Read Te Tusi Tapu I Te Gana Tuvalu Lomiga Lua FAMASINO 20 Bible Online

FAMASINO 20 - Te Tusi Tapu I Te Gana Tuvalu Lomiga Lua bible

FAMASINO 20

¹A tino Isalaelu katoa mai Tanu i matu ke oko ki Pelesepa i saute, e pela foki mai te fenua o Kileata i te saegala, ne talia ne latou te kalaga ke maopoopo latou. Ne maopoopo katoa latou i mua o te Aliki i Mesepa.

²A takitaki katoa o matakaiga o Isalaelu ne maopoopo katoa i te maopoopoga tenei o te fenua o te Atua, kae e faselau afe sotia sasale ne oko atu.

³I te taimi tena, a tino Peniamina ko logo i tino Isalaelu katoa kola e maopoopo i Mesepa. Ne fesili atu a tino Isalaelu penei, “Taku mai me ne fai pefea te agasala tena?”

⁴Ne tali atu ei te tagata Levi tela ne mate tena avaga fakasalasala penei, “Maua ne olo mo taku avaga fakasalasala ki Kipea i te laukele o Peniamina o moe i ei i te po tena.

⁵Ne o'mai a tagata Kipea o nikoi te fale tela e nofo ei maua, i te po tena. Ne taumafai latou o tamate au; ne seki taunu te lotou manatu tena, puke malo faka ei ne latou taku avaga fakasalasala, tena ne mate ei.

⁶Ne puke mai ne au tena foitino o katikati ki potumea e sefulu lua, tufa atu ei ne au e takitasi potumea i matakaiga takitasi o Isalaelu. A tino kona ko oti ne fai ne latou se amioga masei i te tou fenua.

⁷A koutou katoa konei ne tino Isalaelu. Se a te mea e tau o fai ne tatou ki te mea tena?”

⁸Ne 'tu katoa ki luga a tino i kona kae fai aka penei, “E seai eiloa se tino i a tatou e foki atu ki tena fale, faitalia me se faleie io me se fale eiloa.

⁹Tenei te mea ka fai ne tatou: ka fai ne tatou se vili ke fili ei ne tagata ke olo o taua ki Kipea.

¹⁰E tasi vae sefulu tagata i Isalaelu e nofo o fakatoka meakai ma te kautau, ka ko te sua vaega e olo o fakasala a tino Kipea [13] e tusa mo te amioga masei a latou ne fai i te fenua o Isalaelu.”

¹¹Tena la, ne maopoopo katoa ei a tino Isalaelu mo te fakamoemoega e tasi, o taua atu ki te fa'kai o Kipea.

¹²Ne uga atu ne tino Isalaelu a avefekau a latou ki fa'kai o te matakaiga o Peniamina mo te fekau penei: “Se a te agasala tenei ko oti ne fai ne koutou?

¹³Tuku mai a tino amio masei kona i Kipea ke tamate ne matou, ke solo keatea atu ei te masei tenei i luga i Isalaelu.” Ka ko tino Peniamina e se fia saga ki te fekau tena a tagata Isalaelu.

¹⁴Tena ne maopoopo mai ei te kau Peniamina ki Kipea o taua atu ki nisi tino Isalaelu.

¹⁵I te aso tena, ne fakamaopoopo ne latou e luasefulu ono afe sotia mai olotou fa'kai. Ka ko tino Kipea ne fakamaopoopo ne latou e fituselau tagata fai eiloa o latou kae e tau katoa ki olotou maui. Ko latou eiloa ko poto i te fakaaogaga o te sana fatu; e mafai ne latou o sana se lāulu e tasi o se tino, kae e se mafai eiloa o seke.

¹⁶

¹⁷A te katoaga o Isalaelu e tusa mo te faselau afe sotia.

¹⁸Ne olo atu a tino Isalaelu ki te koga tapuaki i Peteli, kae ne fesili atu latou ki te Atua penei, “Ko oi te matakaiga e mua o taua atu ki tino Peniamina?” Ne tali mai te Aliki, “Ko te matakaiga o Iuta.”

¹⁹Tena, ne fanatu ei te malaga a Isalaelu i te taeao o te sua aso, fakamanava ei i tafa o te fa'kai o Kipea.

²⁰Ne olo atu latou o taua ki te kautau a Peniamina, kae fakatu olotou sotia fakafesagai ki te fa'kai.

²¹Ne ulu mai te kautau a Peniamina mai loto i te fa'kai, kae ne tamate ne latou e luasefulu lua afe sotia o Isalaelu i te aso tena.

²²Ne toe olo atu te kau Isalaelu ki te koga tapuaki kae tagi i mua o te Aliki ke oko eiloa ki te afiafi. Ne fesili atu latou ki te Aliki penei, “E a, koi tau matou o toe olo atu o taua ki omotou taina kola ko tino Peniamina?” Ne tali mai te Aliki, “Ao.” Tena, ne loto ma'losi ei te kautau a Isalaelu, kae fakatoka olotou sotia e pela eiloa mo te aso muamua.

²³

²⁴Tena, ne olo atu latou o taua ki te kautau a Peniamina i te lua o taimi.

²⁵Ne ulu mai sotia o Peniamina mai loto i te fa'kai o Kipea, kae i te taimi tenei, ne tamate ne latou e tusa mo te sefuluvalu afe sotia 'lei eiloa o Isalaelu.

²⁶Tena, ne toe olo atu a tino Isalaelu katoa ki Peteli o tagi fanoanoa. Ne sagasaga latou i kona i mua o te Aliki kae seki kai eiloa ke oko ki te afiafi. Ne ofo atu ne latou ne taulaga fakafetai, kae sunu kātoa nisi taulaga, i kona i mua o te Aliki.

²⁷A te Pusa o te Feagaiga a te Atua e tuku i kona i Peteli i aso kona, ka ko Fineaso, te tama tagata a Eleasalo kae ko te mokopuna o Alona, e tausi ne ia. Ne fesili atu a tino ki te Aliki, “E a, koi 'tau matou o olo atu o taua ki omotou taina ko tino Peniamina, me ikai?” Ne tali mai te Aliki, “Olo o taua. Taeao ko tuku atu ei ne au te manumalo ki a koutou.”

²⁸

²⁹Tena, ne fakamuni ei ne tino Isalaelu a olotou sotia fakatamilo te fa'kai o Kipea.

³⁰Tena la, ko te tolu o taimi tenei ko toe mati atu ei a te kau a Isalaelu o taua ki te kau Peniamina, kae fakatulaga olotou sotia fakasaga ki Kipea, e pela eiloa mo te lotou faiga muamua.

³¹Ne ulu mai te kautau a Peniamina mai te fa'kai o taua, kae ne taki atu eiloa latou ke tai mao mai te fa'kai. E pela eiloa mo taimi mua, ne kamata te taga a latou i tino Isalaelu i te laufenua ateatea, i te auala ki Peteli, pela foki i te auala ki Kipea. E tusa mo te tinotolu tino Isalaelu ne tamate ne latou.

³²Muna a tino Peniamina, “Ko takavale foki i a tatou e pela mo taimi mua.” Ka ko tino Isalaelu, ne mafaufau eiloa ke tele latou, ko te mea ke taki ne latou te kau Peniamina ki auala, ke mao mai i te fa'kai.

³³Tena la, i te teleatuga o te kautau lasi a Isalaelu o toe potopoto i Palatamala, ka ko te kau a latou kola e muni fakatamilo i te fa'kai o Kipea ne tele atu mai i olotou koga muni i koga fatufatua o te fenua i tafatafa o te fa'kai o Kipea.

³⁴E sefulu afe tagata 'lei eiloa o Isalaelu ne filifilia kola ne taua atu ki Kipea, tena ko fai masei eiloa te taua a latou tena. E seiloa eiloa ne tino Peniamina i a latou ko pili o takavale.

³⁵Ne tuku atu ne te Aliki te manumalo ki te kautau a Isalaelu i te kautau a Peniamina. E tusa mo te luasefulu lima afe mo te selau tagata Peniamina ne mate i te aso tena,

³⁶tena, kae fatoa lagona ifo ei ne te kau Peniamina i a latou ko takavale. A te kautau lasi a Isalaelu ne tele keatea mai i te kau Peniamina me e fakalagolago ki te kau a latou kola e muni i tafatafa o Kipea.

³⁷A tagata kona ne tele fakavave atu ki Kipea, vaevae te lotou kau i te fa'kai kae tamate a tino katoa i kona.

³⁸A te kautau lasi a Isalaelu mo te kau kola ne fakamuni, e isi se fakailoga a latou ko oti ne fai. Kafai ko matea ne te kautau lasi a Isalaelu te au e fanake mai te fa'kai,

³⁹ko latou eiloa ko tele. I te taimi tena, ka ko oti ei ne mate te tinotolu tagata Isalaelu. Ne mafaufau aka a tino Peniamina penei, “Ko takavale foki a tino Isalaelu i a tatou e pela mo te taimi mua.”

⁴⁰I te taimi tena, kae fanake mo te fakailoga, tela ko te au ko fanake mai te fa'kai. Ne kilo atu te kau Peniamina ki olotou tua kae poi i te mateaga ne latou te fa'kai ko 'ka valevale.

⁴¹Tena, ne toe ma'fuli atu ei te kau Isalaelu, ka ko tino Peniamina ko tele valevale fua i te mataku me ko iloa ne latou i a latou ko pili o takavale.

⁴²Ne tele latou mai te kau Isalaelu, tele atu eiloa ki te koga ateatea, kae ko se mafai eiloa latou o sao. Tena ne 'po atu ei latou i te va o te kautau lasi a Isalaelu mo te kau a latou kola ko 'foki mai i te sunuga o te fa'kai, tena ne ta valevale ei latou i kona.

⁴³Ne po fakalei atu eiloa ne te kau Isalaelu a te fili, tena ne afuli atu eiloa ne latou ke oko ki te kogā koga e tasi i te feitu ki te saegala o Kipea, kae i te lotou auala, ne tamate fakasolosolo atu eiloa ne tino Isalaelu a tino Peniamina.

⁴⁴E sefuluvalu afe sotia 'lei eiloa a te kau Peniamina ne mate.

⁴⁵A te sua vaega ne tele atu eiloa ke oko ki te kaupapa o Limoni. E lima afe o te fili ne tamate atu i te auala. Ne afuli atu eiloa latou ne te kau Isalaelu ke oko ki Kitoma, kae e lua afe ne tamate ne latou i te auala.

⁴⁶Tena, e tusa ei mo te luasefulu lima afe tagata Peniamina ne mate i te aso tena; a latou ne sotia toa katoa.

⁴⁷Kae e ono selau ne sao atu ki te laukele ateatea, ki te kaupapa o Limoni, kae ne nofo eiloa i kona e fa masina.

⁴⁸Ne ma'fuli atu te kau Isalaelu, tamate katoa a tino Peniamina; tagata, fafine, tamaliki, ke oko eiloa ki manu. Ne sunu foki ne latou a fa'kai katoa i te koga tena.