Read Te Tusi Tapu I Te Gana Tuvalu Lomiga Lua 1 SAMUELU 13 Bible Online

1 SAMUELU 13 - Te Tusi Tapu I Te Gana Tuvalu Lomiga Lua bible

1 SAMUELU 13

¹A Saulo koi tamataene[23] eiloa kae ne fai a ia mo tupu, o pule i Isalaelu mo se lua[24] tausaga.

²Ne fili ne Saulo e tolu afe tagata, e lua afe e nofo mo ia i Mekemase pela foki i te fenua mauga o Peteli, kae toko afe ne olo mo tena tama tagata ko Ionatana ki Kipea, i te laukele o Peniamina. A te toega o tagata ne uga ne ia ke foki atu ki olotou fale.

³Ne tamate ne Ionatana a te takitaki o te kautau a Filisitia i Kepa,[25] kae ne 'logo katoa a tino Filisitia. Ne uga ne Saulo a avefekau ke fakatagi te pu, e fakamaopoopo ei a tino Epelu mo te taua.

⁴Ne fakailoa atu ki tino Isalaelu katoa, i te takitaki o te kautau a Filisitia ne tamate ne Saulo, tela la, a tino Filisitia ko oko eiloa i te kaitaua ki te kau Isalaelu. Tena, ne talia ei ne tino Isalaelu a te kalaga a Saulo ke maopoopo atu latou ki Kilikala.

⁵Ne maopoopo te kau Filisitia o fakatokatoka o taua atu ki te kau Isalaelu: e tusa mo te tolusefulu afe olotou kaliota tau, e ono afe tagata i solofanua, ka ko olotou sotia e pela eiloa mo te uke o one i te matafaga. Ne olo atu latou ki Mekemase, i te feitu ki te saegala o Petavene, manava ei i kona.

⁶Tena ne taua atu ei latou ki tino Isalaelu, kae ko se iloa ei ne tino Isalaelu o fai se mea. E isi ne tino Isalaelu ko muni fua i ana mo pu o kaupapa, io me i loto i lua mo vaikeli;

⁷a nisi ne olo atu ki te sua feitu o te Vaitafe o Iolitana ki te laukele o Kato mo Kileata. A Saulo i te taimi tena, koi nofo i Kilikala, ka ko tino e nofo mo ia i kona ko oko eiloa i te mataku.

⁸ Ne fakatali a ia i kona i aso e fitu ki a Samuelu, e pela mo te fakatonuga a Samuelu, ka ko Samuelu e seki oko atu eiloa. Ko kamata a tino o olo keatea mai i a Saulo,

⁹tena ne fai atu ei a ia ki a latou penei, “Aumai te taulaga sunu mo te taulaga fakafetai.” Tena ne ofo atu ei ne ia te taulaga sunu,

¹⁰kae i te oti atuga o te faiga o te taulaga tena, ko Samuelu eiloa ko oko atu. Ne fanatu Saulo o fakafetaui atu ki a ia kae fakatalofa atu,

¹¹kae fai mai Samuelu, “Se a te mea tenei ko oti ne fai ne koe?” Ne tali atu Saulo, “A tino ko kamata o olo keatea mai i a au, ka ko koe e seki oko mai eiloa e pela mo au muna; se gata i kona, ka ko tino Filisitia kola ko maopoopo i Mekemase.

¹²Tena ne mafaufau aka ei au penei, ‘Ko pili nei o'mai te kau Filisitia o taua mai ki a au i konei i Kilikala, kae e seki fai eiloa ne au te mea tenei ke fiafia mai te Aliki ki a au.’ Tena ne manatu ifo ei au, ko tau o na ofo ne au te taulaga.”

¹³Ne tali atu Samuelu, “E se 'lei tau mea tena ne fai. A koe ko se fakalogo ki te fakatonuga a te Aliki tou Atua ne tuku atu ki a koe. Moi ne fakalogo koe, e penei e fai eiloa ne ia koe mo tou gafa ke tupu i luga i Isalaelu ki te se gata mai.

¹⁴ Kae nei, tau pulega e se tumau, me i a koe ne seki fakalogo ki a ia. Ka sala ne te Aliki se tino e manako a ia ki ei ke fai mo tupu o tena fenua.”

¹⁵Ne tiaki ne Samuelu a te fa'kai o Kilikala, o fanatu i tena auala. Ka ko te katoaga o te fenua ne tautali atu i a Saulo tela ko fanatu ki ana sotia. Ne olo atu latou mai te fa'kai o Kilikala ki te fa'kai o Kipea, i te laukele o Peniamina. Ne asi fakalei ne Saulo tena kautau, tela e tusa mo te onoselau tagata.

¹⁶Ne fakatu a faleie o Saulo mo tena tama tagata ko Ionatana, mo tena kautau katoa i Kepa, i te laukele o Peniamina, ka ko tino Filisitia e manava i Mekemase.

¹⁷A tino Filisitia ne olo atu o faitaua i potukau e tolu: e tasi te potukau e olo ki Ofala i te laukele o Sualo,

¹⁸sua potukau e olo ki Peta Holono, ka ko te sua potukau e olo ki te tuakoi tela e tu mai luga o te Vanu o Sepoima mo te vao.

¹⁹Seai ne tino faite fiti i Isalaelu, me i tino Filisitia e taumafai eiloa o taofi a tino Epelu ke se faite ne pelu io me ne tao ma latou.

²⁰A tino Isalaelu e olo sale eiloa ki tino Filisitia ke fakamata olotou mea fakamalū laukele, mea tofa laukele, takū mo mea kati saito;[26]

²¹a te togi o te fakamatāga o te taku mo te faitega o mea masei o te mea e taki ei pulumakau, e tasi te tupe foliki, kae e lua manafai e fakamata se mea fakamalu laukele io me se mea tofa laukele.

²²Tela la, i te aso o te taua seai eiloa se sotia Isalaelu e isi sena pelu io me se tao, na ko Saulo fua mo tena tama ko Ionatana.

²³Ne uga ne tino Filisitia se potukau o latou ke pono te auala o Mekemase.