Read Te Tusi Tapu I Te Gana Tuvalu Lomiga Lua FAKAASIGA 5 Bible Online

FAKAASIGA 5 - Te Tusi Tapu I Te Gana Tuvalu Lomiga Lua bible

FAKAASIGA 5

¹Ne matea ne au a te pelugā tusi i te lima fakaatamai o ia tela e nofo i te nofogaaliki; e fonu a feitu e lua i tusitusiga, kae faka'piki mau foki ki fakamailoga e fitu.

²Ne matea foki ne au te agelu malosi tela ne folafola mai mo te leo lasi penei: “Ko oi te tino e 'tau o 'tala ne ia a fakamailoga kae 'fola foki ne ia a te pelugā tusi?”

³Kae seai eiloa se tino ne maua i te lagi, io me i te lalolagi, io me i lalo i te lalolagi, e mafai ne ia o 'tala a te pelugā tusi, kae kilo ki mea i ei.

⁴Au ne tagi pakalaga i te mea e seai se tino kai maua, e 'tau o 'tala ne ia te pelugā tusi kae kilo ki loto i ei.

⁵Kae tokotasi mai te kau toeaina ne muna mai ki a au penei: “Sa tagi. Kiloke! A te Leona mai i te matakaiga o Iuta, ko te mokopuna takutakua o Tavita, ko oti ne manumalo kae e mafai foki ne ia o 'tala a fakamailoga e fitu, kae 'tala foki a te pelugā tusi.”

⁶Ne matea ne au a te Tama Mamoe ko Iesu e tu i te kogaloto o te nofogaaliki, e nikoi fakatamilo ne manu e fa mo toeaina. A te Tama Mamoe e foliga mai pela me ko oti ne tamate. E fitu ona suki, e fitu foki ona mata, ko agaga kona e fitu o te Atua, ne uga mai ki te lalolagi katoa.

⁷Ne fano a te Tama Mamoe kae puke ne ia a te pelugā tusi mai i te lima fakaatamai o te tino tela e nofo i te nofogaaliki.

⁸Ka koi fai ne ia te mea tena, ne totuli ifo a manu e fa mo te tinolua mo te tokofa toeaina, i mua o te Tama Mamoe. E tofu a te tino mo te kitala mo tanoa aulo ko 'fonu i mea manogi, ko talosaga kona a tino kelisiano.

⁹Ne usu ne latou a te pese fou penei: “E 'tau i a koe o puke ki te pelugā tusi Kae 'tala ne koe ona fakamailoga. Me i a koe ne tamate, kae mai i tou mate ne fakasaoloto ei ne koe tino mai fenua katoa, Mai matakaiga takitasi, mo 'gana kese'kese mō te Atua.

¹⁰Ko oti ne fai ne koe latou ke fai mo malo o faitaulaga e tavini atu ki te tou Atua; Kae ka pule latou i te lalolagi.”

¹¹Ne toe kilo ake au, kae ne lagona ne au agelu e afe mo afe te aofaki o latou. E 'tu fakatamilo i te nofogaaliki, pela foki mo manu e fa mo toeaina,

¹²kae 'pese mo te leo lasi penei: “A te Tama Mamoe tela ne ta E 'tau eiloa o maua ne ia te mana, Te maumea, te poto mo te malosi, Te 'malu, te vikiga mo te tavaega!”

¹³Kae ne lagona foki ne au a manu katoa i te lagi mo te lalolagi, pela foki mo lalo ifo o te lalolagi, fakatasi mo mea ola i te tai, ko manu katoa ne faite i te lagi mo te lalolagi ne 'pese mai penei: “Ke i a ia tela e nofo i te nofogaaliki, e pela foki mo te Tama Mamoe, Te vikiga, te tavaega, te 'malu mo te malosi, Ke oko eiloa ki te se gata mai ki te se gata mai eiloa!”

¹⁴Ne tali mai manu e fa, “Amene!” Totuli ifo ei a toeaina kae tapuaki atu.