Read Te Tusi Tapu I Te Gana Tuvalu Lomiga Lua FAMASINO 4 Bible Online

FAMASINO 4 - Te Tusi Tapu I Te Gana Tuvalu Lomiga Lua bible

FAMASINO 4

¹I te mateatuga o Euta, ko tino Isalaelu foki eiloa ko toe agasala ki te Aliki.

²Tena, ne tuku atu latou ne te Aliki ke fakatakavale ne Iapino, se tupu o Kanana tela e nofo i te fa'kai o Hasola. A te takitaki o tena kautau ko Sesela, kae e nofo i Haloseta-o-Tino-Fakaatea.

³A Iapino e isi ne ana kaliota fiti e iva selau, kae ne pule ne ia a tino Isalaelu mo te sauā i tausaga e luasefulu. Tena, ne toe 'tagi foki ei a tino ki te Aliki mō se fesoasoani.

⁴A Tepola, te avaga a Lapitota, se pelofeta fafine, kae se famasino mo Isalaelu i te vaitaimi tenei.

⁵E masani sale a ia o sagasaga i lalo o te pama e tasi i te va o Lama mo Peteli i te fenua maugā o Efalaima, ka ko tino Isalaelu e olo atu sale ki a ia o sala ne ikuga mai i a ia i mea e puapuaga ei latou.

⁶I te aso e tasi, ne uga tena fekau ki a Palako, te tama tagata a Apinoama, mai te fa'kai o Ketesa i Nafatali, kae fai atu ki a ia penei, “Tenei te fakatonuga ki a koe mai te Aliki, te Atua o Isalaelu: ’Puke e sefulu afe tagata mai matakaiga o Nafatali mo Sepulona kae taki atu latou ki te Mauga o Tapola.

⁷Ka aumai ne au a Sesela, te takitaki o te kautau a Iapino, ke taua mo koutou i te Vaitafe o Kisona. Ka vau a ia mo ana kaliota mo ana sotia, kae e tuku atu eiloa ne au ki a koe te manumalo.”’

⁸Tena ne fai atu ei a Palako penei, “Au e fano manafai e fano foki koe, kae kafai e se fano koe, au foki se fano.”

⁹Ne tali atu a Tepola, “Ko 'lei, taua e olo, kae e se takua tou igoa i te manumalo, me ka tuku mai ne te Aliki a Sesela ke fakatakavale ne te fafine.” Tena ne olo ei a Tepola mo Palako ki Ketesa.

¹⁰Ne fakamaopoopo ne Palako a matakaiga o Sepulona mo Nafatali ki Ketesa, fili mai ei e sefulu afe tagata kola ne tau'tali atu i a ia. A Tepola ne olo tasi eiloa mo ia.

¹¹I te taimi tena, a Hepela, te tagata Keni ko oti ne fakatu tena faleie pili ki Ketesa, i tafa o te lakau ko te oka i Sananima. Ko oti a ia ne faka'mao mai nisi tino Keni, kola ko tino i te gafa o Hopapu, te tuagaene o te avaga a Mose.

¹²I te logoga o Sesela i a Palako ko oti ne fano ki luga i te Mauga o Tapola,

¹³ne fakamaopoopo ei ne ia a tena iva selau kaliota mo ana tagata katoa, te mea eiloa ko olo atu mai Haloseta-o-Tino-Fakaatea ki te Vaitafe o Kisona.

¹⁴Tena ne fai atu ei a Tepola ki a Palako penei, “Fano, a te Aliki tena e takitaki ne ia koe! I te aso nei ko oti ne tuku atu ne ia ki a koe te manumalo i a Sesela.” Tena ne fanaifo ei a Palako mai te Mauga o Tapola mo tena sefulu afe tagata.

¹⁵I te tauaatuga o Palako mo tena kautau, ka ko te Aliki ne faka'numi ne ia a Sesela mo ana kaliota mo te kautau katoa. Ne sopo ifo Sesela mai te kaliota o tele i ona vae ke sao a ia.

¹⁶Ne afuli atu eiloa ne Palako a kaliota mo te kautau a Sesela ke oko eiloa ki Haloseta-o-Tino-Fakaatea, tena ne mate katoa a te kautau a Sesela, e seai eiloa se tagata ne sao.

¹⁷Ne tele atu a Sesela ki te faleie o Iaeli, te avaga a Hepela te tagata Keni, me i te Tupu ko Iapino e lei te la va mo te kaiga o Hepela.

¹⁸Ne fanatu Iaeli o fakafetaui ki a Sesela kae fai atu ki a ia penei, “Tou malu, vau ki loto; vau ki loto i toku faleie. Sa mataku.” Tena ne ulu atu ei a Sesela ki loto, kae ne fakamuni ne Iaeli a ia i tua o te pui laugatu.

¹⁹Muna a Sesela ki a Iaeli, “Fakamolemole aumai aka ne vai mo oku inu; au ko oko eiloa i toku fia inu.” Ne tala ne te fafine te taga susu, tuku atu ne ia ke inu ki ei, toe fakamuni foki ei ne ia.

²⁰Ne fai atu Sesela ki a Iaeli, “Tu i te mataloa o te faleie, kae kafai e isi se tino e vau o fesili atu me e isi se tino i konei, tali pela me e seai.”

²¹A Sesela ko oko eiloa i ona fita, tela ne to ei tena moe. Tena, ne fanatu a Iaeli mo te samala, mo te pine fakamau o te faleie, tolotolo malie atu, tuki ei ne ia te pine tena i te ulu o Sesela kae ne tu ki lalo i te laukele.

²²Ne vau Palako o sala a Sesela, kae ne fanatu a Iaeli o fakafetaui ki a ia kae fai atu penei, “Vau konei! Tenei te tagata e sala ne koe.” Tena ne ulu atu a ia ki loto i te faleie matea ei ne ia a Sesela i te laukele ko mate, mo te pine o te faleie e mau i tena ulu.

²³I te aso tena ne tuku mai ei ne te Atua a te manumalo ki tino Isalaelu i a Iapino, te tupu o Kanana.

²⁴Ne teke atu eiloa ne latou, ko te mea eiloa ko takavale masei.