Read Te Tusi Tapu I Te Gana Tuvalu Lomiga Lua FAKAASIGA 2 Bible Online

FAKAASIGA 2 - Te Tusi Tapu I Te Gana Tuvalu Lomiga Lua bible

FAKAASIGA 2

¹“Tusi la koe ki te agelu o te Ekalesia i Efeso penei: “Tenei a te fekau mai te tino tela e taofi ne ia a fetu e fitu i tona lima fakaatamai, kae e sasale foki i va o tulaga moli aulo e fitu.

²E iloa ne au au mea ne fai; e iloa foki ne au a tou galue malosi pela foki mo tou kufaki. E iloa foki ne au, me se mafai o fakasaoloto ne koe a tino amio masei, ko oti foki ne tofotofo ne koe a latou kola e fai mai me ne apositolo, kae e se ne apositolo, kae ne maua ake foki ne koe me ne tino 'loi fua.

³E iloa ne au i a koe se tino e loto kufaki, ne puapuagatia foki koe ona ko au, kae e seki takavale foki eiloa koe.

⁴Kae tenei eiloa te mea ko se malie ei au ki a koe: i a koe ko se alofa mai nei ki a au, e pela mo tou alofa i te kamataga.

⁵Ke masaua ne koe te 'mao o tou pakū keatea! Salamo ki a au agasala, kae alofa mai ki a au e pela eiloa mo tou alofa i te kamataga. Kafai e se salamo koe ki au agasala, au e vau ki a koe o 'kave keatea a te tulaga moli tena e i a koe.

⁶Kae tenei te mea e 'lei ei koutou: e ita koutou ki te kau Nikolaitani, e penei foki eiloa mo au.

⁷ “Tela la, ko latou kola e fai'tau ki te tusi tenei, ke na faka'logo la ki muna e fai atu ne te Agaga ki Ekalesia! “Ki a latou kola ne manumalo, e tuku atu ne au a te saolotoga o 'kai ki te fuaga o te lakau o te ola, tela e ola i te Fatoaga a te Atua.”

⁸ “Tusi la koe ki te agelu o te Ekalesia i Semulana penei: “Tenei te fekau mai i a ia tela ko te tino muamua mo te tino fakamuli, tela ne mate kae ne toe ola.

⁹E iloa ne au ou puapuaga; e iloa foki ne au i a koe e mativa, ka ko te tonuga a koe e maumea! E iloa ne au a muna ma'sei ne fai atu ki a koe ne tino kola e fai mai i a latou ne Iutaia, kae e se ne tino Iutaia; a latou kona se potu kau a Satani!

¹⁰Sa mataku ki so se mea ka puapuagatia ei koe. Kiloke, a te Tiapolo ka tofotofo ne ia koutou i te pei o nisi o koutou ki te fale puipui; e tusa mo te sefulu o aso e puapuagatia ei koutou. Fakamaoni eiloa ke oko ki te mate, ko tuku atu ei ne au ki a koe a te foualiki o te ola.

¹¹ “Tela la, ko latou kola e faitau ki te tusi tenei, ke na fakalogo la ki muna e fai atu ne te Agaga ki Ekalesia! “Ko latou kola e maua ne latou a te manumalo, e se toe fakafi'ta latou i te mate fakalua.”

¹²“Tusi la koe ki te agelu o te Ekalesia i Pelekamo penei: “Tenei te fekau mai i a ia tela e i a ia a te pelu e 'kai feitu lua.

¹³E iloa ne au a te koga e nofo koe i ei, ko te koga tela e tu i ei a te nofogaaliki o Satani. E fakamaoni koe ki a au, kae ne seki gata foki eiloa a tou fakatuanaki ki a au ke oko eiloa ki te taimi ne feagai ei koutou mo aso ne tamate ei a Anitipa, ko te tino tela e molimau fakamaoni ki a au, tela ne tamate i te koga e nofo ei a Satani.

¹⁴Kae konei la a nisi mea e se fiafia ei au ki a koe: e isi ne tino i a koutou e tau'tali i akoakoga a Palaamo, tela ne akoako ne ia a Palako i se faiga e mafai ei o agasala a tino Isalaelu, i te 'kai ki meakai ne ofo atu mō tupua, mo te fai o amioga fina lalolagi.

¹⁵E se gata fua i kona, e isi foki ne tino i a koutou e tau'tali i akoakoga a te kau Nikolaitani.

¹⁶Tela la, ke sala'mo koutou mai otou agasala! Kafai e se mafai, ka oko vave atu au ki a koutou o taua mo tino kona, mo te pelu tela ka vau mai loto i toku gutu.

¹⁷ “Tela la, kafai e isi ne otou taliga, ke na faka'logo la ki muna e fai atu ne te Agaga ki Ekalesia. “Ko latou kola e manumalo, ka tuku atu ne au ki a latou se vaega o te manai 'funa. E tuku atu foki ne au ki a latou takitokotasi te fatu kena, tela e tusi i ei a te igoa fou, tela e seai eiloa se tino e iloa ne ia, vagana fua a ia tela e maua ne ia.”

¹⁸“Tusi la koe ki te agelu o te Ekalesia i Tuatila penei: “Tenei te fekau mai i te Tama a te Atua, ka ko ona mata e pela eiloa mo se afi ko ka ulaula, ka ko ona vae e pela mo se palasi ko oti ne fakamalapulapu.

¹⁹E iloa ne au au mea e fai. E iloa foki ne au a tou alofa, tou fakamaoni, au galuega, mo tou kufaki. E iloa ne au me tai uke au galuega ne fai nei i lo au galuega mua.

²⁰Kae tenei eiloa a te mea e se fiafia ei au ki a koe; e fakasaoloto ne koe a te fafine ko Iesepela ke fai tena loto, tela e fai mai i a ia ko te 'kave fekau a te Atua. E akoako kae takitaki 'se ne ia aku tavini ki te fina lalolagi mo te 'kai ki meakai ko oti ne ofo atu mo tupua.

²¹Ko oti ne tuku ne au ki a ia a te avanoa ke salamo, kae se manako eiloa a ia ke salamo mai tona fina lalolagi.

²²Tela la, ka fai ne au a ia ke masaki malosi, kae ka masaki a ia fakatasi mo latou katoa kola e mulilua sale mo ia. Ka fai eiloa ne au a te mea nei, seiloga ko salamo latou i olotou amioga masei e fai sale mo ia.

²³E tamate foki ne au ana fanau, ko iloa ei ne Ekalesia me ko au ko ia tela e iloa ne au a mafaufauga o tino mo olotou manakoga. E taui atu ne au ki tino takitokotasi e tusa mo olotou mea ne fai.

²⁴“A te 'toega o koutou i Tuatila, e seki tau'tali koutou ki te akoakoga masei tenei; e seki iloa foki ne koutou a te mea e taku ne nisi tino ko akoakoga 'funa kae 'loto a Satani. Au e fai atu ki a koutou me se toe fakaeke atu ne au ki a koutou se isi amoga.

²⁵Kae e 'tau mo koutou o taofi mautakitaki ki te mea ko maua ne koutou ke oko eiloa ki toku oko atu.

²⁶Mo latou kola e tafasili i te manumalo, kae tumau eiloa ki te gataga o fai a te mea e loto au ki ei, ka tuku atu ne au a te malosi foki tela ne maua ne au mai toku Tamana: Ka tuku atu foki ne au ki a latou a te malosi i luga o atufenua, ke pule ne latou fakatasi mo te tokotoko fiti, tela ka ofa likiliki ne ia ke pela me ne ulo one. Ka tuku atu foki ne au ki a latou a te fetu ao.

²⁹“Tela la, ko latou kola e fai'tau ki te tusi tenei; ke na faka'logo la ki muna e fai atu ne te Agaga ki Ekalesia!”