Read Te Tusi Tapu I Te Gana Tuvalu Lomiga Lua FAKAASIGA 14 Bible Online

FAKAASIGA 14 - Te Tusi Tapu I Te Gana Tuvalu Lomiga Lua bible

FAKAASIGA 14

¹Ne kilo atu au, matea ei ne au a te Tama Mamoe ko Iesu e tu mai i te Mauga o Siona; kae tusa mo te toko selau fasefulu fa afe tino e 'tu mai mo ia, kola e tusi ei o la igoa mo tona Tamana i olotou lae.

²Ne lagona ne au a te leo mai te lagi e pela mo te 'gulu o vai e uke e tafe ki te koga 'poko, pela foki mo te pa'pa mai o fa'tili. A te leo ne lagona ne au e pela eiloa mo pese e fakatagitagi mai ne tino ta kitala.

³Ne 'tu fakafeagai ki te nofogaaliki ko manu fekai e fa mo toeaina, kae ne usu ne latou a te pese fou tela e seai eiloa se tino e mafai o tauloto ne ia, vagana fua a latou kola e toko selau fa sefulu fa afe tino, kola ko oti ne fakaolagina mai te lalolagi.

⁴Ko latou konei e se fia a'vaga me ma'nako faeloa o tausi olotou olaga ke 'ma mai fafine. E tau'tali eiloa i te Tama Mamoe i so se koga e fano a ia ki ei; ko oti ne fakaolagina latou mai te tokoukega o tino, ka ko latou foki ko tino muamua e tuku atu ki te Atua mo te Tama Mamoe.

⁵E seki iloa lele eiloa ke fai'pati 'loi; e seai foki ne olotou 'se.

⁶Ne matea ne au te sua agelu e lele i luga loa i te lagi, o folafola atu te talaiga se gata mai tela ko te Tala 'Lei ki tino o te lalolagi, ki fenua katoa mo matakaiga, ki 'gana katoa mo tino.

⁷Ne faipati ake mo te leo lasi: “Ma'taku ki te Atua, kae tavae atu ki tona sili! Me ko oko mai te taimi e fakamasino ei ne ia a tino. Ifo o tapuaki ki a ia, ifo ki mua o te Atua, tela ne fai ne ia te lagi, te lalolagi, te tai, mo vaipuna!”

⁸Ne tautali atu te lua o agelu i tua o te agelu muamua, kae fai ake ana muna: “Ko pakū a ia! Ko pakū a Papelonia takutakua! Ne tuku atu ne ia te uaina ki tino katoa, kae fai foki ke inu i ei, ko te uaina masei o ona manakoga fina lalolagi!”

⁹Ne tautali atu foki i o la tua a te tolu o agelu, kae faipati ake mo te leo lasi penei: “So se tino e tapuaki ki te manu fekai mo tena fakatusa, kae mau foki te fakailoga o te manu fekai i tona lae io me ko tona lima,

¹⁰e inu a ia ki te uaina a te Atua, ko te kaitaua tena o te Atua, tela ne fakamaligi ne ia mo tena malosi katoatoa ki loto i te ipu o tena kaitaua! Ko latou katoa kola e fai ne latou te mea nei, ka fakapuapuagatia ki te afi mo te pauta ka i mua o agelu tapu mo te Tama Mamoe.

¹¹A te au o te afi tela ka fakapuapuagatia ei latou, ka tumau tena au ake ki luga ke oko eiloa ki te se gata mai ki te se gata mai eiloa. E seai eiloa se filemu e maua i te ao mo te po mō latou kola e tapuaki ki te manu fekai mo tena fakatusa, io me ko latou foki kola e maua ne latou te fakailoga o tena igoa.”

¹²A te mea nei se kalaga ki Kelisiano ke kufaki, ko latou konei e faka'logo ki fakatonuga a te Atua kae fakamaoni foki ki a Iesu.

¹³Lagona ei ne au te leo mai te lagi e faipati penei: “Tusi te mea nei: Amutia a tino kola ko 'mate i aso nei ona ko te galuega a te Aliki!” Ne tali mai te Agaga, “Ao, e tonu. E maua ne latou te malologa mai te olaga nei mai olotou galuega fi'ta; ko maua ei ne latou te taui o olotou galuega.”

¹⁴Ne kilo atu au, matea ei ne au a te kaumana kena, mo te mea e pela me se tino e sagasaga i luga i te kaumana, mo te foualiki aulo i luga i tona ulu mo tena naifi kati saito mata'kai e puke i tona lima.

¹⁵Ne fano ki tua te sua agelu mai te fale tapu, kalaga malosi atu ei ki te tino tela e sagasaga i luga i te kaumana, ana muna: “Fakaaoga tau naifi kati saito o kati te saito, me ko oko nei ki te aso kati saito; ko ma'tua saito i te lalolagi, tela ko te kati fakapalele o te lalolagi.”

¹⁶Fakatu ifo eiloa te naifi kati saito a te tino tela e sagasaga i luga i te kaumana ki te lalolagi, o kati fakapalele te lalolagi.

¹⁷Ne matea foki ne au te sua agelu ne vau ki tua mai te fale tapu i te lagi, e isi foki sena naifi kati saito mata'kai.

¹⁸Vau ei foki mo te sua agelu mai i te fata faitaulaga; ko ia tena e pule i te afi. Ne kalaga malosi atu ki te agelu tela e isi tena naifi kati saito mata'kai, ana muna: “Fakaaoga tau naifi kati saito o kati a vine mai i te togavine o te lalolagi, me ko ma'tua a fuagavine!”

¹⁹Fakatu atu ei ne te agelu tena naifi kati saito ki luga o te lalolagi, kati ei ne ia a fuagavine mai te togavine, kae pei atu ki te mea 'tau sua vine a te Atua, tela ko tena fakasalaga fakamataku.

²⁰Ne 'tau i kona a vine i te mea 'tau sua vine i tua o te fa'kai, sali mai ei mo te toto mai te mea 'tau sua vine, lofia valevale i te toto a te koga tena, e tusa mo te lua selau maila te loa kae lima futu te poko o te lofiaga tena.