Read Te Tusi Tapu I Te Gana Tuvalu Lomiga Lua FAKAASIGA 11 Bible Online

FAKAASIGA 11 - Te Tusi Tapu I Te Gana Tuvalu Lomiga Lua bible

FAKAASIGA 11

¹Ne tuku mai ki a au a te lakau fuafua, e pela mo se tokotoko, mo te muna penei: “Tu ki luga o fua te fale tapu o te Atua mo te fata faitaulaga, kae faitau foki te aofaki o latou kola e tapuaki i te fale tapu.

²Sa fuafua ne koe a koga i tua o te fale tapu, me ko oti ne tuku atu ki tino pouliuli kola ka fakamasei ne latou te Fa'kai Tapu i te fasefulu lua masina.

³Ka uga atu ne au aku molimau e tokolua, e pei ki gatu masae'sae; kae ka folafola atu ne laua te muna a te Atua i aso e afe lua selau ono sefulu.”

⁴A molimau konei e tokolua, ko olive e lua mo moli e lua kola e 'tu i mua o te Aliki o te lalolagi.

⁵Kafai se tino e taumafai o fakamasei laua, ka oso mai te afi mai i o la gutu o fakamasei o la fili; tela la so se tino e taumafai o fakamasei laua, e mate eiloa a ia.

⁶E isi foki se pule i a laua o 'pono te lagi ko te mea ke mo a ma isi ne vaiua e 'to i taimi e folafola atu ei ne laua te muna a te Atua. E isi foki se pule i a laua o fakaliu toto a vaipuna; e isi foki te pule i a laua o 'ta a te lalolagi ki mala valevale, e pela eiloa mo te mea e loto a laua ki ei.

⁷Kafai ko oti ne folafola atu ne laua te muna, a te manu tela e vau mai mone ka tau ki a laua. Ka fakatakavale laua ne te manu kae tamate foki,

⁸ko ta'kato ei o la foitino i te auala o te fa'kai takutakua, tela ne fakasataulo ei te la Aliki. A te igoa fakatusa o te fa'kai tena ko Sotoma io me ko Aikupito.

⁹A tino o fenua valevale mai mata kaiga takitasi, 'gana mo fenua, ka kilo'kilo ki o la foitino i te tolu mo te āfa aso, kae ka se talia foki ne latou ke tanu o la foitino.

¹⁰Ka fia'fia a tino o te lalolagi i te 'mate o laua nei. Ka fakamanatu, kae fai meaalofa te sua tino ki te sua tino, i te mea ne aumai ne te tokolua pelofeta kona ki tino o te lalolagi a puapuaga e uke.

¹¹Mai tua o te tolu mo te āfa aso, ne vau ei te manava ola mai te Atua o ulu ki loto i a laua, tela ne toe mafai ei laua o 'tu ki luga, ko tino katoa kola ne 'kilo ki a laua ko oko eiloa te lotou ma'taku.

¹²Lagona ei ne te tokolua pelofeta a te leo mai te lagi e fai mai penei: “O'mai ki luga nei!” Ne kilo'kilo atu o la fili, i te la oloakega ki luga i te lagi i te kaumana.

¹³I mu taimi eiloa kona ne poko mo te mafuie lasi; e tasi vae sefulu o te fa'kai ne malepe kae tusa mo te fitu afe tino ne 'mate i te mafuie. Ka ko tino kola ne 'toe ne ma'taku, kae ne tavae atu latou ki te 'malu sili o te Atua o te lagi.

¹⁴Ko palele atu nei a te lua o mea fakamataku; kae kiloke, a te tolu o mea fakamataku ka oko mai i se taimi pili mai nei.

¹⁵Ne ili te pu a te tokofitu o agelu, kae e isi ne leo 'lasi e fai'pati i te lagi penei: “A te pule fakatupu i te lalolagi ko fai nei mo te tou Aliki mo tena Keliso, kae ka pule a ia ki te se gata mai, ki te se gata mai eiloa!”

¹⁶Ka ko te tinolua mo te toko fa o toeaina kola e 'nofo i olotou nofogaaliki i mua o te Atua, ne totuli kae pu'nou ifo kae tapuaki atu ki te Atua,

¹⁷olotou muna: “Te Aliki te Atua e o ia te Malosi Katoatoa, tela e ola nei, kae ne ola foki mai te kamataga! E fakafetai atu matou i te mea ko oti ne fakaaoga ne koe tou mana sili Ko oti foki ne kamata tau pule!

¹⁸A tino pouliuli ko 'fonu i te ita, Me i tou kaitaua ko oko mai, Mo tino 'mate foki e fakamasinogina; Ko te taimi e tuku atu ei te taui ki au tavini ko pelofeta, Pela foki mo ou tino katoa, tino ma'luga io me ko tino ma'lalo Mo tino foki e ma'taku ki a koe Ko te taimi tena e fakamasei ei latou kola e fakamasei ne latou te lalolagi!”

¹⁹Ko matala nei a te fale tapu o te Atua i te lagi, ka ko matea atu foki te pusa o te feagaiga tela e tausi i ei a te Tulafono a te Atua i tona fale tapu. Ne 'lapa uila, ne lagona a leo, pa'pa o fa'tili, te lūlū o mafuie pela foki mo te 'to ifoga o te vaiua aisa.