Read Te Tusi Tapu I Te Gana Tuvalu Lomiga Lua 1 SAMUELU 7 Bible Online

1 SAMUELU 7 - Te Tusi Tapu I Te Gana Tuvalu Lomiga Lua bible

1 SAMUELU 7

¹ Tena ne o'mai ei a tino Kiliata Iealima o puke atu te Pusa o te Feagaiga a te Aliki, ave ei ne latou ki te fale o te tagata e igoa ki a Apinatapu, tela e nofo i luga i te mauga foliki. Ne tofi ne latou tena tama tagata ko Eleasalo ke tausi ne ia te Pusa o te Feagaiga.

²A te Pusa o te Feagaiga a te Aliki ne tuku eiloa i Kiliata Iealima i se taimi leva, kaati se luasefulu tausaga. I te taimi tenei, a tino Isalaelu e tagi sale ki te Aliki mo se fesoasoani.

³Muna a Samuelu ki tino Isalaelu, “Kafai ko mafaufau koutou o fuli atu ki te Aliki mo otou loto katoa, e tau o pei keatea mua ne koutou a atua fakaatea katoa, pela foki mo fakatusa o te atua ko Asitate. Tuku katoatoa atu otou loto ki te Aliki, kae tavini atu ki a ia fua tokotasi, kae ka fakasao ne ia koutou mai te malosi o tino Filisitia.”

⁴Tena, ne pei keatea ei ne tino Isalaelu a fakatusa o te atua ko Paala mo Asitate, kae tapuaki atu ki te Aliki tokotasi.

⁵Ne ave te fekau a Samuelu ki tino Isalaelu katoa ke maopoopo i Mesepa, mo tena pati ke talo a ia mo latou i kona.

⁶Tena, ne maopoopo katoa ei latou i Mesepa. Ne asu aka ne latou ne vai o ligi ki tua e fai mo taulaga ki te Aliki, kae ne fakalikiliki foki latou i te aso katoa tena. Ne fai aka mo olotou pati penei “A matou ko agasala ki te Aliki.” Ko te fa'kai tena o Mesepa ne fakamasino ei ne Samuelu a kinauga a tino Isalaelu.

⁷I te 'logoga o tino Filisitia i tino Isalaelu ko maopoopo i Mesepa, ne olo atu ei te tokolima tupu o Filisitia mo olotou kau o taua ki tino Isalaelu. Ne logo tino Isalaelu i te taua ko fanatu, tena ne mataku ei latou,

⁸kae fai atu ki a Samuelu penei, “Talo atu eiloa ki te Aliki te motou Atua ke fakasao mai matou mai i tino Filisitia.”

⁹Ne ta ne Samuelu se tamā mamoe kae sunu katoa ke fai mo taulaga ki te Aliki. Tena, talo atu ei a ia ki te Aliki ke fesoasoani mai ki Isalaelu, kae ne talia ne te Aliki tena talo.

¹⁰I te taimi ne ofo ei ne Samuelu te taulaga, ka ko tino Filisitia ko mai o taua ki tino Isalaelu; i kona foki eiloa, ko te Aliki eiloa ko fakapapa mai ana fatili mai te lagi ki te kau Filisitia, tena ne mataku valevale ei te kau Filisitia, kae 'tele.

¹¹Ne olo atu te kau Isalaelu mai Mesepa, o afuli atu te kau Filisitia ke oko atu eiloa ki Peteka, kae ne 'ta atu eiloa ne latou i te auala.

¹²Ne puke aka ne Samuelu te fatu o toki i te va o Mesepa mo Sena, kae fai aka mo tena pati penei, “A te Aliki ne fesoasoani mai ki a matou,” fakaigoa ei ne ia te fatu tena, “Te Fatu o Fesoasoani.”

¹³Tena ne takavale ei te kau Filisitia, kae ne taofi latou ne te Aliki ke se toe olo o taua ki Isalaelu i aso e ola ei Samuelu.

¹⁴A fa'kai lasi katoa kola ne 'fao malo ne Filisitia i te va o Ekelona mo Kata ne toe faka'foki katoa ki Isalaelu tena ne toe 'foki mai ei a laukele o Isalaelu ki tino Isalaelu. Ne nofo filemu foki ei a tino Isalaelu mo tino Kanana.

¹⁵A Isalaelu ne takitaki ne Samuelu i aso ne ola ei a ia.

¹⁶I tausaga takitasi, e masani sale a ia o fano ki Peteli, Kilikala mo Mesepa, o fai se ikuga 'lei ki kinauga kona e tupu i kona.

¹⁷Ka oti ko toe foki atu ei a ia ki tena fale i Lama, o toe nofo i tena tulaga famasino. I te fa'kai tena o Lama, ne faite ei ne ia se fata-fai-taulaga e ofo atu ei ana taulaga ki te Aliki.