Read Te Tusi Tapu I Te Gana Tuvalu Lomiga Lua FAMASINO 6 Bible Online

FAMASINO 6 - Te Tusi Tapu I Te Gana Tuvalu Lomiga Lua bible

FAMASINO 6

¹Ne toe agasala a tino Isalaelu ki te Aliki, tela la, ne tuku atu latou ne te Aliki ke pule ne tino Mitiana i tausaga e fitu.

²Ko ma'losi atu a tino Mitiana i tino Isalaelu, tela la, a tino Isalaelu ko muni sale mai i tino Mitiana i ana, mo koga 'lei i te muni i luga i mauga foliki.

³I taimi katoa e toki ei ne tino Isalaelu olotou fuaga lakau, kae o'mai a tino Mitiana mo tino Amaleka mo te kau mai i te vao, o taua ki a latou.

⁴A te kau kona e masani sale o o'mai o nofo i luga i te laukele tena, o fakamasei a lakau ne toki, ke oko atu eiloa ki tafatafa o Kasa i saute. E puke foki ne latou a mamoe katoa, pulumakau, mo asini, kae seai eiloa se mea e fakatoe mo tino Isalaelu.

⁵Ka o'mai latou mo olotou pulumakau mo faleie, ko oko eiloa i te uke e pela mo ne seakelise. A latou mo olotou kamela ko se maua o lau i te uke. Ne o'mai latou o fakamasei te fenua,

⁶ka ko Isalaelu ko se maua o fai se mea.

⁷Tena, ne ka'laga ei a tino Isalaelu ki te Aliki mō se fesoasoani,

⁸kae ne uga mai ne te Aliki te pelofeta tela ne vau mo te fekau mai i te Aliki te Atua o Isalaelu penei: “Ne aumai ne au a koutou keatea mai te fakapologa i Aikupito.

⁹Ne fakasao ne au a koutou mai tino Aikupito, pela foki mo tino konei ne taua koutou i konei. Ne afuli keatea ne au latou i te taimi ne olo atu ei koutou, kae ne tuku atu ne au mo koutou te fenua.

¹⁰Au ne fai atu ki a koutou, i au ko te Aliki te otou Atua, kae ke se tapuaki atu koutou ki atua o Amoli, tenei e nofo koutou i te lotou fenua. Ka ko koutou ne seki fakalogo mai ki a au.”

¹¹Tena ne vau te agelu a te Aliki ki te fa'kai o Ofala, kae sagasaga i lalo o te lakau ko te oka, tela e o Ioasa se tagata i te kaukaiga o Apiesa. A tena tama tagata ko Kitiona e tuki saito i te koga fai uaina, ko ia ke se lavea ne tino Mitiana.

¹²Ne fanatu te agelu a te Aliki ki a ia kae fai atu penei, “A te Aliki e fakatasi atu ki a koe, i a koe se tagata toa kae malosi!”

¹³Muna a Kitiona ki te agelu, “Tou malu, ai a e tupu ei a fakalavelave konei ki a matou, manafai te Aliki e fakatasi mai eiloa ki a matou? Kae ko fea a mea fakaofoofogia kola e fakamatala mai sale ne omotou tamana, kola e fai sale ne te Aliki, i te aumaiga ne ia o matou ke atea mai Aikupito. Matou nei ko tiaki ne te Aliki ki te pulega a te kau Mitiana.”

¹⁴Tena ne fakatonu atu ei te Aliki ki a ia penei, “Fano o fakasao Isalaelu mai tino Mitiana i tou malosi katoa. Ko au tenei e uga atu ne au a koe.”

¹⁵Ne tali atu Kitiona, “E mafai pefea ne au o fakasao Isalaelu? A te kaukaiga o matou ko te toe kaukaiga vaivai eiloa i te matakaiga o Manase, ka ko au ko toe tino tafa ki lalo eiloa i te motou kaiga.”

¹⁶Ne tali atu te Aliki penei, “E mafai eiloa o fai ne koe, i au e fesoasoani atu ki a koe. Ka 'ta ne koutou a tino Mitiana e pela eiloa me 'ta ne koutou se tagata e tokotasi.”

¹⁷Ne tali atu Kitiona, “Kafai e fiafia koe ki a au, tuku mai se fakailoga e iloa ei ne au i a koe ko te Aliki eiloa.

¹⁸Fakamolemole sa fano mua, ke aumai mua ne au se taulaga meakai ki a koe.” Muna a te Aliki, “Au e faka'tali eiloa ke foki mai koe.”

¹⁹Tena ne fanatu ei Kitiona ki loto i tena fale, tunu aka ne ia te tamā kouti kae palu ne ia se falaoa ki falaoa e sefulu kilokalame, kae seai se isi e fai ki ei. Ne tuku ne ia te kano manu ki se kete mo tena sua ki te ulo, ave ei ne ia ki te agelu a te Aliki i lalo o te lakau ko te oka, tuku atu ei ne ia ki ei.

²⁰Ne fakatonu atu te agelu ki a ia penei, “Tuku te kano manu mo te falaoa ki luga i te kaupapa, kae ligi atu te sua tena i luga i ei.” Ne fai eiloa ne Kitiona te mea tena.

²¹Tena, ne gasue atu te agelu a te Aliki, o fakapatele te kano manu mo te falaoa ki te mata o te tokotoko tela e puke i ona lima. Ne oso mai te afi mai loto i te kaupapa, tena ne sunu katoa ei a te kano manu mo te falaoa tena. Tena, ko te agelu eiloa ko galo atu.

²²Ne iloa aka ei ne Kitiona me ko te agelu a te Aliki tela ne matea ne ia, tela ne fai aka ei a ia mo te mataku penei, “Te Aliki Maluga! Ko oti ne lavea ne au tau agelu ki oku mata!”

²³Kae ne fai atu te Aliki ki a ia penei, “Ke toka tou loto, sa mataku. A koe e se mate.”

²⁴Ne faite ne Kitiona se fata-fai-taulaga i kona ki te Aliki, kae fakaigoa ne ia, “Te Aliki e o ia te Filemu.” Tena eiloa koi tu mai i Ofala, kae e o te kaukaiga o Apiesela.

²⁵I te po tena, ne faipati atu te Aliki ki a Kitiona penei, “Puke mai se pulumakau tagata a tou tamana, mo se isi pulumakau tagata ko fitu tausaga, ofa ki lalo a te fata-fai-taulaga a tou tamana ki a Paala, kae lepe ki lalo a te fakailoga o te atua fafine ko Asaila, tena e tu i ona tafa.

²⁶Faite se fata-fai-taulaga lei ki te Aliki tou Atua, i luga i te koga maluga tenei. Ka oti ko puke mai ei te lua o pulumakau tagata,[5] ko sunu katoa ei ke fai mo taulaga, kae fakaaoga ne koe a te fakailoga o te atua ko Asaila, tela ne lepe ne koe ki lalo, ke fai mo fafie o tau taulaga.”

²⁷Tena, ne puke mai ne Kitiona e tinogafulu ana tavini, fai eiloa ne ia te mea e manako ki ei te Aliki. A ia e mataku i ona kaiga mo tino o te fa'kai tena, manafai e fai ne ia i te ao, tela la, ne fai ei ne ia i te po.

²⁸I te alaakega o tino i te fa'kai foliki tena i te taeao o te sua aso, ne matea atu ne latou i te fata-fai-taulaga ki te atua ko Paala, mo te fakatusa o Asaila ko oti ne fakamasei, ka ko te lua o pulumakau tagata e takato mai ko paku i luga o te fata-fai-taulaga tena ne faite i kona.

²⁹Ne fakatau fesilisili latou penei, “Ko oi ne fai ne ia te mea tenei?” Ne sukesuke ne latou, kae maua aka nei ko Kitiona, te tama a Ioasa

³⁰Ne fai atu latou ki a loasa penei, “Aumai tau tama tagata ki tua nei ke tamate! Ne ofa ne ia te fata-fai-taulaga ki a Paala, kae tule ki lalo te fakatusa o Asaila tena e tu i ona tafa.”

³¹Kae ne fai atu a Ioasa ki a latou penei, “A koutou na e kau i a Paala? A koutou na e mai o puipui a ia? So se tino e kau i a Paala e se oko ki te taeao. Kafai a Paala se atua, ke taumafai la o pulu a ia eiloa. Ko tena fata-fai-taulaga tena ne fakamasei.”

³²Tena, mai i te taimi tena, a Kitiona ko fakaigoa ki a Ielupaala,[6] me i a Ioasa ne fai penei, “Tuku ei a Paala ke pulu a ia ne ia eiloa, me ko tena fata-fai-taulaga tena ne fakamasei.”

³³Ne maopoopo a tino Mitiana katoa, tino Amaleka, mo matakaiga o te vao, olo atu ei ki te sua feitu o te Vaitafe o Iolitana, kae ma'nava i te Vanu o Ieseleelu.

³⁴Ne ulufia Kitiona ne te agaga o te Aliki, tela ne fakatagi ei ne ia te pu o fakamaopoopo te kaukaiga o Apiesa ke tau'tali atu i a ia.

³⁵Ne uga ne ia ana fekau ki vaega e lua o Manase ke tau'tali atu i a ia. Ne uga ana fekau ki matakaiga o Asela, Sepulona mo Nafatali, kae ne olo atu foki latou o kau ki a ia.

³⁶Tena ne fai atu ei mo Kitiona ki te Atua penei, “A koe ne fai mai me ka fakaaoga ne koe a au ke fakasao a Isalaelu.

³⁷Kiloke, ka tuku ne au ne mu vulu ki te koga tela e tuki saito sale ei matou. I te tafataeao, kafai e matea atu te sau i luga fua i vulu kae se i luga i te laukele, tena ka iloa ei ne au me ka fakaaoga eiloa ne koe a au o fakasao Isalaelu.”

³⁸E pena eiloa te mea ne tupu. I te alaakega o Kitiona i te tafataeao, ne kumi ne ia a vulu kae sali mai te vai tela tai fonu eiloa te tama pola foliki.

³⁹Tena ne fai atu ei a Kitiona ki te Atua, “Sa ita ki a au; talia mai ke toe faipati atu au. Fakamolemole, toe tasi te faiga ki te vulu. I te taimi tenei, ke malo te vulu, kae ke siu te laukele.”

⁴⁰I te po tena, ne fai eiloa ne te Atua a te mea tena. I te tafataeao, ne malo te vulu ka ko te laukele ne siu i te sau.