Read Te Tusi Tapu I Te Gana Tuvalu Lomiga Lua FAKAASIGA 21 Bible Online

FAKAASIGA 21 - Te Tusi Tapu I Te Gana Tuvalu Lomiga Lua bible

FAKAASIGA 21

¹Fakamuli ifo ne matea ne au a te lagi fou mo te lalolagi fou. A te lagi mua mo te lalolagi mua mo tai, ko palele atu katoa a mea kona.

²Ne matea ne au a te Fa'kai Tapu, ko Ielusalema fou, ko fanaifo mai te Atua i te lagi, ko oko eiloa i te gali te kilokiloga tena, e pela eiloa mo se tamafine ko toka 'lei o fanatu ki tena fakaipoipoga.

³Ne lagona ne au a te leo lasi e faipati mai penei mai te nofogaaliki: “Ko 'nofo nei mo tino te fale o te Atua! Ka 'nofo fakatasi a ia mo latou, kae ka fai latou mo ona tino. A te Atua ka fakatasi eiloa mo latou, kae ka fai a ia mo olotou Atua.

⁴Ka se toe iai ne loimata i olotou mata. Ka se toe iai se mate, se fanoanoa, se tagi io me se 'mae. Ko palele atu a mea mua.”

⁵Ne fai mai te tino tela e nofo i te nofogaaliki, “Nei, ko fakafou ne au a mea katoa!” Ne fai mai foki a ia ki a au, “Tusi a mea konei, i muna konei e tonu kae aoga.”

⁶Ne toe fai mai foki a ia: “Ko oti! Ko au ko te Alefa mo te Omeka, tela ko te kamataga mo te fakaotiga. So se tino e fia inu, e tuku atu fua ne au ki a ia ke inu ki te vai mai te vaipuna o te ola.

⁷So se tino e manumalo e maua ne ia te mea nei mai i a au: E fai au mo ona Atua, kae fai a ia mo aku tama.

⁸Ka ko tino mata ma'taku, ko tino fakalata tino, mo tino faka'se tino, ko tino tatino, mo tino fina lalolagi, mo tino fai vailakau mo tino tapuaki ki tupua mo tino 'loi katoa, a te ikuga mo latou ko te lase ka ulaula mo te pauta ka, ko te mate fakalua tena.”

⁹A te tokotasi o agelu mai agelu e tokofitu tela e i a ia a tanoa e fitu e fonu i mala fakaoti e fitu, ne vau ki a au kae fai mai, “Vau, ka fakasino atu ne au ki a koe a te Tamafine fatoa avaga, ko te avaga a te Tama Mamoe.”

¹⁰Ne fakatasi mai te Agaga ki a au, kae ne ave au ne te agelu ki te ulu o te mauga tafa maluga. Ne fakaasi mai ne ia ki a au a Ielusalema, ko te Fa'kai Tapu, e fanaifo mai te Atua i te lagi,

¹¹e 'pula pela mo foliga 'malu o te Atua. A te fa'kai e 'pula e pela mo se fatu tāua, e pela foki mo se fatu iasipi, e 'ma foki e pela mo se kilasi.

¹²E isi sona pa matolu kae maluga, mo mataloa e sefulu lua, mo agelu foki e tino agafulu mo te tokolua, e tofu te agelu mo tena mataloa e leoleo. I luga i mataloa katoa, e tusi ei a igoa o matakaiga e sefulu-lua o Isalaelu.

¹³E tolu foki a mataloa i ona feitu takitasi: e tolu ki te feitu ki te saegala, e tolu ki te feitu ki saute, e tolu foki ki te feitu ki matu, pela foki mo te feitu ki te togala.

¹⁴A te 'pui o te fa'kai ne faite ki fatu e sefulu lua, kola e tusi i ei a igoa o te tinoagafulu mo te tokolua soko o te Tama Mamoe ko Iesu.

¹⁵A te agelu tela ne faipati mai ki a au e isi sena lakau fuafua e faite ki te aulo, e fua i ei ne ia te fa'kai mo ona mataloa pela foki mo tona 'pui.

¹⁶A te fa'kai e sikuea 'lei eiloa, i tona loa e pela foki mo tona lauefa. Ne fua foki ne te agelu ki tena lakau fuafua a te fa'kai, kae tusa mo te afe lima selau maila te loa, e pena foki tona lauefa mo tona maluga.

¹⁷Ne fua foki ne te agelu tona 'pui, kae tusa mo te lua selau sefulu ono futu tona maluga, e pela eiloa mo te fua masani e fakaaoga ne ia.

¹⁸A te 'pui e faite ki fatu iasipi, ka ko te fa'kai ne faite ki tina aulo eiloa, e 'ma eiloa e pela mo se kilasi.

¹⁹A fatu fakavae o te fa'kai ne fakagaligali faka'lei eiloa ki vaega fatu taua valevale. A te fatu fakavae muamua ko te iasipi, ko te lua ko te safaila, ko te tolu ko te akate, ko te fa ko te emela,

²⁰ko te lima ko te onika, ko te ono ko te kaneli, ko te fitu ko te kuate lanu 'sega, ko te valu ko te pelila, ko te iva ko te topasa, ko te sefulu ko te kalesone, ko te sefulu tasi ko te tokise, ko te sefulu lua ko te ametisi.

²¹A mataloa e sefulu lua ko penina kona e sefulu lua. E tofu te mataloa mo te penina ne faite ki ei. A te auala o te fa'kai ne faite ki tina aulo, e 'ma eiloa e pela mo se kilasi.

²²Ne seki matea ne au se fale tapu i te fa'kai, me i tena fale tapu ko te Aliki te Atua, tela ko ia ko te Malosi Katoatoa ko te Tama Mamoe foki.

²³E se manakogina te mainaga o te la io me ko te masina ke maina atu ki ei, me i te 'malu o te Atua e maina i ei, ka ko te Tama Mamoe ko tena moli.

²⁴Ka sasale a tino o te lalolagi i tena mainaga, kae ka aumai ne tupu o te lalolagi olotou koloa o faite ake ei te fa'kai.

²⁵Ka ma'tala eiloa a mataloa o te fa'kai i te aso katoa; ka se toe 'pono i te mea e ao faeloa i kona.

²⁶Ka aumai te 'malu mo koloa o fenua katoa ki te fa'kai.

²⁷Ka se ulu atu ki te fa'kai so se mea masei io me ne tino fai amioga fakalumaluma, io me fai'pati ki te loi, ka ko latou fua kola e tusi olotou igoa i te tusi o te ola a te Tama Mamoe ka ulu atu ki ei.