Read Ыдыктыг Библия, 2011 Ездра 8 Bible Online

Ездра 8 - Ыдыктыг Библия, 2011 bible

Ездра 8

¹Артаксеркс хаанның чагыргазының үезинде мээң-биле кады Вавилондан үнүп келген төрел салгалдар баштыңнарының оларның ада-өгбезин ёзугаар даңзызы бо-дур:

²Финеестиң үре-салгалындан — Гирсам; Ифамарның үре-салгалындан — Даниил; Давидтиң үре-салгалындан — Хаттуш;

³Шеханияның үре-салгалындан чамдык улус; Пароштуң үре-салгалындан — Захария болгаш ооң-биле кады 150 эр кижи төрел салгал даңзызынче кирген;

⁴Пахат-Моавтың үре-салгалындан — Зерахияның оглу Элиоенай болгаш ооң-биле кады 200 эр кижи;

⁵Заттунуң [13] үре-салгалындан — Яхазиилдиң оглу Шехания болгаш ооң-биле кады 300 эр кижи;

⁶Адинниң үре-салгалындан — Ионафанның оглу Эвед болгаш ооң-биле кады 50 эр кижи;

⁷Эламның үре-салгалындан — Аталияның оглу Исайя болгаш ооң-биле кады 70 эр кижи;

⁸Шефатияның үре-салгалындан — Михаилдиң оглу Зевадия болгаш ооң-биле кады 80 эр кижи;

⁹Иоавтың үре-салгалындан — Иехиилдиң оглу Авдий болгаш ооң-биле кады 218 эр кижи;

¹⁰Баниниң [14] үре-салгалындан — Иосифияның оглу Шеломит болгаш ооң-биле кады 160 эр кижи;

¹¹Бевайның үре-салгалындан — Бевайның оглу Захария болгаш ооң-биле кады 28 эр кижи;

¹²Азгадтың үре-салгалындан — Гаккатанның оглу Иоханан болгаш ооң-биле кады 110 эр кижи;

¹³Адоникамның үре-салгалындан — сөөлзүредир чедип келген Элифелет, Иеиел, Шемайя болгаш олар-биле кады 60 эр кижи;

¹⁴Бигвайның үре-салгалындан — Утай, Заббуд болгаш олар-биле кады 70 эр кижи төрел салгал даңзызынче кирген.

¹⁵Мен ол бүгү улусту Агава хемче киир агып чыдар хемчигештиң чанынга чыып алган мен. Бис аңаа үш хондувус. Чонну база Бурганның бараалгакчыларын хынап көөрүмге, оларның аразында чаңгыс-даа левит кижи чок болду.

¹⁶Мен ынчан баштыңнар болур Элиезер, Ариил, Шемайя, Элнафан, Иарив, Элнафан, Нафан, Захария болгаш Мешулламны база эртемденнер Иегоиарив биле Элнафанны кыйгыртып алгаш,

¹⁷оларны Касифия деп черниң даргазы Иддоже чорудупкан мен. Иддога база ооң Касифияда ха-дуңмазы — Бурганның өргээзиниң ажылчыннарынга Бурганывыстың өргээзинге бараан болур улустан чорудуп бээр кылдыр чүнү дамчыдарын оларга айтып берген мен.

¹⁸Бурганывыстың буянныг холу бисти кагбаан болгаш, олар биске бараан болукчу улусту: Махлиниң үре-салгалы, салым-чаяанныг Шеревияны база ооң оолдары биле акы-дуңмазы болур он сес кижини эккелген. (Махли Левийниң оглу, а Левий — Израильдиң оглу чүве-дир.)

¹⁹Хашавияны, ооң-биле кады Мерариниң үре-салгалы Исайяны болгаш ооң акы-дуңмазы, оолдары болур чээрби кижини база эккелген.

²⁰Олар оон ыңай Бурганның өргээзиниң ажылчыннары болур 220 кижини — левиттерге дузалажыр кылдыр Давид хаанның, ооң нояннарының томуйлап каан улузун эккелген. Оларның шуптузунуң аттарын даңзылап бижип каан.

²¹Аңаа, Агава хемниң чанынга, боттарывысты Бурганывыстың мурнунга томаартып, биске, ажы-төлүвүске база бүгү эт-хөреңгивиске айыыл чок орук-суурну Оон дилеп аар дээш, шээрлээшкин кылырывысты чарлаан мен.

²²Хаандан орук-суурга дайзыннардан бисти камгалаар чадаг болгаш аъттыг шериглер дилээри меңээ ыядынчыг болган, чүге дээрге бис аңаа: «Бурганывыстың холу Олче чүткүп турар кижи бүрүзүнге буян көргүзер, а Оон ойталаан бүгү улусче Ооң килеңи болгаш күчү-күжү угланыр» — дээн турган бис.

²³Ынчангаш бис шээрленип, Бурганывыстан ол дугайында дилээривиске, Ол бистиң мөргүлүвүске харыылаан.

²⁴Оон мен Бурганның кол бараалгакчыларындан он ийи кижини — Шеревия биле Хашавияны база оларның он акы-дуңмазын аңгылап кагдым.

²⁵[25-27] Мен оларның мурнунга хаанның, ооң чөвүлекчилер, нояннарының болгаш Вавилонга турган бүгү израильчилерниң Бурганывыстың өргээзинге өргүл белээ кылдыр берген алдын-мөңгүнүн, эт-херекселин деңзилээш, оларның холунга 650 °талант мөңгүннү, 100 талант мөңгүн эт-херекселди, 100 талант алдынны, 1000 драхма деңзилиг 20 алдын дашканы болгаш эки дээн кылагар хүлерден кылган, алдын ышкаш үнелелдиг ийи саваны берипкен мен [15].

²⁸Мен оон ыңай оларга: «Силер — Бурганга бараалгаткан улус-тур силер, бо эт-херексел база ыдыктыг. Бо алдын-мөңгүн дээрге ада-өгбеңерниң Бурганы Дээрги-Чаяакчыга эки тура-биле берген өргүл-дүр.

²⁹Ол бүгүнү Бурганның кол бараалгакчыларының, левиттерниң, Израильдиң төрел салгалдар баштыңнарының мурнунга деңзилээш, Иерусалимде Дээрги-Чаяакчының өргээзиниң шыгжамыр-өрээлдеринче дужаап бергижеңерге чедир серемчилелдиг кадагалаңар» — дээн мен.

³⁰Оон Бурганның демги бараалгакчылары биле левиттер Иерусалимде Бурганывыстың өргээзинче аппарзын дээш, оларның мурнунга деңзилеп каан алдын-мөңгүннү, ыдыктыг эт-херекселди хүлээп алган.

³¹Иерусалимге чедер дээш, бир айның он ийиде Агава хемден үнүпкен бис. Бурганывыстың холу бисти кагбайн турган болгаш, Ол бисти орук-суурга дайзыннардан, дээрбечилерден камгалап турду.

³²Иерусалимге чедип келгеш, үш хүн дыштанган бис.

³³Дөрткү хүнде бис Бурганывыстың өргээзинге алдын-мөңгүннү, ыдыктыг эт-херекселди деңзилээш, Урияның оглу, Бурганның бараалгакчызы Меремотка хүлээдип бердивис. Ооң-биле кады Финеестиң оглу Элеазар, а ол ышкаш левиттер — Иисустуң оглу Иегозавад, Биннуйнуң оглу Ноадия олар турган.

³⁴Бүгү чүве санаттынып, деңзилеттинген, база ол-ла үеде ниити деңзи бижиттинген.

³⁵Ооң соонда туттуруушкундан ээп келген улус Израильдиң Бурганынга бүрүн өрттедир өргүлдер: бүгү израиль чон дээш он ийи бугажык, тозан алды кошкар, чеден чеди хураган болгаш бачыт дээш өргүл болур он ийи хунаны эккелген. Ол бүгү мал-маганны Дээрги-Чаяакчыга бүрүн өрттедир өргүл кылдыр салган.

³⁶Ол улус оон ыңай хаанның дужаалдарын Евфрат хемниң барыын талазында девискээрниң чагырыкчыларынга база ооң томуйлааны өске эргелекчилерге эккеп берген. Ынчан ол даргалар израиль чонга база Бурганның өргээзинге деткимче көргүскен.