Read Te Tusi Tapu I Te Gana Tuvalu Lomiga Lua IUTA 1 Bible Online

IUTA 1 - Te Tusi Tapu I Te Gana Tuvalu Lomiga Lua bible

IUTA 1

¹Mai i a Iuta, te tavini a Iesu Keliso, ko te taina o Iakopo — Ki a latou kola ne kalagagina ne te Atua, kola e ola i te alofa o te Atua te Tamana mo te puipuiga a Iesu Keliso:

²Ke i a koutou te alofa 'nau, te filemu, mo te alofa i tena katoatoa.

³Aku fagasele, ona ko toku loto naunau o tusi atu ki a koutou e uiga ki te tou fakaolataga e tasi, ko iloa ake ne au me se mea 'tau o tusi atu ki a koutou o fakamalosi atu ke finau koutou mō te fakatuanaki tela ko oti ne tuku mai ne te Atua mō Kelisiano katoa.

⁴E isi ne tino se amio atua ne ulu 'funa mai ki loto ki te tou fakatasiga faka-kelisiano, ko 'fuli ne latou a te motou talaiga e uiga ki te alofa tauanoa o te tou Atua ke fetaui mo olotou uiga masei, kae 'teke foki ne latou a Iesu Keliso, ko te tou Pule mo te tou Aliki eiloa e tokotasi. Ka ko leva foki ne folafola mai ne te Tusi a te fakasalaga ne maua ne tino e amioga pena.

⁵Me e ui eiloa i te iloa 'lei ne koutou a te mea nei, kae e manako au o fakamasaua atu ki a koutou i te fakaolaga ne te Aliki[1] a tino Isalaelu mai te fenua ko Aikupito, kae fakamuli ake ne tamate ne ia a tino kola ne se talitonu.

⁶Ne fakatonu ne te Atua ana agelu ke ga'lue mō ia i se koga, kae ne se talia ne latou, kae olo foki keatea mai te koga tena. Ko oti ne tausi fakapagota latou i te pouliga i lalo, kae saisai i kona ki saisaiga tumau ke oko ki te Aso lasi o te fakamasinoga.

⁷Ke masaua ne koutou a Sotoma mo Komolo, pela foki mo fa'kai i o la tafa, kola ne fai ne latou amioga a agelu masei konei, kae fai foki amioga fina lalolagi. Ka fakapuapuagatia latou i te fakasalaga i te 'sunu ki te afi se gata mai, ko te fakaakoakoga tena mo tino katoa.

⁸E pena foki eiloa a tino kola e se amio atua, kola ne ulu 'funa mai ki loto i te tou fakatasiga faka-kelisiano, kola ne agasala i te amio fakasotoma; ko taku faka'se ne latou a te pule a te Atua, e muna masei foki ki tino 'malu i luga i te lagi.

⁹A Mikaele te agelu pule ne seki muna masei eiloa pena, i te la fakakinauga mo te Tiapolo, me ko oi ka fai ma ia te foitino o Mose, ne seki fia 'po atu eiloa a Mikaele o fakamalaia te Tiapolo ki ne muna'tuku, kae ne fai atu fua, “Ke fakamalaia atu te Aliki ki a koe!”

¹⁰Ka ko tino konei e muna masei ki mea e se iloa ne latou; ka ko mea kona e iloa fua ne latou i te pa'tele ki olotou kili, e pela eiloa mo manu ola e se lava te faka'tau, ka ko amioga ki amioga a manu, ka fakamasei olotou ola.

¹¹Ko oko eiloa i te masei o te lotou fakasalaga! Ne tau'tali latou ki te auala o Kaino; ko tuku atu latou ki te fai o mea 'se ona ko te manako ki tupe, e pela mo Palaamo; ko 'mate latou i te 'teke e pela eiloa mo Kolu ne mate i te 'teke.

¹²A latou e pela eiloa mo ne tino fakatupu fakalavelave i otou 'kaiga fakakaiga i te lotou inu fakatakalialia. E kilo ifo latou mo latou ake eiloa. E pau eiloa latou mo kaumana e agina i te matagi, kae seai ne vaiua e 'to mai ei. E pau eiloa latou mo lakau e se 'fua i aso o te taukai; me ko oti ne unu olotou tafito keatea, ko 'mate eiloa.

¹³E pau eiloa latou mo galu fakama'taku o te tai, i olotou amioga fakalumaluma e foliga e pela mo ne takapiaga o galu. E pau eiloa latou mo fetu e se tumau i se koga e tasi, kola ko leva ne fakatoka ne te Atua a te koga tumau ki te se gata mai mo latou i te pouliga i lalo.

¹⁴A Enoka, ko te fitu[2] o kautama mai i a Atamu, ko ia tena ko leva ne 'valo e uiga mo latou: “Ka vau te Aliki mo ana agelu tapu e fia ni afe;

¹⁵e aumai ne te fakamasinoga ki a latou katoa, o fakasala a tino agasala e se amio atua e tusa mo amioga masei ne fai ne latou, pela foki mo pati masei ne faipati ne tino e se amio atua kona e uiga ki te Atua!”

¹⁶A tino konei e mui'mui faeloa, kae 'ti foki ne latou te agasala ki nisi tino; e tautali eiloa latou i olotou manakoga ma'sei; e tavae eiloa latou ki a latou, kae tavae fakaloiloi foki ne latou a nisi tino ko te mea ke maua mai ei ne olotou mea.

¹⁷Oku taugasoa, ke se puli i a koutou, a te mea ne taku atu ki a koutou i aso ko teka ne apositolo a te tou Aliki ko Iesu Keliso.

¹⁸Me ne fai atu ki a koutou, “Kafai e oko mai aso fakaoti, ka o'mai ne tino, ko tino kona ka fakatauemu ki a koutou, ko latou kona e tautali i manakoga masei olotou foitino.”

¹⁹Ko latou konei e fakatupu ne latou te mavaevae, kae pulea eiloa latou ne olotou uiga faka te lalolagi, kae se pulea ne te Agaga.

²⁰Ka ko koutou e oku taugasoa, ke puti ake eiloa koutou i te otou fakatuanaki e sili i te tapu. 'Talo i te mana o te Agaga Tapu,

²¹kae tausi koutou i te alofa o te Atua, ka koi fakatalitali koutou ki te tou Aliki ko Iesu Keliso, ke tuku atu ne ia a te ola se gata mai i tona alofa 'nau.

²²Fakaasi atu te alofa 'nau ki a latou kola e fakalotoloto lua e uiga ki te fakatuanaki.

²³Fakasao latou, i te 'futi fakavave ne koutou a latou mai te afi i mone. Fakaasi foki te alofa 'nau ki tino amio fakasotoma, kae fakaeteete i a koutou mana pisia i olotou uiga fakasotoma. E 'tau o 'teke atu ne koutou olotou faiga masei, kae a'lofa la ki ei fakamaoni.

²⁴Ki a ia tela e mafai ne ia o tausi koutou ke se paku, kae tuku atu koutou ki mua o tena 'malu i te seai ne 'se mo te fiafia lasi.

²⁵Ke i te Atua e tokotasi te tou Fakaola, te vikiga, te 'malu, te malosi mo te pule e alatu i a Iesu Keliso te Tou Aliki, e kamata mai i taimi ko teka, nei, ke oko ki te se gata mai, ki te se gata mai eiloa! Amene.