Read Te Tusi Tapu I Te Gana Tuvalu Lomiga Lua FAMASINO 3 Bible Online

FAMASINO 3 - Te Tusi Tapu I Te Gana Tuvalu Lomiga Lua bible

FAMASINO 3

¹Tena, ne faka'toe ne te Aliki ne nai malo i te fenua ke tofotofo ei a tino Isalaelu kola e seki tau eiloa i se taua i Kanana.

²Ne fai ne ia te mea tena ke akoako ei a tupulaga takitasi o Isalaelu ki te taua, kae maise a latou kola e seki olo eiloa ki se taua.

³A tino kola koi toe i te fenua, ko tino i fa'kai e lima o Filisitia, tino Kanana katoa, tino Saitonu, mo tino Hivi, kola e nofo i mauga o Lepanona, mai te Mauga o Paala Helemoni, ke oko ki te Auala o Hamata.

⁴A latou ka fai pela me se mea tofotofo ki tino Isalaelu, e iloa tonu ei me mata e talia ne tino Isalaelu a fakatonuga a te Aliki kola ne tuku ki olotou tupuga e auala i a Mose, me ikai.

⁵Tena, ne nofo tasi a tino Isalaelu mo tino Kanana, tino Heti, tino Amoli, tino Pelise, tino Hivi, mo tino Iepuse

⁶Ne fakatau avaga latou mo tino o malo kona, kae tapuaki atu foki ki olotou atua.

⁷Ne puli i tino Isalaelu a te Aliki te lotou Atua; ne agasala latou ki te Aliki, kae tapuaki atu ki fakatusa o Paala mo Asaila.

⁸Tena ne kaitaua ei te Aliki ki tino Isalaelu kae tuku atu ne ia latou ke fakatakavale ne te Tupu o Mesopotamia ko Kusana Lisataima. Ne pule ne te tupu tena a te fenua o Isalaelu i tausaga e valu.

⁹Ne ka'laga atu a tino Isalaelu ki te Aliki, tena ne uga mai ei ne ia a te tagata ke fakasao ne ia latou. A te tagata tena ko Otinielu, te tama tagata a te taina foliki o Kalepo e igoa ki a Kenasa.

¹⁰Ne oko atu ki a ia te agaga o te Aliki, tena ne fai ei a ia mo takitaki o Isalaelu. Ne taua atu a Otinielu ki te tupu o Mesopotamia, kae ne avatu ne te Aliki ki a ia te manumalo.

¹¹Ne filemu te fenua i tausaga e fasefulu, tena mate atu foki ei mo Otinielu.

¹²Ne toe agasala te fenua o Isalaelu ki te Aliki, tena ne fai ei ne te Aliki a Ekelona, te Tupu o Moapi ke malosi atu i Isalaelu.

¹³Ne kautasi a Ekelona mo tino Amoni mo tino Amaleka, tena fakatakavale ei ne latou a tino Isalaelu, kae puke ne latou te fa'kai o Ieliko te fa'kai o lakau ko pama.

¹⁴E sefulu valu tausaga ne nofo ei a tino Isalaelu mai lalo o te pulega a Ekelona.

¹⁵Tena, ne ka'laga a tino Isalaelu ki te Aliki, uga mai ei ne ia te tagata ke fakasao latou. A te tagata tenei ko Euta, te tama tagata a Kela, mai i te matakaiga o Peniamina. A Euta e tau ki te fakamaui. Ne uga ne tino Isalaelu a Euta mo meaalofa ki a Ekelona, te Tupu o Moapi.

¹⁶A Euta e isi sena pelu mata lua, e tai maua te limasefulu senitimita te loa. Ne funa ne ia tena pelu tena i lalo o tena gatu i tena feitu fakaatamai.

¹⁷Tena ne fanatu ei a ia mo meaalofa ki a Ekelona, se tagata puta eiloa.

¹⁸I te otiga ne tuku ne Euta a meaalofa ki te tupu, te mea eiloa ko fai atu ki tagata kola ne amo mai a meaalofa ke na foki ki olotou fale.

¹⁹Ka ko Euta ne foki mai fua i Kilikala, i koga kola e tu ei a fatu kola ne 'talai fakagaligali, kae fai atu ki te tupu penei, “Tou Malu, e isi se fekau funa ne vau mo au ki a koe.” Tena, ne fakatonu atu te tupu ki ana tavini penei, “Olo katoa koutou ki tua!” Tena, ne olo katoa ei a latou ki tua.

²⁰I te taimi ne sagasaga ei te tupu tokotasi i tena potu moko i te tuafale, kae fanatu mo Euta ki a ia kae fai atu penei, “E isi se fekau ne vau mo au mai i te Atua ki a koe.” Ne tu aka te tupu,

²¹kae puke aka Euta ki tena pelu i tena lima fakamaui, mai i tena kaokao fakaatamai, velo eiloa ne ia te tinae o te tupu.

²²Ne galo katoa te pelu ki loto i te tinae, fakatasi mo tena kau, kae ne ufi katoa ne te gako. Ne seki futi mai ne Euta te pelu ki tua mai te tinae o te tupu, kae ne sae i ona tua, i te va o ona vae.

²³Tena, ne ulu atu a Euta ki tua, pono ne ia a mataloa, loka ne ia,

²⁴ko ia eiloa ko fano. Ne o'mai a tavini, matea ei ne latou i te mataloa e loka, kae ne leake nei latou i te tupu e nofo i loto.

²⁵Ne fakatali latou ke tala mai a mataloa. Ko tai mataleva eiloa seki tala mai a mataloa, tena ne puke ei ne latou a ki o tala te mataloa. Tena, matea atu ei ne latou te lotou tupu e takato i te fola, ko mate.

²⁶A Euta ne sao ki tua i te taimi koi fakatalitali ei latou ke matala mai te mataloa. Ne fanatu a ia, fakatafa atu i fatu kola ne 'talai fakagaligali, sola atu ei a ia ki Seila.

²⁷I tena okoatuga ki te fenua mauga o Efalaima, ne fakatagi ne ia te pu o ka'laga ki tino Isalaelu ke olo ki te taua; tena ne taki ifo ei ne ia latou mai luga i koga maluga.

²⁸Muna a ia, “Tau'tali mai i a au! Ko oti ne tuku mai ne te Aliki te manumalo ki a koutou i otou fili, kola ko tino Moapi.” Tena, ne tau'tali ifo a tino Isalaelu i a Euta, ta ei ne latou a tino Moapi i te koga tela e fakatoka ei latou o ulu atu i loto i te Iolitana ki te sua feitu; e seai eiloa se tino Moapi ne to atu ki te sua feitu.

²⁹I te aso tena ne tamate ne latou e tusa mo te sefulu afe o sotia 'lei eiloa o Moapi; e seai eiloa se tino i a latou ne sao.

³⁰I te aso tena ne fakatakavale ei ne tino Isalaelu a Moapi, tena, toe filemu ei te fenua i tausaga e valusefulu.

³¹A te suā takitaki o Isalaelu ko Samekala, te tama tagata a Anata. Ne fakasao foki ne ia Isalaelu i te tamatega ne ia e onoselau tino Filisitia ki te lakau tela e taki sale ei a pulumakau.