Read Te Tusi Tapu I Te Gana Tuvalu Lomiga Lua 1 SAMUELU 2 Bible Online

1 SAMUELU 2 - Te Tusi Tapu I Te Gana Tuvalu Lomiga Lua bible

1 SAMUELU 2

¹ Tenei te talo a Hana ne fai: “Ko te Aliki ne fakafonu ne ia toku loto i te fiafia; Ko oko eiloa i toku fiafia i te mea ne fai ne ia! Au e kata ki oku fili; Ko oko eiloa i toku fiafia i te Atua ne fesoasoani mai ki a au!

²“E seai se tino e 'malu pela mo te Aliki; E seai se tino e pela mo ia, E seai se lafiga malu pela mo te Atua.

³Fakagata otou leo fakamata'mata; Fakagata otou pati fakamatamata. Me i te Aliki se Atua e iloa ne ia a mea, Kae e fakamasino foki ne ia a mea a tino e fai.

⁴Ko fatifati a kausana a sotia mafi, Ka ko tino vaivai ko gasolo o malosi.

⁵A tino kola ne masani o kai ma'kona, Ko togi atu olotou foitino ke maua ne meakai ma latou, Ka ko tino ne masani o fia'kai ko se fia'kai nei. A te fafine se fanau, ko tokofitu nei ana tama ne fanau, Ka ko te fafine tela ne tokouke ana tama, ko seai nei ne ana tama.

⁶A te Aliki e tamate ne ia a tino, kae toetuku atu foki ne ia te ola; E ave ne ia a tino ki te fenua o tino mate, Ko ia foki e fakafoki mai ne ia.

⁷E fai ne ia nisi tino ke mau'mea, ka ko nisi ke ma'tiva; E fakamalalo ne ia nisi tino, Kae fakasili ne ia nisi tino.

⁸E avaka ne ia tino ma'tiva mai te pefu, Kae fakasao ne ia tino fakaalofa mai olotou puapuaga. E fai ne ia latou ke taugasoa mo pelenise; E fai foki ne ia latou ke nofo i koga sili. A te fakavae o te lalolagi e a te Aliki; A te lalolagi ne faite ne ia i luga i ei.

⁹“E puipui ne ia a ola o ana tino fakamaoni, Ka ko tino amio masei e galo atu i te pouliga; A te tagata e se manumalo i tena malosi.

¹⁰A fili o te Aliki ka takavale; Ka kaitaua mai a ia ki a latou mai te lagi. A te Aliki ka fakamasino ne ia te lalolagi katoa; Ka tuku atu ne ia te malosi ki tena tupu, Ka fakamanumalo ne ia tena tupu filifilia.”

¹¹Tena, ne foki atu Elekana ki tena fale i Lama, ka ko Samuelu ne nofo eiloa i Sailo o tavini atu ki te Aliki i te takitakiga a Eli.

¹²A tama tagata a Eli ne tama masei. E se fia saga lele laua ki te Aliki,

¹³e se saga foki ki fakatonuga e uiga ki mea kola e tau o maua ne latou mai i tino. Kafai se tino e ofo sena taulaga, ka ko te tavini a te faitaulaga ko vau mo tena tui mata tolu. Kafai koi tunu eiloa te kano manu i te ulo,

¹⁴ka ko te tavini ko suki tena tui ki loto, kae so se mea e piki i te tui manafai ko tata mai ki tua e puke ma te faitaulaga. A tino Isalaelu katoa kola e o'mai ki Sailo o ofo olotou taulaga e fai katoa pena.

¹⁵E masani sale foki te tavini a te faitaulaga o fai ki te tagata e ofo tena taulaga ke tuku atu ne kano manu ma te faitaulaga ke tao, manafai foki eiloa e seki tapale te gako o te manu o ave o sunu, i te faitaulaga e se manako ki kano manu kola e saka, mai i tino ofo taulaga, me e manako ki kano manu 'mata.

¹⁶Kafai e tali atu te tino tela e ofo tena taulaga penei, “Faka'tali ke sunu mua te gako e pela eiloa mo te faiga tonu; ka oti ko puke ei ne mea e manako koe ki ei,” kae ka tali mai te tavini a te faitaulaga penei, “ikai! Tuku mai i te taimi nei! Kafai e se tuku mai ne koe, ko te mea ka fao malo ne au!”

¹⁷A te agasala tena a tama tagata a Eli, ko oko eiloa i te se lei ki te Aliki, me e se faka'malu ne laua a taulaga e ofo atu ki te Aliki.

¹⁸Kae i te vaitaimi tena, a Samuelu e tumau eiloa o tavini atu ki te Aliki, kae e pei ki te gatu lino 'malu.

¹⁹I tausaga takitasi, e vau faeloa tena matua mo sena gatu 'loa foliki, i te taimi e vau ei a ia i tena avaga o ofo te taulaga o te tausaga.

²⁰Tena, e fakamanuia sale ne Eli a Elekana mo tena avaga, kae fai atu penei ki a Elekana, “A te Aliki ke tuku atu ne ia ne tamaliki ma koe i te fafine tenei, e sui ei te tamaliki tenei ne fakatapu mo te Aliki.” Oti aka te mea tena, ko Elekana eiloa mo tena kaiga ko 'foki atu ki te lotou fa'kai.

²¹Ne fakamanuia ne te Aliki a Hana, tena ne toe fanau mai ana tama tagata e tokotolu kae tokolua tama fafine. Ne tupu aka eiloa Samuelu i tena tofi ko te tavini atu mō te Aliki.

²²A Eli i te taimi tenei ko toeaina eiloa. E logo'logo sale eiloa ona taliga i mea katoa e fai ne ana tama tagata ki tino Isalaelu, kae e 'moe sale foki mo fafine kola e galue i te mataloa o te Faleie o te Aliki.

²³Tena ne fai atu ei a ia ki a laua penei, “Ai a e fai ei ne koulua a mea kona? A tino katoa e o'mai o fakamatala mai a amioga ma'sei a koulua e fai.

²⁴Aku tama, na fakagata nei o lua amioga masei! A te tala tenei e faipati ki ei a tino o te Atua se mea tafasili i te masei.

²⁵Kafai e agasala se tino ki te sua tino, e mafai faeloa ne te Aliki o fesoasoani ki te tagata agasala; kae ko oi te tino e mafai o fesoasoani ki te tagata ko agasala ki te Aliki?” Kae ne seki fia saga eiloa laua ki te tamana o laua, me i te Aliki ko oti ne mafaufau ke tamate laua.

²⁶ Ne tupu aka eiloa Samuelu i tena galuega, kae ko alofagina foki a ia ne te Aliki e pela foki mo tino.

²⁷Ne vau te pelofeta e tokotasi mo te fekau tenei ki a Eli mai i te Aliki: “I te taimi ne nofo pologa ei tou tupuga ko Alona mo tena kaiga i te tupu o Aikupito, ne fakasae atu ei au ki a Alona.

²⁸ Mai i matakaiga katoa o Isalaelu, ne fili ne au tena kaiga ke fai mo aku faitaulaga, o tavini i te fata-fai-taulaga, o sunu mea manogi; kae o 'pei ki te efota kae ka'laga mai ki a au. Kae ne talia foki ne au ke maua se vaega o latou i taulaga kola e sunu i luga i te fata-fai-taulaga.

²⁹Ai la e mata onoono kae kaimanako ei koe ki taulaga kola e ofo mai ne toku fenua ki a au? Eli, ai a e fakasili ei ne koe au tama tagata i lo au, o talia latou ke kai ki te vaega tafasili o taulaga kola e ofo mai ne oku tino ki a au?

³⁰Au, te Aliki te Atua o Isalaelu, ne tauto i aso mua, i tou kaiga mo tou kaukaiga e fai mo faitaulaga a aku ki te se gata mai. Kae nei ko seai se mea pena! Ka fai fakalei ne au a tino kola e āva mai ki a au, kae ka se fai fakalei ne au a tino kola e se fiafia mai ki a au.

³¹Fakalogo mai, ko oko nei ki te taimi ka tamate ei ne au a tamataene i tou kaiga mo tou kaukaiga, ke se toe ai se tino o tou kaiga e ola ke toeaina.

³²A koe ka mafatia kae kaisano ki fakamanuiaga konei ka tuku ne au ki nisi tino Isalaelu, kae ka se toe ai se tino i tou kaiga ka ola ke toeaina.

³³Kae e fakasao ne au se tino o tou gafa e tokotasi ke fai mo faitaulaga. Kae fakamuli a ia ka[7] kivi ei ona mata, ko seai ei sena fakamoemoega, ka ko nisi o tou gafa ka mate i se mate fita.

³⁴ Kafai ko 'mate au tama tagata ko Hofeni mo Fineaso i te aso e tasi, ko iloa ei ne koe i mea konei ne faipati atu ne au e tonu katoa.

³⁵Ka fili ne au se faitaulaga tela ka fakamaoni mai ki a au, kae fai foki a mea katoa e manako au ke fai ne ia. Ka tuku ne au ki ei se fanau, kola ka galue faeloa mo taku tupu filifilia.

³⁶Kafai se tino i tou gafa e ola mai, e iku ki te fano o akai tupe mo meakai i te faitaulaga tena, kae ka fakamolemole foki ke talia a ia ke fesoasoani ki faitaulaga, ke maua ne ana meakai.”