Read Te Tusi Tapu I Te Gana Tuvalu Lomiga Lua FAKAASIGA 22 Bible Online

FAKAASIGA 22 - Te Tusi Tapu I Te Gana Tuvalu Lomiga Lua bible

FAKAASIGA 22

¹Ne fakaasi mai foki ne te agelu a te vaitafe o te vai ola, e malipolipo e pela mo se kilasi, e vau mai te nofogaaliki o te Atua mo te Tama Mamoe,

²kae tafe ifo mai te kogaloto o te auala o te fa'kai. I feitu katoa o te vaitafe e 'tu i ei lakau o te ola, kola e 'fua fakasefulu lua i te tausaga, kae fakatasi i te masina; ka ko ona lau e aoga mo fai ke 'lei a masaki o fenua.

³ E seai se mea e fakamalaia ne te Atua e maua i te fa'kai. A te nofogaaliki o te Atua mo te Tama Mamoe ka iai i te fa'kai, ka ko ana tavini e tapuaki ki a ia.

⁴Ka matea ne latou ona foliga, ka ko tona igoa e tusi i olotou lae.

⁵Ka se toe iai se po, ko se toe ma'nako foki ki moli io me ki te mainaga o te la, me i te Aliki te Atua ko te lotou mainaga, kae ka pule latou e pela mo ne tupu ke oko ki te se gata mai, ki te se gata mai eiloa.

⁶Ne fai mai te agelu ki a au: “A muna konei e tonu kae mafai foki o fakatalitonugina. Ka ko te Aliki te Atua, tela e tuku atu tona Agaga ki pelofeta, ne uga atu ne ia tena agelu o fakaasi atu ki ana tavini a te mea ka tupu fakavave mai mua nei.”

⁷Muna a Iesu, “Kiloke! Au ka vave oko mai i se taimi pili mai! Amutia a latou kola e talia ne latou akoakoga fakapelofeta mai te tusi tenei!”

⁸Ko au ko Ioane, ne lagona kae matea foki ne au a mea katoa konei. Kae i te otiga ne lagona kae kilo foki oku mata ki ei, totuli ifo ei au ki vae o te agelu tela ne fakaasi mai ne ia a mea konei o tapuaki ki a ia.

⁹Kae ne fai mai ki a au penei: “Sa fai pena! A taua nei ne taina tavini pela foki mo ou taina pelofeta mo latou katoa kola e talia ne latou a muna i te tusi tenei. Tapuaki ki te Atua!”

¹⁰Kae ne toe muna mai ki a au: “Mo a ma tausi ne koe akoakoga fakapelofeta o te tusi tenei me ne mea 'funa, me ko pili o fakataunu a mea konei.

¹¹Ko te tino e amio masei, e 'tau eiloa mo ia o fakasaga o fai te masei; ko te tino e amio matagā, e 'tau eiloa mo ia o amio matagā; ko te tino e amio 'lei, e 'tau mo ia o fai te 'lei; ko te tino e amio 'malu, e 'tau eiloa mo ia o fai te amio 'malu.”

¹²Muna a Iesu, “Kiloke! Au ka vave oko mai i se taimi pili mai. Ka aumai ne au a taui kesekese o tuku ki tino takitokotasi e tusa mo galuega a te tino ne fai.

¹³Au ko te Alefa mo te Omeka, ko te tino muamua mo te tino fakamuli, ko te kamataga mo te fakaotiga.”

¹⁴Amutia a latou kola e ta olotou gatu 'loa ke 'ma, e maua te olotou saolotoga o 'kai ki te fuaga o te lakau o te ola, kae ulu foki i mataloa o olo ki loto i te fa'kai.

¹⁵Kae mai tua o te fa'kai ko tino faka'se tino mo tino fai vailakau, ko tino fina lalolagi mo tino tatino, ko tino tapuaki ki tupua mo tino 'loi i olotou muna mo faiga.

¹⁶“Ko au ko Iesu, tela ne uga atu ne au taku agelu o folafola atu a mea konei ki a koutou i Ekalesia. Au se tino e tupu mai i te kaiga o Tavita; au ko te fetu ao 'pula.”

¹⁷Ne fai mai te Agaga mo te Tamafine fatoa fakaipoipo, “Vau!” So se tino e lagona ne ia a te mea nei e 'tau foki mo ia o fai ake pela, “Vau!” So se tino e fia inu, na vau. So se tino foki e manako ki te vai ola, vau o inu me seai se 'togi.

¹⁸Ko au ko Ioane, ko fakatonu malosi atu au ki so se tino e lagona ne ia akoakoga fakapelofeta o te tusi tenei: so se tino e fakaopoopo ne ia se mea ki mea konei, ka fakaopoopo atu ne te Atua ki tena fakasalaga a mala kola e fakamatala i te tusi tenei.

¹⁹Kafai se tino e ave keatea ne ia se mea mai akoakoga fakapelofeta o te tusi tenei, ka ave foki keatea ne te Atua a tona vaega i fuataga o te lakau o te ola, mo tona vaega i te Fa'kai Tapu, kola e fakamatala i te tusi tenei.

²⁰Ko te tino tela ne molimau ki mea katoa konei, ne fai ake pela, “E tonu eiloa! Au e vave oko mai i se taimi pili mai!” Ka fai eiloa pena. Te Aliki Iesu, na vau!

²¹Ke i a koutou katoa te alofa tauanoa o te Aliki ko Iesu.[5]