Read Te Tusi Tapu I Te Gana Tuvalu Lomiga Lua LUTA 2 Bible Online

LUTA 2 - Te Tusi Tapu I Te Gana Tuvalu Lomiga Lua bible

LUTA 2

¹E isi se kaiga pili o Naomi, tena igoa ko Poasa, se tino maumea kae lauiloa foki, kae kaiga mo Elimeleka te avaga a Naomi.

² I te aso e tasi ne faipati atu Luta ki a Naomi penei, “Tuku mai au ke fano o tae fuaga saito kola e tiakina ne tino kati saito i fatoaga. E talitonu au me ka maua ne au se tino ke galue au i a ia.” Ne tali mai Naomi penei, “Taku tama, ko 'lei, fano la.”

³Tela, fano ei a Luta ki fatoaga kae sasale atu i tua o tino kati saito, kae taetae ake ne ia a fuaga saito kola e tiaki ne latou. Ne iloa ake fakamuli me i a ia ne galue i te fatoaga o Poasa.

⁴Ki tua ifo, ko foki mai a Poasa mai Peteleema kae ne fakatalofa atu ki te kau faigaluega, kae fai atu ki a latou penei, “Ke fakatasi atu te Aliki ki a koutou!” Ne tali mai latou ki a ia, “Ke fakamanuia a koe ne te Aliki.”

⁵Ne fesili atu Poasa ki te pule o te kau faigaluega, “Ko oi a te tamafine tela?”

⁶Ne tali mai te pule, “A ia se tamafine fakaalofa tela ne 'foki fakatasi mai mo Naomi mai te fenua ko Moapi.

⁷A ia ne fakamolemole mai ki a au ke talia ne au a ia ke tautali i tua o tino kati saito o taetae a fuaga saito. Ne galue mai a ia i te taeao eiloa kae ne fatoa malolo nei fua o manava malie i te maluga o te lakau.”

⁸Tela, fai mai ei Poasa ki a Luta, “Kiloke e lei ke sa fano koe o taetae fuaga o saito i so se fatoaga, kae vau fua koe ki te fatoaga tenei, ke galue tasi koe mo fafine i konei.

⁹Kilokilo ki te koga e tae saito ei latou ko fano ei a koe o olo tasi mo latou. Ko oti ne fakatonu ne au taku kau faigaluega ke fai faka'lei ki a koe. I so se taimi e fia inu ei a koe fano o inu i tiā kola ko oti ne fakafonu ki vai ne latou.”

¹⁰Ne punou ifo a Luta ki lalo mo ona mata ko patele ki te laukele, kae faipati mai penei ki a Poasa, “Ai a ko mafa ei ou mafaufauga ki a au? Ai a foki ko lasi ei tou alofa ki se tino fakaalofa?”

¹¹Ne tali atu Poasa, “Ko leva eiloa ne logo au i mea katoa ne fai ne koe ki te matua o tau avaga talu mai te aso ne mate ei tau avaga. Ko iloa foki ne au te ala ne tiakina ei ne koe tou tamana mo tou matua mo tou fenua, mo te pogai ne vau ei koe o nofo fakatasi mo tino kola ne seki iloa lele eiloa ne koe i aso mua.

¹²Ke taui atu ne te Aliki ki a koe e tusa mo au galuega alofa ne fai. Ke maua ne koe se taui katoatoa mai te Aliki te Atua o Isalaelu, ko ia tela ne vau ei koe ke maua ei sou puipuiga!”

¹³Ne tali atu a Luta, “Tou malu, ko oko eiloa tou atafai[5] E tiga foki eiloa me i a au e se 'pau mo se tino tokotasi o tavini a koe, kae ko muna alofa a koe ki a au ko malosi ei au.”

¹⁴I te taimi o te kaiga ne faipati atu a Poasa ki a Luta penei, “Vau o kai aka ne mu falaoa faka'fete ma koe, kae peke ki te sosi.” Tela, nofo tasi ei a ia mo tino faigaluega kae avatu ne Poasa a fuaga o saito ne tao ke kai ma ia. Ne kai eiloa a ia ke makona, kae isi foki ana mo meakai ne toega.

¹⁵I tena fanoga o tae fuaga o saito, ne fakatonu atu ei Poasa ki ana tino faigaluega penei, “Tuku eiloa a ia ke taetae fuaga o saito, ke oko eiloa ki koga kola e takato ei a saitagā saito, kae sa vaogina a ia.

¹⁶Se gata i kona, tapale aka foki ne kau saito mai saitaga ke taetae ne ia.”

¹⁷Tela la, ne galue loa Luta ki te taetaega o fuaga saito i te fatoaga ke oko eiloa ki te afiafi. I te otiga ne kinikini ne ia a kau o saito, ne iloa ake ei ne ia me toe itiiti kae maua te sefulu kilokalame te mafa.

¹⁸Ne ave ne ia ki te fa'kai a fuaga o saito kae fakaasi atu ki te matua o tena avaga a fua o tena galuega. Avatu foki ne ia ana toega meakai i tena kaiga i te fatoaga a Poasa.

¹⁹Ne fesili mai Naomi ki a ia, “Ne taetae katoa ne koe i fea a fuaga o saito konei? E oi foki te fatoaga ne galue a koe i ei? Ke fakamanuia ne te Atua a te tagata tena ne alofa atu ki a koe!” Tela, tala atu ei ne Luta kia a Naomi i a ia ne galue i te fatoaga a Poasa.

²⁰ Faipati mai ei a Naomi penei, “Ke fakamanuia ne te Aliki a Poasa! A te Aliki e tausi faeloa ne ia ana feagaiga ki tino ola mo tino mate.” Kae ne toe faipati mai foki penei, “A te tino tena se kaiga pili o tatou, se tino tokotasi mai tino kola e 'tau o tausi mai ki a taua.”

²¹Tena, fai atu ei a Luta penei, “E tafasili atu la i te lei, me ne fai mai ke vau sale loa au o taetae fuaga o saito fakatasi mo ana tino galue ke oko eiloa ki te fakaotiga o te taukai.”

²²Muna Naomi ki a Luta, “Ao, taku tama, ka sili atu tou filemu ma galue koe mo fafine i te fatoaga a Poasa i lo tou fano o galue i se fatoaga a se isi tino.”

²³Tela, galue eiloa a Luta fakatasi mo latou o taetae a fuaga o saito ke oko eiloa ki te otiga ne kati o kalite mo saito. Kae ne 'nofo tasi eiloa a ia mo te matua o tena avaga.