Read Te Tusi Tapu I Te Gana Tuvalu Lomiga Lua FAKAASIGA 12 Bible Online

FAKAASIGA 12 - Te Tusi Tapu I Te Gana Tuvalu Lomiga Lua bible

FAKAASIGA 12

¹Ne sae mai te fakailoga lasi i te lagi: e isi se fafine, mo tona gatu ko te la, mo te masina mai lalo i ona vae, mo te foualiki e 'mau i ei a fetu e sefulu lua e tuku i luga i tona ulu.

²Ko pili eiloa a ia o fanau, ka ko te 'mae o te fi'ta o te fanau ne fai ne ia te fafine ke tagi.

³Ne sae mai foki te sua fakailoga i te lagi, ko te talako kula kae lasi. E fitu ona ulu kae sefulu ona suki, kae tofu eiloa te ulu mo te foualiki.

⁴Ne seu ne ia te tasi vaetolu o fetu keatea mai te lagi ki tona velo, kae pei ifo ki lalo i te lalolagi. Ne tu a ia i mua o te fafine tela ka fai o fanau, o kai te tamaliki manafai e fanau mai.

⁵Ne fanau ne te fafine te tamaliki tagata, tela ka pule ne ia fenua katoa ki te tokotoko fiti tela ko te fakailoga o te pule saua. Ka ko te tamaliki ne puke fakavave mai keatea mai tena matua kae avatu ki te Atua mo tena nofogaaliki.

⁶Ne tele te fafine ki te koga lavaki. Ne fakatoka ne te Atua se koga mo ia i kona, tela ka tausi faka'lei ei a ia i aso e afe lua selau ono sefulu.

⁷Ne tau te taua i te lagi. Ko Mikaele mo ana agelu ne taua mo te talako mo ana agelu.

⁸Kae ne takavale te talako, kae ne se toe talia a ia mo ana agelu ke toe 'nofo i te lagi.

⁹Ne tuli keatea te talako lasi! Ko ia ko te gata taumua eiloa tela e igoa ki te Tiapolo io me ko Satani, tela ne fakaloiloi ne ia te lalolagi katoa. Ne pei ifo a ia fakatasi mo ana agelu ki te lalolagi.

¹⁰Ne lagona ne au a te leo lasi i te lagi e faipati penei: “Ko oti nei ne oko mai te fakaolataga a te Atua! Ko oti foki ne fakaasi mai ne te Atua tena mana faka‐Tupu! Nei ko oti foki ne fakaasi ne tena Keliso tena pule. Me i te tino tela ne 'moli ne ia o'tou taina, tela e tu nei i mua o te Atua o 'moli i te ao mo te po ke sala latou, ko oti nei ne pei ifo ki lalo.

¹¹Ne manumalo o'tou taina ona ko te toto o te Tama Mamoe tela ko Iesu pela foki mo te muna tonu ne folafola ne latou; ka ko toka foki latou o ofo atu olotou ola mo ia, ke oko ki te mate.

¹²Tela la, ke fiafia te lagi, pela foki mo tino katoa e 'nofo i ei, kae kalofa eiloa i te lalolagi mo te tai! I te Tiapolo ko oti ne fanaifo ki a koulua, ka ko oko eiloa i te kaitaua, me e iloa ne ia ko se leva ona aso i te lalolagi.”

¹³I te iloaga ne te talako i a ia ko oti ne pei ifo ki lalo i te lalolagi, kamata eiloa a ia o salasala te fafine tela ne fanau mai ne ia te tamaliki tagata o fakasaua ki ei.

¹⁴Ne tuku ki te fafine a kapakau e lua o te aeto lasi, ke lele atu ei a ia ki tona koga nofo tumau i te koga lavaki, tela ka tausi faka'lei ei a ia i te tolu mo te afa tausaga, ke malu 'lei eiloa a ia mai te gata.

¹⁵Ne luaki atu ne te gata a vai i tona gutu ke fai mo vaitafe e tautali atu i tua o te fafine, ko te mea ke tapea a ia keatea i te lofiaga.

¹⁶Ka ko te laukele ne fesoasoani ki te fafine; ne fakamaga tona gutu kae folo ne ia te vai tela e vau mai te gutu o te talako.

¹⁷Ko ita te talako ki te fafine, fano ei a ia o taua ki fanau katoa a te fafine, ko latou katoa kola e faka'logo ki fakatonuga a te Atua, kae fakamaoni foki ki te mea tonu e fakaasi mai ne Iesu.

¹⁸Ka ko te talako ne tu[4] i te tafatai.