Read Te Tusi Tapu I Te Gana Tuvalu Lomiga Lua FAKAASIGA 7 Bible Online

FAKAASIGA 7 - Te Tusi Tapu I Te Gana Tuvalu Lomiga Lua bible

FAKAASIGA 7

¹I te otiga o te mea nei, ne matea ne au agelu e tokofa i feitu e fa o te lalolagi, e taofi mau ne latou a matagi e fa o te lalolagi, ko te mea ke seai se matagi e agi i te lalolagi, i te tai, io me ki se lakau.

²Ne matea atu foki ne au a te sua agelu e fanake i te sopogala mo te fakamailoga a te Atua ola. Ne kalaga mo te leo lasi ki agelu e tokofa, ko latou kona ne tuku atu ne te Atua a te mana o fakamasei a te lalolagi mo te tai.

³Muna a te agelu: “Sa fakamaseigina ne koe a te laukele, io me ko te tai, io me ko lakau, ke oti mua ne fakamailoga ne tatou a lae o tavini a te tou Atua, ki te fakamailoga a te Atua.”

⁴Ne taku mai foki ki a au a te aofaki o latou kola ne fakailoga olotou lae ki te fakamailoga a te Atua: e tusa mo te toko selau fasefulu fa afe mai matakaiga katoa o Isalaelu.

⁵E toko sefulu lua afe mai te matakaiga o Iuta ne fakailoga ki te fakamailoga a te Atua; e toko sefulu lua afe mai te matakaiga o Leupena; e toko sefulu lua afe mai te matakaiga o Kato;

⁶e toko sefulu lua afe mai te matakaiga o Asela; e toko sefulu lua afe mai te matakaiga o Nafatali; e toko sefulu lua afe mai te matakaiga o Manase;

⁷e toko sefulu lua afe mai te matakaiga o Simeona; e toko sefulu lua afe mai te matakaiga o Levi; e toko sefulu lua afe mai te matakaiga o Isakala;

⁸e toko sefulu lua afe mai te matakaiga o Sepulona; e toko sefulu lua afe mai te matakaiga o Iosefa; e toko sefulu lua afe foki mai te matakaiga o Peniamina.

⁹I te otiga o te mea nei, ne kilo atu au, matea ei ne au a te vaitino tokouke, ko se mafai eiloa o faitau a latou katoa ne se tino! Ne o'mai katoa mai fenua katoa, matakaiga, tino valevale, 'gana, kae 'tu i mua o te nofogaaliki, pela foki i mua o te Tama Mamoe, e pei katoa ki gatu kena, kae puke a lau o pama i olotou lima.

¹⁰Ne ka'laga malosi mai penei: “A te tou fakaolataga e maua mai i te Atua, tela e nofo i tona nofogaaliki; e maua foki te tou fakaolataga i te Tama Mamoe!”

¹¹Ne 'tu fakapukupuku a agelu i te nofogaaliki e pela foki toeaina mo manu e fa. Totuli ifo ei kae pu'nou i mua o te nofogaaliki, o tapuaki atu ki te Atua,

¹²olotou muna: “Amene! Ke i te Atua te vikiga, te 'malu, te poto, te fakafetai, te mana, te malosi mo te sili ki te se gata mai, ki te se gata mai eiloa! Amene!”

¹³E tokotasi o te kau toeaina ne fesili mai ki a au penei: “Ko oi a tino kola e pei ki gatu kena, kae ne o'mai foki mai fea?”

¹⁴Aku muna, “Tou 'malu, e se iloa ne au. E a, e iloa ne koe?” Ana muna ki a au: “Konei a tino ne 'sao i te fakasauaga lasi. Ne 'ta olotou gatu, kae ne faka'kena foki ne latou ki te toto o te Tama Mamoe.

¹⁵Tena te pogai e 'tu ei latou i mua o te nofogaaliki o te Atua kae tavini atu ki a ia i te ao mo te po i tona fale tapu. Ka ko ia tela e nofo i te nofogaaliki e puipui ne ia latou i te nofo fakatasi o ia mo latou.

¹⁶E se toe fia 'kai latou io me e fia inu; io me 'paku i te 'vela o te la;

¹⁷me i te Tama Mamoe tela e nofo i te kogaloto o te nofogaaliki, ka fai mo olotou tausi mamoe, o takitaki latou ki vai puna o te ola; kae 'solo keatea ne te Atua a loimata katoa mai olotou mata.”