kae ne seki talia ne ia. Ne fakamolemole foki latou ki te tupu o Moapi, kae ne seki talia foki ne ia ke ui atu latou i loto i tena fenua. Tena, ne nofo eiloa te kau Isalaelu i Katesa.

¹⁸ Tena, ne toe ma'laga atu latou i loto i te vao, o olo i te kaokao o te fenua o Etoma mo te fenua o Moapi ke oko atu eiloa latou ki te feitu ki te saegala o Moapi, i te sua feitu o te Vaitafe o Alinona. Ne ma'nava latou i kona, kae ne seki olo atu latou ki te sua feitu o te Vaitafe o Alinona, me ko te tuakoi tena o Moapi.

¹⁹ Ne uga foki ne tino Isalaelu ne avefekau ki a Sekono, te tupu o Amoli tela e nofo i Hesepono, ke talia mai ke ulu atu latou i loto i tena fenua o olo atu ki te lotou fenua.

²⁰Kae ne seki talia foki ne Sekono te fakamolemole tena. Ne vau a ia mo tena kautau katoa o ma'nava i Lasa, taua atu eiloa ki tino Isalaelu.

²¹Ka ko te Aliki, te Atua o Isalaelu ne tuku ne ia te manumalo ki tino Isalaelu i a Sekono mo tena kautau. Tena, ne puke ei ne Isalaelu a te fenua o tino Amoli kona e nofo i kona.

²²Ne puke ne latou a koga laukele katoa o tino Amoli mai te Vaitafe o Alinona i saute ke oko ki te vaitafe o Iapoka i matu, pela foki mai i te vao i te feitu ki te saegala o te Iolitana i te togala.

²³Tela la, ko te Aliki, te Atua o tino Isalaelu ne afuli ne ia a tino Amoli, me i a Isalaelu ko tena fenua.

²⁴A koutou e taumafai ke toe puke atu te otou fenua, ne? Masaua o tausi otou mea ne avatu ne te otou atua ko Kemoso. Ka ko matou e tausi eiloa ki mea ne tuku mai ne te Aliki te motou Atua mō matou.

²⁵ I otou manatu, e lei atu koutou i a Palako, te tama a Sipola, te tupu o Moapi? Ne seki tofo eiloa ne ia Isalaelu. Ne seki taua mai eiloa a ia ki a matou.

²⁶Ko toluselau nei tausaga ne pule ei Isalaelu i fa'kai o Hesepono, Aloela, mo fa'kai foliki i o la tafatafa, pela foki a fa'kai lasi i kaugutu o te Vaitafe o Alinona. Ai a seki na puke ei ne koutou i tausaga kona ko teka?

²⁷Kiloke, e seai se mea se ne fai ne au. Ko koutou kona e se, i a koutou e faitaua mai ki a au. Ko te Aliki te famasino. Ka fakamasino ne ia i te aso nei a Isalaelu mo Amoni.”

²⁸Ka ko te tupu o Amoni e se fia saga eiloa ki te fekau tena a Iefata.

²⁹Tena, ko te agaga eiloa o te Aliki ko ulu atu ki loto i a Iefata. Ne fanatu a ia i Kileata, mo Manase, kae toe foki mai ki Mesepa i Kileata, fanatu ei ki Amoni.

³⁰Ne tauto Iefata ki te Aliki, ana muna: “Kafai e tuku mai ne koe te manumalo ki a au i tino Amoni,

³¹kae ka sunu ne au ke fai mo taulaga a te tino muamua eiloa tela e vau mai loto i toku fale o fakafetaui ki a au, i te taimi ko foki mai ei au mo te manumalo. Ka ofo atu ne au a te tino tena ke fai mo taulaga ki a koe.”

³²Tena, ne sopo atu Iefata ki te sua feitu o te vaitafe o taua ki tino Amoni, kae ne tuku atu ne te Aliki te manumalo ki a ia.

³³Ne taua atu a ia ki a latou mai Aloela ke oko ki te koga i tafa o Miniti, e luasefulu fa'kai lasi ne puke, kae oko atu foki ki Apelu Kelamima. Ko se fakatau eiloa te fakatau 'taaga, kae ne takavale a tino Amoni i tino Isalaelu.

³⁴I te fokiatuga o Iefata ki tena fale i Mesepa, kae vau tena tama fafine o fakafetaui atu ki a ia, e sakasaka mai kae tata mai te samupelini. Ko ia eiloa tena tama tokotasi.

³⁵ I te mateaga ne Iefata tena tama fafine, ne saesae ona gatu i te fanoanoa kae fai atu penei, “Oi aue taku tama! A toku fatu ko fatifati ne koe! Ai a ne mua mai ei koe, ke fakamae toku loto? Ko oti au ne tauto ki te Aliki, kae nei se mafai ne au o toe fakafoki taku pati ne fai!”

³⁶Ne tali atu a ia ki tena tamana, “Kafai koe ne tauto ki te Aliki, fai eiloa te mea ne tauto koe ki ei e uiga ki a au, me ko oti ne avatu ne te Aliki te manumalo ki a koe i tino Amoni.”

³⁷Kae ne toe fakamolemole atu a ia ki tena tamana penei, “Talia mai taku fakamolemole tenei. Tuku mai se lua masina ke olo matou mo oku takaga o tafaofao i mauga, kae o tagi fanoanoa foki i a au ka mate kae seki avaga.”

³⁸Ne uga ne ia ke fano i masina e lua. Tena ne olo atu a te tama fafine a Iefata mo ana takaga ki mauga o tagi fanoanoa i a ia ka mate kae seki avaga, seki ai foki ne ana tama.

³⁹I te katoaga o te lua masina, ko ia eiloa ko foki mai ki tena tamana. Ne fai eiloa ne Iefata a te mea ne tauto a ia ki te Aliki, tena ne mate ei tena tama fafine tena kae e seki avaga eiloa. Tena te mafuaga o te tu i Isalaelu,

⁴⁰tela e masani sale a tamafine o olo ki se koga i aso e fa i tausaga katoa, o tagi fanoanoa i te mate o te tama fafine a Iefata, te tagata Kileata.