Read Te Tusi Tapu I Te Gana Tuvalu Lomiga Lua 1 SAMUELU 12 Bible Online

1 SAMUELU 12 - Te Tusi Tapu I Te Gana Tuvalu Lomiga Lua bible

1 SAMUELU 12

¹Ne fai atu a Samuelu ki tino Isalaelu penei, “Ko oti nei ne fakataunu ne au te mea ne manako mai koutou ke fai ne au. Ko oti ne avatu ne au te tupu ke takitaki ne ia koutou,

²tela la, ko ia ka takitaki ne ia koutou. Ka ko au ko matua eiloa, aku tama tagata kona e nofo tasi koutou. Au ne takitaki i a koutou talu mai aso koi tamataene ei au.

³Au tenei e tu atu i otou mua. Kafai e isi se mea se 'lei ko oti ne fai ne au, taku mai la i te taimi tenei, i mua o te Aliki mo te tupu ko oti ne fili ne ia. E a, kai puke eiloa ne au se pulumakau a se tino io me se asini? Kai fakaloiloi eiloa ne au se tino? E a, kai talia eiloa ne au se meaalofa fakakolekole mai se tino? Kafai e isi se mea i mea konei ne fai ne au, ko tau la o toe togi ne au te mea ne puke ne au.”

⁴Ne tali atu a tino penei, “Ikai, e seki fakaloiloi eiloa ne koe matou io me fakapuapuaga matou; e seai foki se mea a se tino kai puke ne koe.”

⁵Ne toe fai atu Samuelu penei, “A te Aliki mo tena tupu ne filifilia, ko molimau kona i te aso nei me e seai se mea 'se kai fai ne au ki tino Isalaelu.” Ne tali mai latou penei, “Ao, te Aliki ko te 'tou molimau.”

⁶ Ne faipati atu eiloa a Samuelu, muna a ia, “A te Aliki ko ia tela ne fili ne ia a Mose mo Alona, kae ko ia foki ne aumai ne ia otou tupuga mai Aikupito.

⁷Tu mai i koga ne tu ei koutou, ke fakamasino atu ne au koutou i mua o te Aliki o fakamasaua atu ki a koutou a mea fakaofoofogia katoa ne fai ne te Aliki, kola ne fakasao ei koutou mo otou tupuga.

⁸ I te oloatuga o Iakopo mo tena kaiga ki Aikupito kae ne fakapologa ne tino Aikupito a latou, ne fakapologa latou ne tino Aikupito, kae ne tagi mai ki te Aliki mo se fesoasoani, tena ne uga atu ei ne ia a Mose mo Alona, kola ne taki mai ne laua Isalaelu mai Aikupito, o fakanofo i te fenua tenei.

⁹ Ne fulitua Isalaelu ki te Aliki te lotou Atua, tena ne tuku atu ei ke takavale i te kau Filisitia mo te tupu o Moapi mo Sesela, te takitaki o te kautau a te fa'kai o Hasola.

¹⁰ Tena, ne tagi atu latou ki te Aliki mo se fesoasoani kae fai atu penei, ‘Te Aliki, matou ko agasala i a matou ne fulitua atu ki a koe o tapuaki atu ki fakatusa o Paala mo Asitate. Fakasao mai matou mai omotou fili, kae ka toe tavini atu matou ki a koe!’

¹¹ Tena ne uga atu ne te Aliki a Kitiona, tafa atu ki ei ko Palako,[20] tafa atu ki ei ko Iefata, kae fakamuli ko au. A koutou ne fakasao sale ne matou taki tokotasi, mai otou fili, tena ne nofo ei koutou mo te saogalemu.

¹² Kae i te laveaga ne koutou i te tupu o Amoni ko Nahasa ko kamata o vau o faitaua mai ki a koutou, kae teke aka koutou ki te Aliki ko te tupu o koutou, kae fai aka koutou penei ki a au, ‘A matou e manako ki se tupu ke pule ne ia matou.’

¹³“Tenei la, a te tupu ne manako koutou ki ei, tenei ko oti ne tuku atu ne te Aliki ki a koutou.

¹⁴Ka solosolo 'lei a mea katoa e fai ne koutou, manafai e fakaaloalo koutou ki te Aliki te otou Atua, tavini ki a ia, fakalogo ki a ia, kae tautali i ana fakatonuga; kafai ko koutou mo te otou tupu e fai pena ko oko eiloa i te 'lei.

¹⁵Kae kafai e se fakalogo koutou ki te Aliki mo ana fakatonuga, ko ia ka se fiafia ki a koutou mo te otou tupu.[21]

¹⁶Tela la, 'tu mai i otou tulaga, kae ka lavea ne koutou a mea lasi ka fai ne te Aliki.

¹⁷Mea nei ko te tau vela, ne? Ka ko au ka talo, kae ka aumai ne te Aliki a fatili mo vaiua. Kafai e tupu te mea tenei, ko iloa ei ne koutou me ko oti ne agasala koutou ki te Aliki i te taimi ne fakatagi atu ei koutou ki se tupu.”

¹⁸Tena ne talo atu ei a Samuelu, kae i te aso foki eiloa tena, ne aumai ei ne te Aliki te fatili mo te vaiua. Tena ne mataku ei a tino i te Aliki mo Samuelu,

¹⁹kae fai atu ki a Samuelu penei, “Tou malu, fakamolemole, talo atu ki te Aliki tou Atua ke se mate matou. Ko iloa nei ne matou me i te manako o matou ki se tupu se agasala e tasi mai nisi agasala e uke a matou.”

²⁰Ne tali atu Samuelu, “Sa mataku.” “E ui eiloa ko oti ne fai ne koutou se agasala masei pena, kae sa fulitua eiloa ki te Aliki, kae tavini atu ki a ia mo otou loto kātoa.

²¹Sa olo o tapuaki ki nisi atua;[22] e se mafai ne latou o fesoasoani atu ki a koutou, io me fakasao koutou, me e se ne atua tonu.

²²A te Aliki ko oti ne fai tena feagaiga, tela la, e se mafai ne ia o tiakina koutou, me ko oti ne filifili a ia ke fai koutou mo ona tino tonu.

²³Ka ko au, ka talo faeloa au mo koutou; ke se agasala au ki te Aliki i toku se talo mo koutou. Ka akoako atu ne au koutou ki mea lei mo mea e tau o fai ne koutou.

²⁴Fakalogo ki te Aliki kae tavini atu ki a ia mo te fakamaoni mo otou loto katoa. Masaua a mea fakaofoofogia ko oti ne fai ne ia mo koutou.

²⁵Kae kafai eiloa e tumau koutou i te agasala, ko koutou eiloa mo te otou tupu ka 'ta fakapalele.”