Read Te Tusi Tapu I Te Gana Tuvalu Lomiga Lua FAKAASIGA 20 Bible Online

FAKAASIGA 20 - Te Tusi Tapu I Te Gana Tuvalu Lomiga Lua bible

FAKAASIGA 20

¹Fakamuli ifo, ne matea ne au te agelu e fanaifo mai te lagi, e puke i tona lima a te ki o mone mo te seni 'mafa.

²Ne puke ne ia te talako, tela ko te gata mua eiloa, ko te Tiapolo tena io me ko Satani, kae ne saisai ne ia i te afe o tausaga.

³Ne pei ne te agelu a ia ki mone, loka fakamau ko te mea ke se toe takitaki 'se ne ia a fenua ke oko ki te palelega o te afe o tausaga. Ka oti, ko fakasaoloto ei a ia mo se taimi toetoe.

⁴Ne matea ne au a nofogaaliki, mo latou kola e saga'saga i ei; ne tuku atu foki te mana ki a latou o fakamasino a tino. Ne matea foki ne au a agaga o tino kola ne tamate, i te mea ne fakaasi ne latou a te mea tonu tela ne fakaasi ne Iesu, e pela foki mo te muna a te Atua. E seki tapuaki eiloa latou ki te manu fekai io me ki tona fakatusa, e seki maua foki ne latou a te fakailoga o te manu fekai i olotou lae mo lima. A latou ne toe ola kae pule e pela mo ne tupu fakatasi mo Keliso i te afe o tausaga.

⁵A te 'toega o tino 'mate e seki toe ola mai latou seiloga ko palele atu te afe o tausaga. Tenei te faka'tumaiga muamua o tino 'mate.

⁶Amutia kae manuia a tino e kau fakatasi i te fakatumaiga muamua o tino 'mate. E seai se malosi o te mate fakalua i luga i a latou; ka fai latou mo faitaulaga a te Atua mo Keliso, kae ka pule fakatasi latou mo ia i te afe o tausaga.

⁷Kafai ko katoa tausaga e afe, ka fakasaoloto a Satani mai te fale puipui,

⁸kae ka fano o fakaloiloi a fenua e salalau valevale i te lalolagi katoa, tela ko Koka io me ko Makoka. Ka fakamaopoopo katoa ne Satani a fenua ki te taua, e pela eiloa mo te uke o one o te tafatai.

⁹Ko salalau valevale latou i koga katoa o te lalolagi, kae nikoi ne latou a te fa'kai o Kelisiano, ko te fa'kai tela e alofa a ia ki ei. Kae fakamasei latou ne te afi mai te lagi.

¹⁰Ka ko te Tiapolo, tela ne fakaloiloi ne ia latou, ne pei ki loto i te lase ka ulaula mo te pauta ka, tela ne pei foki ki ei a te manu fekai mo te pelofeta loi; kae ka fakapuapuagatia latou i kona i te ao mo te po, ke oko eiloa ki te se gata mai, ki te se gata mai eiloa.

¹¹Ne matea ne au a te nofogaaliki lasi kae kena mo te tino e sagasaga mai i ei. Ne 'tele keatea mai ona mua a te lalolagi mo te lagi, ko se toe matea atu eiloa laua.

¹²Ne matea ne au a tino 'mate, tino ma'luga io me ko tino ma'lalo ko pau eiloa, e 'tu i mua o te nofogaaliki. Ne 'tala a tusi, ne toe 'tala foki te sua tusi, ko te tusi o te ola. Ne fakamasino a tino 'mate e tusa mo olotou mea ne fai, kola e tusi i loto i tusi.

¹³Ne tuku ake foki ne te tai ona tino 'mate. A te mate mo Seoli ne tuku ake foki ne laua a la tino 'mate. Kae ne fakamasino katoa e tusa mo olotou mea ne fai.

¹⁴Tela la, ne pei ki te lase ka ulaula o te mate mo seoli. A te lase ka ulaula tenei ko te mate fakalua.

¹⁵So se tino ne pei ki te lase ka ulaula, e se tusi tona igoa i te tusi o te ola.