Read Te Tusi Tapu I Te Gana Tuvalu Lomiga Lua FAMASINO 15 Bible Online

FAMASINO 15 - Te Tusi Tapu I Te Gana Tuvalu Lomiga Lua bible

FAMASINO 15

¹Fakamuli ifo, ne fanatu Samasoni o asi ki tena avaga i te taimi o te katiga o saito, kae ne avatu ne ia se tamā kouti ma tena avaga. Ne fai atu Samasoni ki te tamana o tena avaga penei, “Talia mai ke ulu atu au ki loto i te potu o taku avaga.” Ne seki talia a ia ne te tamana o tena avaga ke ulu ki te potu o tena avaga.

²Muna a te tamana o tena avaga penei, “Au e leake eiloa nei i a koe e se fiafia ki taku tama fafine, tela ne tuku atu ei ne au ki tou taugasoa. Kae e lei me e isi se taina foliki o ia tela e sili atu i te gali. E mafai ne koe o avaga ki ei.”

³Muna a Samasoni, “I te taimi tenei, ka se agasala au i te mea tenei ka fai ne au ki tino Filisitia!”

⁴Tena, ne fano a ia o po mai e tolu selau alope, kae saisai ne ia a velo o alope taki lua, kae 'sulu atu mo lama ki saiga takitasi.

⁵Ne faka'ka ne ia a lama kona, kae tuku atu a alope ke tele atu ki fatoaga saito a te kau Filisitia. I te faiga tena ne 'sunu ei a saito kola ko oti ne kati, pela foki a saito i fatoaga, ke oko foki eiloa ki togā olive.

⁶Ne 'sala ne tino Filisitia te tino ne fai ne ia te mea tena, kae 'logo latou me ne fai ne Samasoni me ko kaitaua i te tamana o tena avaga ne fano o tuku tena avaga ma tena taugasoa. A te tamana o te avaga a Samasoni se tagata mai Timena. Tena, ne olo atu ei a tino Filisitia o 'sunu te fafine tena ke mate, 'sunu foki ne latou te fale o tena tamana.

⁷Ne fai atu Samasoni ki a latou, “Kona otou faiga! Au e tauto me ka taui atu eiloa ne au te mea masei a koutou tena ne fai!”

⁸Ne taua atu a ia ki a latou, kae tokouke eiloa ana tino ne tamate. Tena, ne fanatu a ia o nofo i te ana i te kaupapa i Etama.

⁹Ne o'mai a tino Filisitia o fakamanava i Iuta, kae taua atu ki te fa'kai o Lei.

¹⁰Ne fesili atu tagata o Iuta ki tino Filisitia penei, “Ai a e taua mai ei koutou ki a matou?” Ne tali mai latou, “A matou ne mai o puke fakapagota a Samasoni, o taui te mea ne fai ne ia ki a matou.”

¹¹Tena la, e tusa mo te tolu afe tagata Iuta ne olo atu ki a Samasoni i te ana i te kaupapa i Etama, kae fai atu penei, “Samasoni, se iloa ne koe i tino Filisitia e pule nei i a tatou? Se a te mea tenei ko fai ne koe ki a matou?” Ne tali atu Samasoni penei, “A te mea ne fai ne au ki a latou ko te taui o te mea ne fai ne latou ki a au.”

¹²Ne fai mai latou penei, “A matou nei ne o'mai o saisai koe ke tuku atu koe ki tino Filisitia.” Muna a Samasoni, “Tauto mai me e se tamate ne koutou a au.”

¹³Muna a latou, “Ko 'lei, a koe e saisai fua ne matou ko tuku atu ei koe ki tino Filisitia. A koe e se tamate ne matou.” Tena, ne saisai ei Samasoni ne tagata Iuta ki lopu fou e lua, avatu ei a ia keatea mai te ana.

¹⁴I te okoatuga o Samasoni ki Lei, ne tele mai a tino Filisitia ki a ia, o ka'laga ki a ia. I kona foki eiloa, ne oko ifo ei te mana o te Aliki tela ne maua ei ne ia te malosi, motumotu ei ne ia a lopu kola e saisai i ona lima, e pela eiloa me ne filo e paku i se afi.

¹⁵Ne maua ne ia i kona te kauvae o te asini tela ne fatoa mate atu. Ne puke ne ia te kauvae tena kae ta ne ia ki ei a tino Filisitia, tela e tusa mo te afe o tino ne mate.

¹⁶Tena ne usu ei te pese a Samasoni penei, “Ne tamate ne au e toko afe tagata ki te kauvae o te asini; E fakatafola ne au latou ki te kauvae o te asini.”[9]

¹⁷I te otiga o te mea tena, pei keatea ei ne ia te kauvae o te asini. A te koga ne tupu ei te mea tena e fakaigoa ko Lamata Lehi.[10]

¹⁸Ne fia inu Samasoni, tena ne talo ei a ia ki te Aliki penei, “Ne tuku mai ne koe te manumalo ki a au; e a, ka tiakina eiloa ne koe au ke mate i te fia inu, kae ke puke au ne tino Filisitia fapau'pau konei?”

¹⁹Tena, ne fakamafa ne te Aliki te laukele i Lei, kae puna mai ei te vai. Ne inu Samasoni ki ei, malosi ei tena foitino. Ne fakaigoa te vaipuna tena ko Hakole,[11] kae tena eiloa koi tu mai i Lei.

²⁰A Isalaelu ne pule ne Samasoni i tausaga e luasefulu, ka ko te malo o Filisitia i te taimi tena e pule i a latou.