Read Te Tusi Tapu I Te Gana Tuvalu Lomiga Lua FAKAASIGA 3 Bible Online

FAKAASIGA 3 - Te Tusi Tapu I Te Gana Tuvalu Lomiga Lua bible

FAKAASIGA 3

¹“Tusi la koe ki te agelu o te Ekalesia i Salataisa penei: “Tenei te fekau mai i a ia tela e nofo mo agaga e fitu o te Atua mo fetu foki e fitu. E iloa ne au, au mea e fai; e iloa foki ne au me e iai te manatu pela i a koe e ola, kae iloa ake nei i a koe ko mate!

²Tela la, ala mai, kae fakamalosi ake a te mea tena e i a koe, ka koi tuai o mate tonu eiloa. Me ko iloa ne au i tau mea ne fai e seki katoatoa tona 'lei i mua o te Atua.

³Ke masaua la te mea ne akoako koe ki ei, kae ne lagona ne koe; fakalogo ki ei, kae ke salamo foki koe i au agasala. Kafai e se ala mai koe, e vau au ki a koe e pela mo se tino kaisoa, kae e se iloa foki ne koe a te itula e vau ei au.

⁴Ne mo tino fua o koutou i Salataisa ne tausi otou gatu ke 'ma. Ka sasale koutou mo au, kae pei ki gatu kena, me e 'tau eiloa o fai pena koutou.

⁵A latou kola e manumalo ka pei foki ki gatu kena, kae ka se ave eiloa ne au keatea olotou igoa mai i te tusi o te ola. Ka taku tonu atu ne au i mua o toku Tamana mo ana agelu me i a latou ko oku tino.

⁶“Tela la, ko latou kola e fai'tau ki te tusi tenei, ke na faka'logo la ki muna e fai atu ne te Agaga ki Ekalesia!”

⁷ “Tusi la koe ki te agelu o te Ekalesia i Filatelafia penei: “Tenei te fekau mai i a ia tela e tapu kae fai mea tonu, tela e nofo mo ia te ki a Tavita, e 'tala ne ia te mataloa kae e seai ake foki se tino e mafai o 'pono ne ia. E 'pono ne ia, kae seai ake foki se tino e mafai ne ia o 'tala.

⁸E iloa ne au au mea e fai; e iloa foki ne au i a koe e tai vaivai; ko oti koe ne tautali i aku akoakoga kae ne fakamaoni mai foki koe ki a au. Ko oti ne 'tala ne au a te mataloa i ou mua, tela e seai se tino e mafai ne ia o 'pono.

⁹Fakalogo mai! E pela mo te kau a Satani, ko tino 'loi kola e fai mai i a latou ne tino Iutaia, kae e se ne tino Iutaia ei, ka fai ne au a latou ke o'mai ki ou mua, ke totuli o tapuaki atu ki a koe. Ka iloa ei ne latou i a au e alofa ki a koe.

¹⁰Ona ko koutou ne faka'logo ki taku fakatonuga ke loto kufaki koutou, ka tausi faka'lei foki ne au a koe i taimi o puapuaga kola ka oko mai ki te lalolagi, o tofotofo a tino katoa i te lalolagi.

¹¹Au e vave oko atu. Tausi faka'lei a te mea tena e i a koe, ko te mea ke seai se tino e 'fao malo ne ia tou foualiki.

¹²E fai ne au a ia tela e manumalo, ke fai mo pou tumau o te fale tapu o te Atua, ke oko ki te se gata mai. Ka tusi ne au i luga i a ia a te igoa o toku Atua, mo te igoa o te fa'kai o toku Atua, ko te Ielusalema fou, tela ka fanaifo mai te Atua i te lagi. Ka tusi foki i luga i a ia a toku igoa fou.

¹³“Tela la, ko latou kola e fai'tau ki te tusi tenei, ke na faka'logo la ki muna e fai atu ne te Agaga ki Ekalesia!”

¹⁴ “Tusi la koe ki te agelu o te Ekalesia i Laotikaia penei: “Tenei te fekau mai te Amene, tela ko ia ko te molimau fakamaoni kae tonu, ko ia foki ko te kamataga[1] o mea katoa ne faite ne te Atua.

¹⁵E iloa ne au, au mea ne fai; e iloa foki ne au, i a koe e se 'moko e se 'vela. Au e loto ke matuā 'moko koe io me matuā 'vela.

¹⁶Kae ona ko koe e mafanafana, e se 'vela e se 'moko, ka luaki nei ne au koe mai i toku gutu!

¹⁷Fai mai koe, ‘Au e maumea kae maukoloa. Ko maua katoa ne au a mea kola e manako au ki ei. Kae e se iloa ne koe a tou masei mo tou fakaalofa.’ A koe e mativa, e nofo fuafua kae kivi.

¹⁸Au e fakatonu atu ki a koe, ke 'togi ne koe ne aulo mai i a au, ko tinā aulo eiloa, ko te mea ke maumea koe. 'Togi foki ne gatu kena mo ou pei, ke ufiufi i ei a tou nofo fuafua fakalumalumagina. 'Togi foki ne vailakau e fai ei ou mata, ko te mea ke ile koe.

¹⁹E fakatonu ne au a mea 'se, kae e kini ne au a latou katoa kola e alofa au ki ei. Tela la, ke lotomau koutou kae salamo ki otou agasala.

²⁰Kiloke, au e tu i te mataloa kae tukituki atu; kafai se tino e lagona ne ia toku leo kae 'tala ne ia te mataloa, e ulu atu au ki loto i tona fale o 'kai fakatasi mo ia, ko ia foki mo au.

²¹Ko latou kola e manumalo, e avatu ne au ki a latou te saolotoga ke 'nofo i oku tafa i toku nofogaaliki, e pela eiloa mo au ne manumalo, kae nofo nei au i tafa o toku Tamana i tona nofogaaliki.

²²“Tela la, ko latou kola e fai'tau ki te tusi tenei, ke na faka'logo la ki muna e fai atu ne te Agaga ki Ekalesia!”