Read Te Tusi Tapu I Te Gana Tuvalu Lomiga Lua FAMASINO 18 Bible Online

FAMASINO 18 - Te Tusi Tapu I Te Gana Tuvalu Lomiga Lua bible

FAMASINO 18

¹I te taimi tenei, e seki ai ei se tupu i Isalaelu. I aso kona, a te matakaiga o Tanu koi salasala eiloa ki ne laukele, me e seki ai eiloa ne laukele totino o latou kai maua i Isalaelu.

²Tena, ne fili aka ne tino o te matakaiga o Tanu e tokolima tagata 'tau; mai i a latou kae uga atu latou mai te fa'kai o Sola mo Esetaolo mo te fakatonuga ke olo o sukesuke faka'lei te fenua. I te okoatuga o latou ki te fenua maugā o Efalaima, ne nofo latou i te fale o Mika.

³I te taimi ne nofo ei latou i kona, ne lagona ne latou te sikugaleo o te tamataene Levi, tena ne olo atu latou ki a ia kae fai atu penei, “Ne a au mea e fai i konei? Ko oi te tino ne aumai ne ia koe ki konei?”

⁴Ne tali atu te tamataene tena penei, “E isi se faifaiga a maua mo Mika, tela e togi ne ia au ke fai au mo faitaulaga a ia.”

⁵Ne fai atu latou penei, “Fakamolemole, ka'laga aka ki te Atua me mata e manuia te motou malaga me ikai.”

⁶Muna a te faitaulaga tena, “E seai se mea e tau o ma'taku koutou ki ei. A te Aliki e tausi eiloa ne ia koutou i te otou malaga.”

⁷Tena ne olo atu ei te toko lima kona mai kona, o olo atu ki Laisa. Ne lavea ne latou te olaga filemu o tino i kona, e pela mo tino Saitonu. A latou kona, ne tino filemu, kae se mataola, kae e seai foki ne fakakinauga a latou mo nisi tino; kae e maua faeloa ne latou a mea e ma'nako latou ki ei.[12] E mao te koga e nofo ei latou mai tino Saitonu kae e seai ne olotou fesokotakiga mo nisi fa'kai pili mai.

⁸I te foki atuga o te tokolima kona ki Sola mo Esetaolo, ne fesili atu olotou tino me ne a olotou mea ne matea.

⁹Kae ne tali atu latou penei, “O mai ke olo tatou o taua ki Laisa. Ne lavea ne matou te fenua, kae ko oko eiloa i te gali. Sa nofo; fakavave! Olo atu o na puke!

¹⁰Kafai e oko atu koutou ki kona, ka matea ne koutou me e seai eiloa se tino i Laisa e mafa ona mafaufauga ki se mea ka tupu. A te fenua tena e lasi; so se mea e ma'nako koutou ki ei e maua i kona, kae ko oti ne tuku atu ne te Atua mō koutou.”

¹¹Tena, ne olo atu ei te onoselau tagata i te matakaiga o Tanu mai Sola mo Esetaolo, kae ko toka mo te taua.

¹²Ne olo atu latou, ma'nava ei i te feitu ki te togala o Kiliata iealima i te kogā fenua o Iuta. Tena te mea koi fakaigoa ei te koga tena ko te koga o tino o te Matakaiga o Tanu.

¹³Ne olo atu latou, oko atu ei ki te fale o Mika i te fenua mauga o Efalaima.

¹⁴Tena, ne fai atu ei te toko lima tagata kola ne olo o sukesuke te fenua i tafatafa o Laisa, ki te lotou kau penei, “E iloa ne koutou me e isi se tupua lakau kae ufi ki te siliva i loto i se fale i konei? E isi aka foki ne nisi tupua mo te efota. Se a te mea e tau o fai ne tatou?”

¹⁵Tena ne olo atu latou ki loto i te fale o Mika, tela e nofo mai ei te tamataene Levi, kae sili atu ei latou ki te tamataene Levi me ko ia e malosi me ikai.

¹⁶I te taimi tena, a te onoselau sotia mai Tanu, kola ko toka mo se taua, e tu i te mataloa.

¹⁷Ne ulu atu te toko lima ki loto i te fale, puke mai ei ne latou te tupua lakau tela e ufi ki te siliva, mo nisi tupua, mo te efota, ka ko te faitaulaga e tu eiloa mo te onoselau sotia i te mataloa o te pui o te fale.

¹⁸I te oloatuga o tagata kona ki loto i te fale o Mika o puke a mea tapu kona, kae ne fesili atu a te faitaulaga ki a latou penei, “Ne a otou mea e fai?”

¹⁹Muna a latou, “Pono tou gutu. Seai sau pati e fai mai. Vau i a matou, ke fai koe mo faitaulaga pela foki mo tino fakatonutonu a matou. E fiafia koe ke fai koe mo faitaulaga o se matakaiga e tasi o Isalaelu i lo se faitaulaga a se tagata e tokotasi?”

²⁰Ne fiafia te faitaulaga ki te mea tena, tena ne puke aka ei ne ia a mea tapu kona, fanatu eiloa i te kau kona.

²¹Ne ma'fuli atu te matakaiga o Tanu, te mea eiloa ko olo, ka ko olotou tamaliki, olotou pulumakau, mo kope o latou ne ave eiloa i mua.

²²Ko tai mao atu eiloa latou mai te fale o Mika, i te taimi ne ka'laga atu ei a Mika ki ona tuakoi ke olo latou o taua. Ne maua atu ne latou a tagata o te matakaiga o Tanu

²³kae ka'laga atu ki a latou. Ne ma'fuli mai a tagata o te matakaiga o Tanu kae fesili atu ki a Mika penei, “Se a te mea e tupu? Ai a ne 'mai katoa ei koutou?”

²⁴Ne tali atu Mika, “Se a te uiga o tau pati tena, ‘Se a te mea e tupu?’ Ne puke ne koutou taku faitaulaga mo atua kola ne faite ne au, ko koutou eiloa ko olo! Ko seai ne aku mea nei e toe.”

²⁵Ne fai atu a tagata Tanu penei, “E lei ke sa toe fai mai sau pati, i tagata konei ma kaitaua kae taua atu ki a koe, ko 'mate ei koutou mo tou kaiga kātoa.”

²⁶Tena, ne toe ma'laga atu eiloa latou. Ne matea ne Mika i te kau kona ko to ma'losi, tena ne foki atu ei a ia ki tena fale.

²⁷I te otiga ne puke ne tagata Tanu a te faitaulaga mo mea a Mika ne faite, olo atu ei latou o taua ki Laisa, te fa'kai o tino filemu, tela e tu i te vanu tela e tu foki ei te fa'kai o Petelehopa. Ne tamate ne latou a tino i kona kae sunu te fa'kai. E seai eiloa se tino e vau o fakasao latou, i te fa'kai foki la o saitonu e 'mao mo Laisa, kae e seai foki ne fesokotakiga a latou mo nisi tino. Ne toe faite ne tagata Tanu te fa'kai, nofo ei i kona.

²⁹Ne fuli ne latou te igoa o te fa'kai tena mai i a Laisa ki a Tanu, te igoa o te lotou tupuga, te tama tagata a Iakopo

³⁰Ne fakatu aka ne tagata Tanu te tupua ke tapuaki ki ei a tino, ka ko Ionatana, te tama tagata a Kelesoma kae ko te mokopuna o Mose, ko te faitaulaga i te matakaiga o Tanu. A tena gafa ne fai eiloa mo faitaulaga i te matakaiga tena o Tanu ke oko ki te taimi ne ave ei latou i te tafeaga.

³¹A te tupua a Mika ne tu eiloa i kona i te taimi ne tu foki ei te Faleie o te Aliki i Sailo.