Read Te Tusi Tapu I Te Gana Tuvalu Lomiga Lua FAMASINO 13 Bible Online

FAMASINO 13 - Te Tusi Tapu I Te Gana Tuvalu Lomiga Lua bible

FAMASINO 13

¹Ne toe agasala Isalaelu ki te Aliki, tena ne tuku atu ei latou ke pule ne tino Filisitia i tausaga e fasefulu.

²I te taimi tena, e isi se tagata e igoa ki a Manoa mai i te fa'kai o Sola. A ia se tino mai i te matakaiga o Tanu. A tena avaga e pa, e se fanau.

³Ne fanatu te agelu a te Aliki ki te avaga a Manoa, kae fai atu penei, “E seki ai eiloa se tamaliki a koe kai maua, ko pili nei kae faitama koe ko fanau mai ei ne koe se tamaliki tagata.

⁴Taumafai o sa inu ki se uaina io me ne pia, io me kai ki meakai kola e se tau o kai.

⁵ Kafai ko fanau mai tau tama tagata, masaua o sa katigina eiloa ona laulu, me i a ia ka fakatapu ki te Atua ke fai mo Naseli,[7] e kamata mai te taimi e fanau mai ei a ia. Tena, ka galue ei a ia o fakasao Isalaelu mai i tino Filisitia.”

⁶Tena ne fanatu ei te fafine tena ki tena avaga kae fai atu penei, “E isi se tagata o te Atua ne vau ki a au, kae ko oko eiloa i te fakamataku e pela eiloa mo te agelu[8] a te Atua. Au seki 'sili ki ei me ko ia ne vau mai fea, kae e seki taku mai foki ne ia tena igoa.

⁷Ne fai mai ki a au, i a au ka faitama kae fanau ne au se tama tagata. Ne fai mai foki ke tapu au e inu i ne uaina io me ne pia, io me kai i ne meakai kola e se tau o kai, me i te tamaliki ka fakatapu ki te Aliki ke fai mo Naseli i tena olaga katoa.”

⁸Tena ne talo atu ei a Manoa ki te Aliki, muna a ia, “Te Aliki, fakamolemole, toe uga mai aka te agelu a te Atua ke toe vau ki a maua o fakaasi mai te mea e tau o fai ne maua ki te tamaliki manafai ko fanau mai.”

⁹Ne fai eiloa ne te Aliki te mea tela ne fakamolemole mai ki ei Manoa, tena ne toe foki mai ei te agelu ki te fafine tena i te taimi ne sagasaga ei a ia i te fatoaga. A tena avaga i te taimi tena e se nofo i kona,

¹⁰tena ne tele atu ei a ia ki tena avaga kae fai atu penei, “Kiloke! A te agelu tela ne vau ki a au i te taimi tela, tenei foki ko toe vau.”

¹¹Ne tu aka Manoa, tautali atu eiloa i tena avaga. Ne fanatu a ia ki te agelu kae fai atu penei, “Ko koe tena ne faipati ki taku avaga?” Ne tali mai a ia, “Ao.”

¹²Ne fesili atu Manoa penei, “Kafai la ko taunu au muna, se a te mea e tau o fai ne maua ki te tamaliki? Se a te olaga e tau o ola ei a ia?”

¹³Ne tali mai te agelu, “A tau avaga e tau o fai ne ia a mea katoa kola ne fai ne au ki a ia.

¹⁴Se tau lele mo ia o kai ki ne mea ne faite mai vine; e se tau mo ia o inu ki uaina io me ne pia, io me kai ki meakai se tau o kai. E tau eiloa o fai ne ia a mea katoa kola ne fai atu ne au ki a ia.”

¹⁵E se iloa ne Manoa i te tagata tena ko te agelu a te Aliki, tena ne fai atu ei a ia ki ei penei, “Fakamolemole, sa fano mua. Fakatali mai ke tunu ne maua se tamā kouti ma koe.” Kae ne fai atu a te agelu penei, “Kafai au e nofo, au e se kai ki te meakai a koulua tena. Kae kafai e ma'nako eiloa koulua o fakatoka te meakai tena, ko 'sunu aka ei ke fai mo taulaga ki te Aliki.”

¹⁷Ne tali atu Manoa penei, “Taku mai tou igoa, ko te mea ke mafai ne maua o tavae koe, manafai e taunu au muna ne fai mai.”

¹⁸Ne fesili atu te agelu penei, “Ai a e manako ei koe ke iloa ne koe toku igoa? A toku igoa se igoa fakaofoofogia.”

¹⁹Tena, ne puke aka ei ne Manoa se tamā kouti mo ne mu saito, ofo atu ei ne ia i luga i te fata-fai-taulaga kaupapa ki te Aliki tela e fai mea fakaofoofogia.

²⁰I te taimi ne ula aka ei te afi mai te fata-fai-taulaga, ne matea ei ne Manoa mo tena avaga a te agelu a te Aliki e fanake ki te lagi i te ulafaga o te afi. Tena, ne iloa aka ei ne Manoa i te tagata tena ko te agelu a te Aliki, tena ne fakasiga ifo ei a ia mo tena avaga ki lalo i te laukele. Tena, seki toe matea ei ne laua te agelu.

²²Muna a Manoa ki tena avaga, “A taua e iku eiloa o mate, me ko oti ne lavea ne taua te Atua!”

²³Kae ne tali atu tena avaga penei, “Kafai ne manako te Aliki o tamate taua, e penei e se talia ne ia a te taulaga a taua, io me fakaasi mai ne ia a mea katoa konei ne fakailoa mai ne ia.”

²⁴Tena, ne fanau mai te avaga a Manoa, se tamaliki tagata fakaigoa ei ne ia ki a Samasoni. Ne tupu aka te tamaliki, kae ne fakamanuia ne te Aliki.

²⁵Ka ko te Aliki ne tuku atu ne ia ki ei te malosi, i te taimi koi nofo ei i te koga e nofo ei a tino o te Matakaiga o Tanu, i te va o Sola mo Esetaolo.