Read Te Tusi Tapu I Te Gana Tuvalu Lomiga Lua FAMASINO 16 Bible Online

FAMASINO 16 - Te Tusi Tapu I Te Gana Tuvalu Lomiga Lua bible

FAMASINO 16

¹I te aso e tasi, ne fanatu a Samasoni ki te fa'kai o Filisitia ko Kasa, kae ne fetaui a ia i kona mo te fafine tali tagata, tena ne moe ei mo ia.

²Ne logo a tino i Kasa i a Samasoni e nofo i kona, nikoi ei ne latou te koga tena, kae fakatalitali ki a Samasoni i te mataloa o te fa'kai i te po katoa tena. E seai eiloa se tino ne logoā i te po tena, kae ne fai olotou mafaufauga penei, “Tatou e faka'tali eiloa ke vaveao ko tamate ei ne tatou.”

³Ka ko Samasoni ne nofo i kona ke oko ki te valuapo, te mea eiloa ko tu atu ki tua, puke ki te mataloa o te fa'kai kae unu ne ia, fakatasi mo ona mataloa, mo pou, mo loka mo mea katoa e piki i ei. Ne na ne ia ki tena tuauma, avatu ei ne ia ki te ulu o te mauga tela e luta mo Hepelona.

⁴Mai tua o mea kona ne tupu, ne fia'fai ei a Samasoni mo te fafine e igoa ki a Talila, tela e nofo i te Vanu o Soleka.

⁵Ne olo atu a tupu e toko lima o Filisitia ki te fafine tena kae fai atu penei, “Taumafai ki a Samasoni ke taku atu ne ia te pogai e mafi ei a ia, mo te auala e mafai ei ne matou o fakatakavale a ia kae saisai ke seai sena mea e mafai o fai. Ka togi ne matou a koe o tuku atu e afe mo te selau a tupe siliva mai i a matou taki tokotasi.”

⁶Tena, ne fai atu ei a Talila ki a Samasoni penei, “Fakamolemole, fakaasi mai me ai a e mafi ei koe. Kafai e isi se tino e manako o saisai koe kae fakatakavale a koe, e fai pefea ne ia?”

⁷Ne tali atu Samasoni, “Kafai e saisai ne latou a au ki ne uka fou e fitu o kausana, kola e seki tauaki, ko te mea eiloa ko seai se mea e mafai ne au o fai.”

⁸Tena ne aumai ei ne tupu o Filisitia a uka fou e fitu o kausana, kola e seki tauaki, ki a Talila, tena ne saisai ei ne ia a Samasoni.

⁹E isi ne tagata e muni mai i te sua potu, tena ne ka'laga ei a Talila penei, “Samasoni! A tino Filisitia ko 'mai!” Kae ne poi aka Samasoni, motumotu katoa ei a uka kona, e pela eiloa me se filo manafai ko fakapatele atu ki se afi. Tena la, e seki maua eiloa ne latou te pogai o te mafi o Samasoni.

¹⁰Muna a Talila ki a Samasoni, “Ai a ne fakaloiloi ei ne koe au, kae se fakaasi mai te mea tonu? Fakamolemole, fakaasi mai me e mafai pefea ne se tino o saisai koe ke se gasue?”

¹¹Ne tali atu Samasoni, “Kafai e saisai ne latou au ki ne lopu e seki fakaaoga eiloa, ko seai ei se mea e mafai ne au o fai.”

¹²Tena, ne saisai ei ne Talila a Samasoni ki lopu fou, kae ka'laga atu penei, “Samasoni! A tino Filisitia ko 'mai!” E isi ne tagata e nofo mai i te sua potu. Ne motumotu ne Samasoni a lopu i ona lima e pela fua me ne filo.

¹³Muna a Talila ki a Samasoni, “Au nei koi fakaloiloi eiloa ne koe, seki fakaasi mai eiloa ne koe te mea tonu ki a au. Fakaasi mai me e mafai pefea ne se tino o saisai koe.” Ne tali atu Samasoni, “Kafai e fili ne koe oku kaufiliga e fitu ki loto i te masini fili, kae sai ki se fao lakau, ko seai ei se mea e mafai ne au o fai.”

¹⁴Tena, ne fakamoemoe ei a Samasoni ne Talila, fili ei ne ia ona laulu ki te masini fili, kae sai atu ki se fao lakau. Ne ka'laga atu a ia penei, “Samasoni! A tagata Filisitia ko 'mai.” Ne pula aka Samasoni, futi mai ei ona laulu mai te masini fili laulu.

¹⁵Tena, ne fai atu ei a Talila ki a Samasoni penei, “A koe e se alofa mai ki a au. Ko tolu taimi ne fakaloiloi ei au ne koe, kae e seki fakaasi mai eiloa ne koe te pogai e mafi ei koe.”

¹⁶Ne fesili atu faeloa a Talila ki a ia i aso katoa, tela ko fiu faka eiloa Samasoni,

¹⁷fakaasi atu ei ne ia te pogai e mafi ei a ia. Muna a Samasoni, “A oku laulu e seki kati eiloa. Au ne fakatapu ke fai mo Naseli talu mai te taimi ne fanau mai ei au. Kafai ko kati oku laulu, ko te mea eiloa ko seai soku malosi, ko pau ei au mo so se tino.”

¹⁸I te iloaga ne Talila me ko fakaasi atu ne ia te mea tonu, tena ne uga ei tena fekau ki tupu o Filisitia penei, “Toe foki mai, me tenei ko oti ne fakaasi mai ne ia te mea tonu ki a au.” Tena ne foki mai ei latou mo te tupe e togi ei Talila.

¹⁹Ne fakamoemoe ne Talila a Samasoni i ona vae, kae fai atu ki te tagata e tokotasi ke vau o kati a laulu o Samasoni Tena, ne fakapuapuaga ei ne Talila a Samasoni, me ko seai eiloa sena malosi.

²⁰Ne ka'laga Talila penei, “Samasoni! A tagata Filisitia ko 'mai!” Ne pula aka Samasoni mo ona mafaufauga penei, “Au e sao eiloa, pela eiloa mo te masani.” E seiloa ne ia i te Aliki ko fano keatea mai i a ia.

²¹Ne puke fakapagota a ia ne tino Filisitia, kae kape ona kanomata ki tua. Ne avatu ne latou a Samasoni ki Kasa, kae saisai a ia ki filifili palasi, kae tuku ke galue i te koga tuki saito, i te falepuipui.

²²Ka ko ona laulu ko kamata ei o tupu aka.

²³Ne maopoopo a tupu o Filisitia o fakamanuia te mauaga o Samasoni, kae ofo atu foki ne latou te lotou taulaga ki te lotou atua ko Takono. Ne usu olotou pese penei, “Ne aumai ne te motou atua te manumalo i te motou fili ko Samasoni!”

²⁴Ko oko eiloa i te olotou fia'fia, tela ne toe fai aka latou penei, “Kalaga ki a Samasoni ke vau o faka fiafia tatou!” Ne puke mai ne latou Samasoni mai te falepuipui, kae fai ki ei ke fakamaimoa aka latou, kae ne fakatu ne latou i va o pou. I te mateaga a ia ne tino Filisitia, ne usu atu ei olotou tavaega ki te atua o latou penei: “Ko oti ne tuku mai ne te motou atua te manumalo i te fili o matou, tela ne fakamasei ne ia te motou fenua, kae tamate foki ne ia a omotou tino e tokouke!”

²⁶Ne fai atu Samasoni ki te tamaliki tela e takitaki ne ia a ia penei, “Taki aka au ke puke oku lima ki pou kola e tokai ei te fale tenei. Au e manako o fakapale ki ei.”

²⁷A te fale tena e fonu eiloa i tagata mo fafine. A te tokolima tupu o Filisitia e nofo katoa i kona, kae e tai tolu afe a tagata mo fafine i te tuafale kola e kilokilo ki a Samasoni kae fakalili atu i a ia.

²⁸Tena ne talo ei a Samasoni penei, “Te Aliki Maluga, fakamolemole masaua mai au; te Atua, fakamolemole, toetuku mai toku malosi i te toe taimi tenei, ko te mea ke taui ne au te mea ne fai ne latou ki oku mata.”

²⁹Tena, ne puke atu ei a Samasoni ki pou loto e lua, kola e tokai ei te fale kātoa, e tasi te lima i te sua pou kae tasi i te sua pou, tena ne tule atu ei ne ia

³⁰kae ka'laga penei, “Tuku mai au ke mate fakatasi mo tino Filisitia!” Ne fakaoti eiloa tena malosi o tule a pou, tena, ne siga ei te fale, tao ei a tupu kola e tokolima mo tino katoa i kona. A tino ne tamate ne Samasoni i te taimi tena e tokouke atu i ana tino ne ta sale i aso o tena olaga.

³¹Ne o'mai ona taina mo tena kaiga katoa o puke atu tena foitino. Ne puke atu ne latou a ia o tanu i te va o Sola mo Esetaolo, i te tanuga o tena tamana ko Manoa. A Samasoni ne taki ne ia Isalaelu i tausaga e luasefulu.