Read Te Tusi Tapu I Te Gana Tuvalu Lomiga Lua FAMASINO 8 Bible Online

FAMASINO 8 - Te Tusi Tapu I Te Gana Tuvalu Lomiga Lua bible

FAMASINO 8

¹Ne fai atu a tino Efalaima ki a Kitiona penei, “Ai a e seki ka'laga mai ei koutou ki a matou i te taimi ne olo ei koutou o taua ki te kau Mitiana? Ai a ko fai ei matou penei ne koutou?” Ne mui'mui malosi eiloa latou ki te mea tena.

²Kae ne fai atu Kitiona, “A te mea ne fai ne koutou e sili atu i te mea tenei ne fai ne au. A te mea foliki tena ne fai ne koutou tagata o Efalaima e sili atu i te mea ne fai ne tagata katoa i toku kaukaiga.

³ Mai i te 'mana o te Atua ne tamate ei ne koutou a aliki e tokolua o Mitiana, ko Olepa mo Seepa. Se a te mea ne fai ne au e sili atu i te mea tena ne fai ne koutou?” I te faiatuga ne ia o muna kona, tena ne se kaitaua malosi ei latou.

⁴I te taimi tenei, a Kitiona mo tena toluselau tagata ko oti ei ne oko ki te Vaitafe o Iolitana kae ko oti foki ne olo ki te sua feitu. Ko oko eiloa i olotou fita, kae afuli eiloa ne latou te fili.

⁵I te okoatuga o latou ki Sukota, ne fai atu ei a ia ki tagata o te fa'kai tena penei, “Fakamolemole, aumai aka ne falaoa ma oku tagata. Ko oko eiloa i te vaivai o taku kau, kae konei matou e olo o afuli a Sepa mo Salemuna, ko tupu o tino Mitiana.”

⁶Kae ne fai mai a takitaki o Sukota penei, “Ai a ka sona avatu ei ne matou ne meakai ma tau kautau? Tena seki maua mai ne koutou a Sepa mo Salemuna.”

⁷Tena ne fai atu ei a Kitiona penei, “Ko lei! Kafai ko maua ne au a Sepa mo Salemuna i te fesoasoani o te Aliki, ko koutou ka kini ne au ki lakau talatala o te vao!”

⁸Ne oko atu a Kitiona ki Penueli kae toe fakamolemole atu ki tino i kona ki ne meakai, ka ko te tali a latou e pela foki mo te tali a tino Sukota.

⁹Tena ne fai atu ei a ia ki a latou penei, “Au e toe foki mai mo te saogalemu, kae ka ofa ne au otou taoa ki lalo!”

¹⁰A Sepa mo Salemuna mo te la kautau e nofo i Kalakolo. E sefulu lima afe eiloa tagata ne toe mai i te kautau a te kau o te vao, kae selau luasefulu afe ne mate.

¹¹Ne fanatu Kitiona i te auala i kautafa o te vao, i te feitu ki te saegala o Nopa mo Iokopea, ko te mea eiloa ko tau fakapoi atu ki te fili.

¹²Ne tele te ava tupu o Mitiana, ko Sepa mo Salemuna, kae ne afuli eiloa laua ne Kitiona, maua mai eiloa, ka ko te kautau a laua ko tele valevale i te ma'taku.

¹³I te fokimaiga o Kitiona mai te taua, ne ui mai i te Auala o Helesi,

¹⁴maua ei ne ia se tamataene mai Sukota, fakafesili ei ne ia. Ne tusi ne te tamataene tena ki a Kitiona a igoa o te tinofitu mo te tokofitu tagata ma'luga eiloa i Sukota.

¹⁵Tena ne fanatu ei a Kitiona ki tagata o Sukota kae fai atu penei, “E masaua ne koutou te taimi ne ita ei koutou ma fesoasoani mai ki a au? A koutou ne fai mai me e se mafai ne koutou o aumai ne meakai ma taku kautau me e seki maua ne au a Sepa mo Salemuna. Konei la ko maua nei ne au!”

¹⁶Tena ne puke mai ne ia a lakau talatala i te vao o fakasala ki ei a takitaki o Sukota.

¹⁷Ne ofa foki ne ia te taoa o Penueli, kae tamate foki ne ia a tagata i ei.

¹⁸Ne fesili atu a Kitiona ki a Sepa mo Salemuna, “Ko oi a tino kola ne ta ne koulua i Tapola?” Ne tali mai laua penei, “E pela eiloa mo ou foliga — a latou katoa e pela me ne tama a se tupu.”

¹⁹Muna a Kitiona, “A latou kona ko oku taina ko tama a toku matua tonu. Au e tauto atu me moi ne seki tamate ne koutou oku taina, e penei e se tamate foki koulua ne au.”

²⁰Tena, ne fai atu ei Kitiona ki tena tama matua ko Ietela “Tamate atu te tokolua kona!” Ne seki tata te pelu a Ietela me i a ia koi foliki.

²¹Tena ne fai atu ei a Sepa mo Salemuna ki a Kitiona penei, “Vau koe o tamate maua. Ko te tino ko tagata e fai ne ia te galuega a tagata.” Tena, ne tamate ei laua ne Kitiona, kae puke aka mo mea fakagaligali kola i ua o la kamela.

²²I te otiga o mea kona, ne fai atu ei a tino Isalaelu ki a Kitiona penei, “A koe ko fai mo takitaki o matou, ko koe mo tino e tupu mai i a koe. Ko oti ne fakasao ne koe matou mai tino Mitiana.”

²³Ne tali atu Kitiona, “E se talia ne au ke fai au mo takitaki o koutou, io me ko taku tama tagata. Ko te Aliki te takitaki o koutou.”

²⁴Ne toe faipati atu a ia penei, “Talia mai taku fakamolemole tenei. A ligi kola ne puke ne koutou i tino Mitiana ke aumai ki a au.” A tino Mitiana, pela mo tino o te vao, e fai a ligi aulo o latou i olotou taliga.

²⁵Ne tali mai a tino Isalaelu penei, “E fiafia lasi matou o avatu a ligi kona ki a koe.” Tena ne fola ne latou se laugatu kae ne o'mai katoa a tino o tuku ki luga i ei a ligi aulo kola ne puke ne latou.

²⁶A te mafa o ligi aulo ne maua ne Kitiona e tusa mo te luasefulu kilokalama, e se aofia ei a mea fakagaligali, malele, mo gatu kulakula kola ne pei ei a tupu o Mitiana, pela foki mo 'kola o la kamela.

²⁷Ne faite ne Kitiona se tupua mai te aulo, tuku ei ne ia i tena fa'kai ko Ofala. Ne fulitua atu katoa a tino Isalaelu ki te Atua, kae olo atu o tapuaki ki te tupua tena. A te mea tena se malei ki a Kitiona mo tena kaiga.

²⁸Tena, ne takavale ei Mitiana i tino Isalaelu kae ko se toe fai mo fakalavelave. Ne filemu te fenua i tausaga e fasefulu ke oko eiloa ki i te taimi ne mate ei Kitiona.

²⁹Ne foki atu Kitiona ki tena fa'kai, nofo ei i kona.

³⁰E tusa mo te tinofitu o ana tama tagata, me e tokouke ana avaga.

³¹E isi foki sena avaga fakasalasala i Sekema; tela ne fai tena tama i ei, fakaigoa ne ia ko Apimeleko.

³²A Kitiona, te tama a Ioasa ne mate ka ko matua eiloa kae ne tanu i te koga tanu mate a tena tamana ko Ioasa i Ofala, te fa'kai foliki o te kaukaiga o Apiesa.

³³I te mateatuga o Kitiona, ne toe fulitua te fenua o Isalaelu ki te Atua o tapuaki ki a Paala. Ne fai ne latou a Paala o te Feagaiga mo atua o latou,

³⁴kae ko se tavini lele eiloa ki te Aliki te lotou Atua, tela ne fakasao sale ne ia a latou mai olotou fili i olotou tafa.

³⁵E se fakafetai latou ki te kaiga o Kitiona e tusa mo mea gali ne fai ne ia mō tino Isalaelu.