Read Ыдыктыг Библия, 2011 1. Паралипоменон 5 Bible Online

1. Паралипоменон 5 - Ыдыктыг Библия, 2011 bible

1. Паралипоменон 5

¹Израильдиң дун оглу Рувимниң үре-салгалы бо-дур. Рувим — дун оглу. Ынчалза-даа кажан ол ачазының орун-дөжээн бужартатканының соонда, улуу болур эргезин Израильдиң оглу Иосифтиң оолдарынга берипкен. Ынчангаш Рувимниң ады төрел аймактар даңзызында улуу кылдыр кирбейн турар.

²Иуда бодунуң акы-дуңмаларының аразында эң күш-шыдалдыг-даа болза, Израильдиң чагырыкчызы оон үнген-даа болза, улуу болур эрге ооңуу болбайн, Иосифтиң аймаанче шилчий берген.

³Израильдиң дун оглу Рувимниң оолдары: Энох, Фаллу, Хецрон болгаш Харми.

⁴Иоилдиң үре-салгалы: Шемайя, Шемайяның оглу Гог, Гогтуң оглу Шимей,

⁵Шимейниң оглу Миха, ооң оглу Реайя, ооң оглу Ваал,

⁶Ваалдың оглу Беэра. Беэра дээрге рувимчилерниң нояны турган. Ону ассирий хаан Тиглат-Пилесер тудуп аппарган.

⁷[7-8] Ооң төрелдери, төрел бөлүк аайы-биле, оларның ада-өгбелер даңзызы ёзугаар мындыг турган: кол кижи Иеиел, ооң соонда Захария база Бела. (Беланың адазы Азаз, Азазтың адазы Шема, Шеманың адазы Иоил). Беланың улузу Ароерден Невога база Ваал-Меонга чедир чурттап чораан.

⁹А чөөн талазынче олар ээн кургаг ховунуң Евфрат хемче шөйүлген эң-не ужунга чедир чурттап чорааннар. Чүге дээрге галаад черге оларның мал-маганы дыка хөй турган.

¹⁰Саул хаанның үезинде олар агар аймак-биле дайылдажып, ону тиилеп каан. Олар майгыннарынга Галаадтың чөөн талазында бүгү девискээрге чурттай бергеннер.

¹¹Гадтың үре-салгалы рувимчилер-биле дужааштыр васан черге, Салхага чедир чурттап чораан.

¹²Васанда оларның кол кижизи Иоил турган, Шафан ийи дугаары, ооң соонда — Иаанай биле Шафат.

¹³Оларның чеди акы-дуңмазы төрел бөлүктер аайы-биле мындыг аттарлыг: Михаил, Мешуллам, Шева, Иорай, Иаакан, Зия болгаш Евер.

¹⁴Олар шупту Хурийниң оглу Авихаилдиң үре-салгалы-дыр. (Хурийниң адазы Яроах, Яроахтың адазы Галаад, Галаадтың адазы Михаил, Михаилдиң адазы Иешишай, Иешишайның адазы Яхдо, Яхдонуң адазы Буз.)

¹⁵Гуниниң оглу Авдиилдиң оглу Ахи бодунуң төрел бөлүүнде кол кижи турган.

¹⁶Гадчылар Галаадка, Васанга болгаш аңаа хамааржыр хоорай, суурларга база Шарон оргулаажының одар-белчиирлериниң эң-не кыдыг кызыгаарларынга чедир чурттап чорааннар.

¹⁷Олар шупту Иудеяның хааны Иоафамның үезинде база Израильдиң хааны Иеровоамның үезинде чизеледип чораан.

¹⁸Рувимчилер, гадчылар болгаш Манассияның аймааның чартыы — хылыш, дозуг-камгалал тудуп, ча адып билир дуржулгалыг, эрес-дидим дайынчылар. Дайынче үнүп шыдаар 44 760 эр улус бар турган.

¹⁹Олар агар, иетур, нафиш болгаш надав аймактар-биле дайылдажып үнүпкеш,

²⁰дузаламчыны алганнар. Бурган агарлар болгаш оларның бүгү талалакчыларын израильчилерниң холунга хүлээдип берген, чүге дээрге израильчилер дайын үезинде Оон дуза дилеп чаннып турганнар. Олар Бурганга ынаныр боорга, Ол мөргүлүнге харыылаан.

²¹Израильчилер дайзыннарының мал-маганын эжелеп алган: 50 000 тевени, 250 000 шээр малды, 2000 элчигенни. 100 000 кижини база тудуп алган.

²²Өлүрткен дайзыннар дыка хөй болган, чүге дээрге ол дайын Бурганның күзели-биле болган. Израильчилер ол аймактарның черлеринге туттуруушкун үезинге чедир чурттааннар.

²³Манассияның аймааның чартыы ол черге Васандан Ваал-Эрмонга чедир, Сенирге база Эрмон дагга чедир чурттап чораан. Олар хөй турган.

²⁴Оларның төрел бөлүктериниң кол улузу бо-дур: Эфер, Иший, Элиил, Азриил, Иеремия, Годавия болгаш Иагдиил — күш-шыдалдыг, ат-алдарлыг, боттарының төрел бөлүктериниң баштыңнары.

²⁵Ынчалза-даа манассияжылар боттарының ада-өгбелериниң Бурганынга өскерлип, Ооң оларның мурнундан узуткап кааны ол черниң чоннарының бурганнары-биле самыырап эгелээн.

²⁶Ынчан Израильдиң Бурганы Ассирияның хааны Фулду (азы Тиглат-Пилесерни) оларга удурландырарга, ол хаан рувимчилерни, гадчыларны болгаш манассияжыларның ол чартыын оларның черинден туттуруп алгаш барган. Оларны Халахче, Хаворже, Аруже база Гозан хемче көжүрүпкен — олар бо хүннерге чедир ында чурттап чоруур.