Read Ыдыктыг Библия, 2011 Ездра 1 Bible Online

Ездра 1 - Ыдыктыг Библия, 2011 bible

Ездра 1

¹Дээрги-Чаяакчы Бодунуң Иеремияны дамчыштыр чугаалаан сөстери боттанзын дээш, Персияның хааны Кирниң чагыргазының бирги чылында ол хаанны сагыш алындырыпкан. Кир хаан ынчан бодунуң бүгү күрүнезинге мындыг чарлык үндүргеш, ону бижидип, номчуткан:

²«Персияның хааны Кирниң чугаалаан чүвези бо-дур: „Дээрде саадаан Дээрги-Бурган-Чаяакчы меңээ чер-делегейниң бүгү күрүнелерин хүлээдип бергеш, иудей черде Иерусалим хоорайга Аңаа өргээ тударын дааскан.

³Дээрги-Чаяакчының чонунга хамааржыр бүгү улус — Бурганы олар-биле кады болзун! — иудей черде Иерусалимче чоруй баргаш, Израильдиң Бурганы Дээрги-Чаяакчының Иерусалимде турар Бурганның өргээзин тутсун.

⁴Иудейлерниң артынчызынга оларның чурттап турар бүгү черлеринде кожалары дузалап, оларны алдын-мөңгүн, эт-хөреңги, мал-маган болгаш Иерусалимде Бурганның өргээзинге эки тура-биле кылган өргүл белектери-биле хандырзын“».

⁵Иуда биле Вениаминниң аймактарының баштыңнары, Бурганның бараалгакчылары, левиттер — Бурганның сагыш алындырыпкан бүгү улузу — Иерусалимге Дээрги-Чаяакчының өргээзин барып тудар дээш көдүрлүп үнген.

⁶Оларның бүгү кожалары эки тура-биле эккелген шупту өргүл белектеринден аңгыда, алдын-мөңгүн эт-херексел, эт-хөреңги, мал-маган болгаш улуг үнелиг эт-септи оларга берген.

⁷Навуходоносорнуң Иерусалимден ап алгаш, бодунуң бурганнарының өргээзинге салып алганы Дээрги-Чаяакчының өргээзиниң эт-херекселин Кир хаан боду үндүрүп берген.

⁸Персияның хааны Кир ол эт-херекселди үндүрерин эртине-байлак шыгжамырының кадагалакчызы Митредатка дагзып каан. Митредат ол эт-херекселди санап-түңнээш, Иудеяның чагырыкчызы Шешбацарга хүлээдип берген.

⁹Оларның даңзызы бо-дур: алдын тавактар — 30; мөңгүн савалар — 1000; бижектер — 29;

¹⁰алдын аяктар — 30; эжеш мөңгүн аяктар — 410; өске савалар — 1000.

¹¹Шупту алдын-мөңгүн эт-херекселдиң саны 5400 болган. Улус-чон Вавилондан Иерусалимче көжүп чанып турда, Шешбацар ол бүгүнү ап алгаш, эккелген.