Read Ыдыктыг Библия, 2011 Ездра 7 Bible Online

Ездра 7 - Ыдыктыг Библия, 2011 bible

Ездра 7

¹Ол болуушкуннарның соонда Персияның хааны Артаксеркстиң чагыргазының үезинде Серайяның үре-салгалы Эзра (Серайя — Азарияның оглу, Азария — Хелкияның оглу,

²Хелкия — Шаллумнуң оглу, Шаллум — Садоктуң оглу, Садок — Ахитувтуң оглу,

³Ахитув — Амарияның оглу, Амария — Азарияның оглу, Азария — Мерайоттуң оглу,

⁴Мерайот — Зерахияның оглу, Зерахия — Узийниң оглу, Узий — Буккийниң оглу,

⁵Буккий — Авишуйнуң оглу, Авишуй — Финеестиң оглу, Финеес — Элеазарның оглу, Элеазар — Бурганның дээди бараалгакчызы Аароннуң оглу болур чүве-дир) Вавилондан үнгеш, Иерусалимге чедип келген.

⁶Эзра болза Израильдиң Бурганы Дээрги-Чаяакчының израильчилерге Моисейни дамчыштыр берген ыдыктыг хоойлузун шыырак билир ном-хоойлу тайылбырлакчызы [9] турган. Хаан Эзраның дилеглерин бүрүнү-биле хандырган, чүге дээрге Дээрги-Бурган-Чаяакчының холу ону камгалап турган.

⁷Чамдык израильчилер база Бурганның бараалгакчылары, левиттер, ыраажылар, хаалгачылар болгаш Бурганның өргээзиниң ажылчыннарының чамдыызы Эзра-биле кады Артаксеркс хаанның чагыргазының чедиги чылында Иерусалимче чедип келген.

⁸Эзра Иерусалимге хаанның чедиги чылының беш айда келген турган.

⁹Ол Вавилондан бир айның бирээде чоруурун шиитпирлээш, Иерусалимге беш айның бирээде келген, чүге дээрге Бурганның буянныг холу ону камгалап турган.

¹⁰Эзра бодунуң сеткил-чүрээн Дээрги-Чаяакчының хоойлузун шинчилеп көөрүнге, ону күүседиринге база израиль чонну Ооң дүрүмнер, айтыышкыннарынга өөредиринге бараан болдурган кижи турган.

¹¹Артаксеркс хаан Бурганның бараалгакчызы Эзрага — Дээрги-Чаяакчының Израильге берген айтыышкыннары болгаш хоойлуларын шинчилеп турган эртемденге мындыг чагаа [10] бижээн:

¹²«Хааннарның хааны Артаксеркстен. Дээрде саадаан Бурганның хоойлузунуң тайылбырлакчызы, Ооң бараалгакчызы Эзра, амыр-мендиңни эредим [11].

¹³Мээң дужаалым бо-дур: күрүнемде израиль чонга хамааржыр кижи бүрүзү, Бурганның бараалгакчызы азы левит кижи бүрүзү сээң-биле кады Иерусалимче чоруур дизе, чорупсун, ажырбас.

¹⁴Сени хаан мен болгаш чеди чөвүлекчим Бурганыңның сенде бар хоойлузунга хамаарыштыр Иудея биле Иерусалимни хайгаарап көрзүн дээш чорудуп тур бис.

¹⁵Харын-даа хаан мээң болгаш чөвүлекчилеримниң Иерусалимде чурттап турар Израильдиң Бурганынга өргээн алдын-мөңгүнүн чедирип бээр сен.

¹⁶Вавилоннуң бүгү девискээринден чыып шыдаарың алдын-мөңгүннү база чонуңнуң болгаш Бурганның бараалгакчыларының Ооң өргээзинге өргүп турар өргүл-белектерин база Иерусалимче чедирип бээр сен.

¹⁷Ол акша-мөңгүн-биле ыяап-ла бугалар, кошкарлар, хурагаганнар, далган-тараа болгаш арага садып алгаш, ол бүгүнү силерниң Бурганыңарның Иерусалимде өргээзиниң өргүл салыр бедигээжинче эккеп салып каар сен.

¹⁸Сен база сээң ха-дуңмаң арткан алдын-мөңгүннү шиитпирлээн аайыңар-биле, Бурганыңарның күзел-соруун ёзугаар чарыгдап болур силер.

¹⁹Бурганыңның өргээзинге бараан болуру-биле сеңээ хүлээдип берген эт-херекселди Иерусалимде Бурганның мурнунга салып каг.

²⁰Бурганыңның өргээзинге херек апарган өске-даа чүүлдерни, олар херектиг деп көөр болзуңза, хаанның эртине шыгжамырларындан ап берип болур сен.

²¹Мен, Артаксеркс хаан, Евфрат хемниң барыын талазында девискээрде хаанның акша-хөреңги кадагалакчыларынга дужаал берип тур мен: дээрде саадаан Бурганның хоойлузунуң тайылбырлакчызы, Ооң бараалгакчызы Эзраның силерден айтырган бүгү чүвезин ыяап-ла хандырып бериңер.

²²Аңаа 100 °талант чедир деңзилиг мөңгүннү, 100 °кор ишти чедир кызыл-тасты, 100 °бат чедир араганы, 100 бат чедир олива үзүн, а дусту, күзээнин ёзугаар, кызыгаарлаашкын чок бээр силер [12].

²³Дээрде саадаан Бурганның дужааган бүгү чүвезин Ооң өргээзи дээш чүткүлдүү-биле күүседир ужурлуг — Бурган хаанның болгаш ооң оолдарының күрүнезинче килеңневезин.

²⁴Силерге билдингир болзун: Бурганның бараалгакчызы, левит, ыраажы, хаалгачы, Бурганның өргээзиниң ажылчыны болгаш өске-даа бараан болукчу улустуң кайызындан-даа албан-үндүт, үндүрүг, каайлы хавырар эргеңер чок.

²⁵А сен, Эзра, Бурганыңның сеңээ хайырлаан мерген угааны-биле чагырыкчылар, шииткекчилерден томуйлап каг. Олар Евфрат хемниң барыын талазында девискээрниң бүгү чонунга — сээң Бурганыңның хоойлуларын билир бүгү улуска чөптүг шииткелден көргүссүн, а билбес улусту өөредип калыңар.

²⁶Сээң Бурганыңның хоойлузун база хаанның хоойлузун күүсетпес кижи бүрүзүн ыяап-ла шиидип кагзын: азы өлүрүп кагзын, азы чурттан үндүр шөлүпсүн, азы эт-хөреңгизин хавырзын, азы кара-бажыңнап кагзын».

²⁷Ада-өгбевистиң Бурганы Дээрги-Чаяакчыга алдар! Ол Иерусалимде Бодунуң өргээзинге демги дужаалы-биле алдар-хүндү көргүзеринче хаанны сагыш алындырыпкан болгай.

²⁸Дээрги-Чаяакчы Бодунуң энерелин меңээ хаанның, ооң чөвүлекчилериниң болгаш бүгү күчү-күштүг нояннарының мурнунга көргүскен болгай. Мээң Бурганым Дээрги-Чаяакчының холу мени кагбаан болгаш, мен дидимненип, мээң-биле кады чоруптар кылдыр израиль чоннуң төрел салгалдар баштыңнарын чыып алган мен.