Read Te Tusi Tapu I Te Gana Tuvalu Lomiga Lua LUTA 4 Bible Online

LUTA 4 - Te Tusi Tapu I Te Gana Tuvalu Lomiga Lua bible

LUTA 4

¹Ne fano a Poasa ki te koga e fono sale ei a tino, e pili ki te mataloa o te pui o te fa'kai, nofo ifo ei a ia i kona. Kae oko atu foki mo te kaiga tafasili i te pili o Elimeleka, te tino tela ne faipatigina ne Poasa, ne kalaga atu Poasa ki a ia penei, “Toku taugasoa vau ki konei o sagasaga ki lalo.” Tela fanatu ei a ia kae ne sagasaga ki lalo.

²Ne aumai ne Poasa te tinoagafulu takitaki o te fa'kai kae fakamolemole atu ki a latou ke nofo foki ki lalo. I te taimi ko nofo lei ei a latou,

³ne faipati atu ei a ia ki tena kaiga penei, “Nei la ko foki mai a Naomi mai Moapi, ko manako a ia o fakatau atu a te fatoaga o Elimeleka te kaiga o taua,

⁴kae i toku manatu me se mea e 'tau o iloa ne koe. Nei la, kafai e manako koe ki ei, togi ne koe a te fatoaga i mua o tino konei e sagasaga i te koga tenei. Kae kafai e se manako koe ki ei, fakaasi mai, i te togi muamua e a koe, kae ko au e tafa atu.” Muna a te tagata tenei, “Ka togi eiloa ne au.”

⁵Ne fai atu a Poasa, “Ko oko eiloa i te lei. Kafai ko togi ne koe a te fatoaga mai a Naomi, ko togi foki ne koe a Luta,[6] te fafine Moapi tela ko mate tena avaga, ko te mea ke tumau eiloa a te fatoaga i te kaiga o te tagata ko mate.”

⁶Ne tali mai a ia penei, “i te feitu tena ka se 'tau o 'togi ne au a te fatoaga me e se mafai ne aku tama tonu o maua te tofi tena. Ke togi ne koe, i au ko se manako ki ei.”

⁷ I aso kona, e isi se tu e fai sale pela: kafai ko toka se fakatauga io me se fesuiakiga o mea totino, e 'tau mo ia tela e 'togi atu ana mea o tala tena taka o tuku atu ki te tino tela e togi ne ia ana mea. I te faiga la tenei a tino Isalaelu ko iloa ne latou i te mataupu ko toka lei.

⁸Tela la, i te fai atuga a te tagata ki a Poasa, “Togi ne koe,” ne tapale aka tena taka, avatu ei ne ia ki a Poasa.

⁹Tena faipati atu ei a Poasa ki takitaki mo latou katoa ne i kona, “A koutou katoa ko molimau i te aso nei me ko oti ne togi ne au mai ia Naomi a mea katoa a Elimeleka mo ana tama ko Kiliona mo Malona.

¹⁰ I tafa o mea kona, a Luta, te fafine Moapi, te avaga a Malona, ko fai nei a ia mo fai taku avaga. I te auala tenei ka tumau ei a te tofi tenei i te kaiga o te tino mate, kae ko tena gafa ka tumau eiloa i tena fenua mo tena fa'kai. Ko koutou eiloa e molimau ki te mea tenei i te aso nei.”

¹¹ Faipati mai ei a takitaki mo nisi tino ki a ia penei, “Ao, a matou ko molimau eiloa. Ke fai ne te Aliki a tau avaga ke pela mo Lasela mo Lea, kola ne fanau ne laua a tamaliki tokouke a Iakopo Ke fai foki ne ia a koe ke maumea i te pui kaiga o Efalata kae takutakua i Peteleema.

¹² A tamaliki kola ka tuku atu ne te Aliki ki te fafine tenei, ke fai tou kaiga ke pela mo te kaiga o Pelesa, te tama a Iuta i a Tamala.”

¹³Tela, ave ei ne Poasa a Luta ki tena fale mo fai tena avaga. Ne fakamanuia a Luta ne te Aliki, tela faitama ei a ia kae fanau mai ei se tamaliki tagata.

¹⁴Ne faipati atu a fafine ki a Naomi, “Ke vikia te Aliki! Ko aumai ne ia ki a koe i te aso nei se mokopuna tagata mo tausi a koe. Ke takutakua te tamaliki tagata i te fenua o Isalaelu!

¹⁵E alofa faeloa a te avaga o tau tama ki a koe, kae ko oti ne fai ne ia a mea e uke mo koe e sili atu i lo mea e mafai o fai ne se tokofitu tamaliki tagata. Kae nei, ko fanau mai ne ia ki a koe se mokopuna tagata, tela ka aumai ne ia ki a koe se ola fou kae maua ne koe mai a ia se puipuiga ma lomatua koe.”

¹⁶Ne sapai ake ne Naomi a te tamaliki, sai mai ne ia ki tena foitino,[7] kae tausi ei ne ia.

¹⁷A fafine o fale pili mai ne fakaigoa ne latou a te tamaliki tagata ki a Opeta. Ne takutaku foki ne latou a te tala ki tino katoa penei, “Ko fanau mai se tamaliki tagata ki te gafa o Naomi!” A Opeta ko te tamana o Iese, tela ko ia ko te tamana o Tavita.

¹⁸Tenei te fakasologa o te gafa o te kaiga mai a Pelesa ke oko ki a Tavita: Pelesa,

¹⁹Heselona, Lama, Lama te Aminatapu,

²⁰Aminatapu te Nasona, Nasona o Salemona,

²¹Salemona o Poasa, Poasa o Opeta,

²²Opeta o Iese mo Iese o Tavita.