Read Te Tusi Tapu I Te Gana Tuvalu Lomiga Lua FAKAASIGA 15 Bible Online

FAKAASIGA 15 - Te Tusi Tapu I Te Gana Tuvalu Lomiga Lua bible

FAKAASIGA 15

¹Ne matea foki ne au a te sua fakailoga lasi mo te fakaofoofogina i te lagi: ko agelu e tokofitu mo mala e fitu. A mea konei ko mala fakaoti eiloa, me ko fakaasiga fakapalele eiloa o te kaitaua o te Atua.

²Ne matea foki ne au te tai e foliga mai pela mo se kilasi, e pulutaki mo te afi. Ne matea foki ne au a latou kola ne manumalo i te manu fekai mo tena fakatusa, mo ia foki tela e fakaasi a tona igoa i te napa, kae e 'tu pili ki te tai kilasi, e puke a kitala kola ne tuku atu ne te Atua ki a latou.

³E usu mai ne latou a pese a Mose te tavini a te Atua, mo te pese a te Tama Mamoe: “Te Aliki, te Atua e o koe te Malosi Katoatoa, Ko oko eiloa i te lasi mo te fakaofoofogina au galuega! Te tupu o fenua katoa, Ko oko eiloa i te tonu mo te sao ou auala!

⁴Ko oi ka se mataku ki a koe, e te Aliki? Ko oi ka 'teke ne ia te folafola atu o tou sili? Me ko koe fua e tapu. E o'mai a fenua katoa O tapuaki i ou mua, Me ko matea 'lei ne tino katoa au faiga amiotonu.”

⁵Mai tua ifo o te mea nei, matea ei ne au a te fale tapu i te lagi ko matala, mo te fale tela e fakaasi ei te iai o te Atua, e tu i loto.

⁶A agelu e tokofitu, kola e 'nofo mo latou a mala fakaoti e fitu, ne o'mai ki tua mai te fale tapu. E pei katoa ki gatu kena kae 'ma, kola e faite ki te laugatu e igoa ki te lino, kae 'sai foki olotou fatafata ki fusi aulo.

⁷E tasi te manu mai manu e fa ne tuku atu ne ia ki agelu e tokofitu a tanoa aulo e fitu, kola e 'fonu eiloa i te kaitaua o te Atua, ko te Atua tela e ola ki te se gata mai, ki te se gata mai eiloa.

⁸Ko fonu a te fale tapu i te au o te 'malu mo te mana o te Atua, kae seai eiloa se tino e mafai o fanatu ki loto i te fale tapu, seiloga ko palele atu eiloa a mala e fitu kola ne aumai ne agelu e tokofitu.