Read Te Tusi Tapu I Te Gana Tuvalu Lomiga Lua FAKAASIGA 18 Bible Online

FAKAASIGA 18 - Te Tusi Tapu I Te Gana Tuvalu Lomiga Lua bible

FAKAASIGA 18

¹Fakamuli ifo, ne matea ne au te sua agelu e fanaifo mai te lagi. E i a ia te pule malosi, ka ko tena gali ko maina ei te lalolagi katoa.

²Ne tagi pakalaga a ia penei: “Ko paku! Ko paku a Papelonia takutakua! Ko 'nofo nei i ei a temoni mo agaga ma'sei, pela foki mo manu eva ma'sei mo te inosia.

³Ne tuku atu ne ia ki a latou faifaiga masei o ona manakoga fina lalolagi ke fai ne latou. A tupu o te lalolagi ne faka'segina katoa ona ko te lotou tautali i ana faiga ma'sei, ka ko tino fai pisinisi o te lalolagi ne gasolo o mauko'loa ona ko tena manako lasi ki te olaga maumea.”

⁴Ne toe lagona ne au te leo mai te lagi e faipati mai penei: “O'mai keatea, oku tino! O'mai keatea mai i a ia! E se 'tau mo koutou o kau fakatasi ki ana agasala, E se 'tau mo koutou o kau fakatasi ki tena fakasalaga!

⁵Me i ana agasala ko fua'tu ki te lagi, Ka ko te Atua e masaua faeloa ne ia ona auala ma'sei.

⁶Ke taui atu ne koutou ana faiga e pela mo ana faiga ki a koutou, Ke toe 'togi atu ne koutou fakalua ki a ia ana mea ne fai mo koutou. Taui atu fakalua te malosi o ana mea ma'sei, kola ne fai mai ki a koutou.

⁷Tuku atu ki a ia te puapuaga mo te fanoanoa lasi E tusa mo te 'malu mo te gali ne fai ne ia ki a ia eiloa. Me faipati ifo eiloa ki a ia penei: ‘Tenei au e sagasaga, ko te tupu fafine! Au se fafine ko mate taku avaga, E se mafai eiloa, o iloa ne au te loto fanoanoa!’

⁸Ona ko te mea nei, ka oko atu katoa a mala o fakasala a ia i te aso e tasi: Ko te masaki, ko te fanoanoa, mo te oge; Ka sunu a ia ki te afi. Me i te Aliki te Atua, tela e fakamasino ne ia a ia e malosi katoatoa.”

⁹A tupu o te lalolagi kola e 'kau ki tona fina lalolagi mo tona manako lasi, ka 'tagi kae 'tagi mautuutu mō te fa'kai, manafai ko matea ne latou te au o te fa'kai ko 'ka.

¹⁰E 'tu 'mao latou, i te mea e ma'taku ki ona puapuaga, kae fai ake penei: “Ko oko eiloa i te fakamataku! Ko oko eiloa i te masei! A te fa'kai takutakua mo te malosi tenei ko Papelonia! Ko oti koe ne fakasala i te itula e tasi!”

¹¹A tino fai pisinisi foki o te lalolagi, ka 'tagi kae fanoa'noa ona ko ia, i te mea ko se toe iai se tino e 'togi ne ia olotou koloa.

¹²Ko seai foki se tino e 'togi ne ia olotou aulo, siliva, fatu tāua mo penina; ko laugatu lino, ko laugatu lanu violeta, ko siliva mo laugatu kula, ko vaega lakau ma'nogi katoa, mo mea kola e faite ki nifo o elefane mo lakau tāua, mo mea e faite foki ki palasi, mo fiti mo fatu tāua.

¹³Ko mea ma'nogi e faite mai i te lakau ko te kinamoni mo mea manogi kesekese, mo sinu ma'nogi e fai ei taulaga, mo sinu e faite mai i te pulu o te lakau ko te mulo mo te lakau ko te lipano; ko uaina mo sinu, ko falaoa mo saito, ko pulumakau mo mamoe, ko solofanua mo ka, pela foki mo pologa mo loto o tino.

¹⁴Ne fai ake a pati a tino fai pisinisi ki te fa'kai takutakua, “A mea 'lei katoa kola ne fia maua ne koe ko 'galo katoa, mo ou koloa mo au mea 'gali 'funa ko seai nei, ka ko se mafai o toe maua ne koe!”

¹⁵Ko tino fai pisinisi kola ne mauko'loa ona ko te lotou fai pisinisi i te fa'kai tena, ka 'tu 'mao mai, i te mea e ma'taku i ona puapuaga. Ka 'tagi kae fanoa'noa,

¹⁶kae fai ake penei: “Ko oko eiloa i te masei! Ko oko eiloa i te matagā o te fa'kai takutakua! E masani o pei a ia ki gatu lino mo gatu violeta kae kula mo gatu aulo, kae ufiufi tona foitino ki teuga aulo, mo fatu tāua mo penina!

¹⁷Kae i te itula fua e tasi, ko 'galo atu katoa i ei ona koloa!” Ko kapeni katoa o vaka mo pasese mo kauvaka, pela foki mo nisi tino kola e maua foki mea e ola ei latou mai te tai, e 'tu 'mao mai,

¹⁸kae 'tagi i te mateaga ne latou te au o tena kaga kae fai ake penei: “E seki iai eiloa se fa'kai e pau mo te fa'kai takutakua tenei!”

¹⁹Ne asu ake ne latou a lefu ki luga i olotou ulu, ko te fakailoga o te lotou loto fanoanoa, kae 'tagi penei: “Ko oko eiloa i te masei! Ko oko eiloa i te masei o te fa'kai takutakua! A ia ko te fa'kai tela ko mauko'loa ei a latou kola e isi ne olotou vaka e fo'lau i te vasa ona ko ana koloa! Ko 'galo atu katoa ana mea i te itula fua e tasi!”

²⁰Fiafia te lagi ona ko tona malaia! Ke fia'fia koutou e Kelisiano, apositolo mo pelofeta! Me i te Atua ko oti ne fakamasino ne ia a ia e tusa mo ana mea ne fai ki a koutou!

²¹Ne puke ne te agelu sili a te fatu lasi e foliga pela mo se fatu solo meakai, kae pei ne ia ki tai, ana muna: “E penei foki eiloa a Papelonia te fa'kai takutakua ma fakamaseigina, ka se toe matea eiloa a ia.

²²E se toe iai ni tino ta'ta kitala, ne tino usu pese, mo tino ili pu, mo tino ili faili, mo tino 'poto i galuega kesekese, mo tino fai meakai e toe maua mai i a koe.

²³Ko seai ne moli e 'ka, e seai foki ne fiafiaga o avaga, ka ko iloa 'lei eiloa ne te lalolagi ou tino fai pisinisi, me ne fakaloiloi ne latou a tino katoa o te lalolagi, ki au vailakau masei.”

²⁴Ko fakasala Papelonia me ne ta ne ia pelofeta mo Kelisiano a te Atua, kola ne maua i loto i te fa'kai. E tonu, ko te toto o latou katoa kola ne tamate i te lalolagi.