Read Te Tusi Tapu I Te Gana Tuvalu Lomiga Lua FAKAASIGA 9 Bible Online

FAKAASIGA 9 - Te Tusi Tapu I Te Gana Tuvalu Lomiga Lua bible

FAKAASIGA 9

¹Ne ili te pu a te tokolima o agelu, matea ei ne au a te fetu tela ne to mai, mai te lagi ki te lalolagi; ne tuku atu foki ki a ia a te ki o mone.[3]

²Ne 'tala ne te fetu a mone, fanake ei a te au i ei, e pela eiloa mo se au mai te umu lasi; a te mainaga o te la mo te ea ko fakapouligina katoa ne te au mai mone.

³Ne olo ifo a se akelise mai te au o te umu ki te lalolagi; ne tuku atu foki ki a latou a te malosi fakaakalava.

⁴Ne fakatonu atu foki ke mo a e fakamasei ne latou a mouku, mo lakau me ko lakau fo'liki foki; e mafai ne latou o fakamasei a tino kola e seai se fakamailoga a te Atua i olotou lae.

⁵A se akelise ne seki fakasaoloto ke 'ta ne latou a tino konei, ka ke fakafi'ta fua ne latou i se lima masina. A te fi'ta tela e maua ne latou, e pela eiloa mo te 'mae o se tino e u ne te akalava.

⁶I te lima masina tena, e salasala ne tino pena a te mate kae se maua eiloa ne latou; e ma'nako o 'mate, ka ko te mate e tele faeloa keatea mai i a latou.

⁷A se akelise e pela eiloa mo ne foliga o solofanua ko toka mō te taua; i luga i olotou ulu e isi ne mea e pela mo ne foualiki aulo, ka ko olotou foliga e pela eiloa mo mata o tino.

⁸A olotou laulu, e pela eiloa mo laulu o fafine, ko olotou nifo foki e pela eiloa mo nifo o leona.

⁹A olotou fatafata e ufi ki te mea e foliga pela mo se talita fiti ufi fatafata, ka ko te logoa o te kapata olotou kapakau, ko pela eiloa mo te logoa o kaliota e soso ne solofanua, e 'tele ki te taua.

¹⁰E isi foki ne olotou velo mo suki, e pela eiloa mo akalava, ko olotou velo kona e iai a te malosi o fakalogo'mae a tino i te lima masina.

¹¹E isi se lotou tupu e pule i a latou, ko te agelu e pule i mone. A tona igoa faka‐Epelu ko Apatoni; kae i te faka‐Eleni ko Apolioni, ko tona uiga “Ko te Tino Fakamasei Mea.”

¹²Ko palele atu nei a te mea fakamataku muamua; mai tua o te mea nei, kae toe lua a mea fakama'taku koi fakatalitali atu ki ei.

¹³Ne ili a te pu a te tokoono o agelu, lagona ei ne au a te leo e vau mai tulimanu o te fata faitaulaga e faite ki aulo, tela e tu i mua o te Atua.

¹⁴Ne fai atu a te leo ki te tokoono o agelu tela e i a ia a te pu: “'Tala atu a te tokofa agelu kola e saisai i te vaitafe lasi ko Eufilate!”

¹⁵Ne 'tala atu a agelu e tokofa; ne fakatoka foki eiloa latou mō te itula eiloa tenei, i te taimi foki tena o te masina tenei, mo te tausaga tenei, o tamate ne latou a te tasi vae tolu o tino katoa.

¹⁶Ne taku mai foki ki a au a te aofaki o kautau e 'sopo i solofanua; e tusa mo te lua selau miliona.

¹⁷Kae i te fakaasiga ne oko mai ki a au, matea ei ne au a solofanua mo tino e 'sopo i ei: e isi ne olotou talita ufi fatafata e 'kula pela mo se afi, e lanu moana foki e pela mo se safaila, kae 'sega e pela mo se pauta ka. A ulu o solofanua e pela mo ulu o leona, kae mai olotou gutu, e 'sae mai ei a te afi, te au mo te pauta ka.

¹⁸E tasi vaetolu o tino ne 'mate ona ko mala kona e tolu: ko te afi, te au, mo te pauta ka, e 'sae mai gutu o solofanua.

¹⁹Me i te malosi o solofanua e i olotou gutu mo velo. A olotou velo e pela eiloa mo ne gata, e pena foki olotou ulu, kae e fakaaoga ne latou o fakalogo'mae ei a tino.

²⁰Ka ko tino kola ne 'toe, ko latou kona ne seki 'mate i mala konei, ne seki sala'mo latou ki mea ne faite ne latou. E seki gata eiloa te lotou tapuaki ki temoni, tupua aulo, tupua siliva, tupua palāsi, tupua fatu mo tupua lakau, kola e se mafai ne latou o lavea ne mea me lagona ne mea, io me o sasale.

²¹E seki sala'mo foki eiloa a tino kona mai te lotou tatino, mai te fai vailakau, mai te lotou fina lalolagi, pela foki mai te lotou kai'soa.