Read Te Tusi Tapu I Te Gana Tuvalu Lomiga Lua FAMASINO 17 Bible Online

FAMASINO 17 - Te Tusi Tapu I Te Gana Tuvalu Lomiga Lua bible

FAMASINO 17

¹E isi se tagata e tokotasi e igoa ki a Mika, tela e nofo i te fenua maugā o Efalaima.

²Ne fai atu a ia ki tena matua penei, “Masaua ne koe me ne muna tuku ne koe a te tino ne kaisoa ne ia a te afe mo te selau tupe siliva a koe. Ne lagona eiloa ne au au muna ne fai. Kiloke, konei a tupe i a au. Ko au ne puke ne au.” Ne fai atu ei tena matua penei, “Taku tama, a te Aliki ke fakamanuia atu ki a koe!”

³Ne tuku atu ne ia te tupe ki tena matua, kae fai atu tena matua penei, “Ko tuku atu nei ne au a siliva konei ki te Aliki, ko te mea ke sao taku tama mai taku fakamalaiaga tela ne fai. Ka fakaaoga mo fai te tupua lakau kae ufi ki te siliva. Tela la, ka toetuku atu nei ne au ki a koe a tupe siliva konei.”

⁴Tena, ne tuku atu ei ne ia a te tupe siliva tena ki tena matua. Ne puke aka ne te matua tena e luaselau tupe siliva o avatu ki te tagata galue i fiti, tela ne faite ne ia te tupua, ne ta'lai ne ia mai te lakau kae ufi ki te siliva. Ne tuku te tupua tena i te fale o Mika.

⁵A Mika, e isi eiloa sena koga tapuaki. Ne faite ne ia ne tupua mo te efota, kae fili aka ne ia tena tamaliki tagata e tokotasi ke fai mo ana faitaulaga.

⁶ I te taimi tena, e seki ai ei se tupu i luga i Isalaelu, tela la, e pule eiloa te tino i te mea e manako o fai.

⁷I te taimi tena, e isi se tamataene mai te matakaiga o Levi, tela ne nofo sale ki te fa'kai ko Peteleema i Iuta.

⁸Ne tiakina ne ia Peteleema, o fanatu o sala se koga lei mo ona nofo. I ana fanofano salega, ne oko atu a ia ki te fale o Mika i te fenua maugā o Efalaima.

⁹Ne fesili atu Mika ki a ia, “A koe ne vau mai fea?” Ne tali atu a ia penei, “Au se tagata i te matakaiga o Levi mai Peteleema i Iuta. Au e salasala se koga mo oku nofo.”

¹⁰Muna a Mika penei, “Vau ke nofo koe i a au, ko fai koe mo faitaulaga pela foki mo se tagata fakatonutonu a aku, kae togi koe ne au ki te sefulu tupe siliva i te tausaga, kae tuku atu foki ne au ne gatu mo ne meakai ma koe.”

¹¹Ne loto te tagata Levi tena ke nofo a ia i a Mika, tena ne fai eiloa a ia e pela me se tama a Mika.

¹²Ne fai a ia mo faitaulaga a Mika, tena nofo eiloa a ia i te fale o Mika.

¹³Muna a Mika, “E iloa ne au i te Aliki ka saga mai ki a au, me tenei ko isi se tino Levi e fai mo faitaulaga i a au.”