Read Te Tusi Tapu I Te Gana Tuvalu Lomiga Lua 1 SAMUELU 16 Bible Online

1 SAMUELU 16 - Te Tusi Tapu I Te Gana Tuvalu Lomiga Lua bible

1 SAMUELU 16

¹Muna a te Aliki ki a Samuelu, “E gata afea tou fanoanoa ona ko Saulo? Ko oti au ne se manako ki ei ke fai mo tupu o Isalaelu. Kae nei, puke mai ne sinu olive kae fano ki Peteleema, ki te tagata e igoa ki a Iese, me ko oti ne fili ne au se tamaliki mai ana tama tagata ke fai mo tupu.”

²Ne fesili atu Samuelu, “E mafai pefea ne au o fai te mea tena? Kafai e logo Saulo i te mea tena, ko au ka tamate ne ia!” Ne tali atu te Aliki, “Puke se tamā pulumakau, kae fai pela i a koe ne fano o ofo te taulaga ki te Aliki.

³Kami atu a Iese ki te faiga o te taulaga, kae ka fakasino atu ne au te mea e tau o fai ne koe. Ka faū ne koe ke fai mo tupu a te tino tela e fakasino atu ne au.”

⁴Tena, ne fai eiloa ne Samuelu te mea ne fai atu ne te Aliki, tena ne fanatu ei a ia ki Peteleema, kae olo atu ki a ia a takitaki o te fa'kai, ko pole'pole eiloa i te mataku, kae fai atu ki a ia penei, “Te pelofeta, a koe na ne vau i se feitu 'lei?”

⁵Ne tali atu Samuelu, “Ao. Au ne vau o ofo atu se taulaga ki te Aliki.” Ne fai foki a ia ki a Iese mo ana tama tagata ke faka'ma olotou foitino, kae ne kami ne ia latou ke o'mai ki te faiga o te taulaga.

⁶I te okomaiga o Iese mo ana tama tagata, ne matea ne Samuelu a Eliapo, te tama tagata e tokotasi a Iese, tela ne manatu aka a ia penei, “A te tagata tenei e tu mai i mua o te Aliki, kaati ko ia eiloa tela ne filifili ne te Aliki.”

⁷Kae ne fai atu te Aliki ki a Samuelu, “Sa saga ki tena loa mo tena gali. Se ko ia tena; e se pau taku filifiliga mo te filifiliga a te tagata. A te tagata e kilo ki te gali o te feitu ki tua, ka ko au e kilo ki te loto o te tino.”

⁸Ne kalaga atu a Iese ki tena tama ko Apinatapu, aumai ei ne ia ki a Samuelu. Kae ne fai atu Samuelu, “ikai, se tena te tino ne fili ne te Aliki.”

⁹Ne toe puke mai ne Iese tena tama ko Sama, kae fai atu Samuelu, “ikai, se ko ia foki tena ne fili ne te Aliki.”

¹⁰Ne puke fakasolosolo mai ne Iese ana tama e toko fitu ki a Samuelu, kae ne fai atu Samuelu ki a ia penei, “ikai, e seai se tino i a latou kona ne fili ne te Aliki.”

¹¹Tena ne fesili atu ei a Samuelu ki a Iese penei, “Koi isi ne au tama tagata aka fakaatea?” Ne tali atu a Iese, “'Toe nei ko te toekimuli fua, kae tela loa e tausi mamoe i tua o te fa'kai.” Muna a Samuelu, “Fai ki ei ke vau. Tatou e faka'tali eiloa ke oko mai, ko ofo ei te taulaga a tatou.”

¹²Tena ne uga ei te fekau a Iese ki ei ke vau. A ia tena, se tamataene malosi kae taulekaleka. Muna a te Aliki ki a Samuelu. “Ko ia tena, faū atu a ia!”

¹³Ne puke aka ne Samuelu te sinu olive, faū eiloa ne ia a Tavita i mua o ona taina. I kona foki eiloa, ko Tavita eiloa ko ulufia ne te agaga o te Aliki, kae ne nofo eiloa i a Tavita mai te aso tena o fano ki mua. Oti aka, ko Samuelu eiloa ko foki atu ki Lama.

¹⁴Ne fano keatea te agaga o te Aliki mai i a Saulo, kae ulu atu ki ei te agaga masei tela ne uga ne te Aliki ki ei, tela ne fakapuapuaga ne ia a Saulo.

¹⁵Ne fai atu ana tavini ki a ia penei, “E iloa ne matou me ko te agaga masei tenei ne uga atu ne te Atua, tena e fakafi'ta ne ia koe.

¹⁶Tela la, tou malu, fai mai se fakatonuga ke sala ne matou se tagata e poto i te tata kitala. Kafai ko ulu atu te agaga masei ki a koe, kae ka tata te kitala a te tagata tena, kae ka toe 'lei koe.”

¹⁷Tena ne fakatonu atu ei a Saulo ki a latou penei, “Sala mai se tagata e poto i te ta kitala o aumai ki konei ki a au.”

¹⁸Ne fai te tavini tokotasi a ia penei, “E isi se tama tagata a Iese, te tagata Peteleema, ko ia eiloa ko poto i te tata lakau. A ia tena se tagata toa kae taulekaleka foki, se sotia 'lei kae poto foki i te faipati. A te Aliki e fakatasi ki a ia.”

¹⁹Tena ne uga ei ne Saulo ana avefekau ki a Iese mo te fekau tenei: “Tuku mai tau tama tagata ko Tavita, tela e tausi ne ia mamoe, ke vau ki a au.”

²⁰Tena ne uga atu ei ne Iese a Tavita ke fano ki a Saulo, kae avatu ne ia ke fano mo ia se tamā kouti, se asini e fakauta ki falaoa, mo te taga e fonu i uaina.

²¹Ne oko atu a Tavita ki a Saulo, tena galue eiloa i kona. Ne fiafia malosi a Saulo ki a Tavita, tena ne fili ei ne ia ke pukepuke sale ne ia ana mea tau.

²²Tena ne uga ei a te fekau a Saulo ki a Iese penei: “Au e fiafia ki a Tavita. Tuku mai a ia ke galue i a au i konei.”

²³Mai i te taimi tena, kafai eiloa e oko atu ki a Saulo te agaga masei tela e uga mai sale ne te Aliki, kae puke aka Tavita ki tena kitala o tata, tena ko fano ei te agaga masei, mo Saulo foki ko 'lei mai.