Read Ыдыктыг Библия, 2011 Иов 1 Bible Online

Иов 1 - Ыдыктыг Библия, 2011 bible

Иов 1

¹Уц деп черге Иов дээр кижи чурттап чораан. Ол болза кем-буруу чок, чөптүг, Бургандан коргар болгаш бачыттан хая көрнүп чоруур кижи турган.

²Иов чеди оол биле үш кыстың адазы турган.

³Ол 7000 өшкү-хой, 3000 теве, 500 эжеш шары болгаш 500 кыс элчиген кошкул малдыг, дыка хөй санныг чалча-хөделдиг кижи чүве-дир. Чөөн чүктүң бүгү аймактарының аразында Иов эң ат-алдарлыг кижи турган.

⁴Ооң оолдары ээлчег аайы-биле бот-боттарының бажыңнарынга найырлап-дойлаар дээш чыглыр, олар-биле кады дойлазын дээш кыс дуңмаларын база кыйгырып аар чаңчылдыг чүве-дир.

⁵Дойлаашкын үези эрте берген санында-ла, Иов оолдарын келдиртип алгаш, оларны ыдыктап-арыглап турган. «Мээң оолдарым бачыт үүлгедип, боттарының сеткил-чүрээнде Бурганны бак сөглепкен бооп чадавас» деп бодап, Иов эртен эрте тургаш, оларның саны-биле бүрүн өрттедир өргүлдер салып турган. Ол ынчаар үргүлчү кылып келген.

⁶Бир-ле хүн Дээрги-Бурган-Чаяакчының оолдары [1] Ооң мурнунга турар дээш чедип келген, оларның аразынга буруудадыкчы [2] турган.

⁷Дээрги-Чаяакчы оон: «Сен кайыын келдиң?» — деп айтырган. Буруудадыкчы: «Мен чер-делегейни эргип кезип чордум» — деп харыылаан.

⁸Дээрги-Чаяакчы буруудадыкчыга: «Мээң чалчам Иовту эскердиң бе? Чер кырында өске ындыг кижи чок — ол кем-буруу чок, чөптүг, Бургандан коргар болгаш бачыттан хая көрнүп чоруур кижи чүве» — дээн.

⁹Буруудадыкчы Дээрги-Чаяакчыга: «Иов Бургандан хей черге коргар деп бе?

¹⁰Сен ооң бодун, өг-бүлезин база кошкул-хөреңгизин бүгү талазындан камгалап турбаан сен бе? Ооң холунуң ажыл-херээнге ачы-буян хайырлаан сен, ооң кодан-кодан малдары чер кырында өзүп-көвүдеп-ле турар-дыр.

¹¹Ынчалза-даа ооң бар-ла кошкул-хөреңгизинге Бодуңнуң холуң-биле дээптер болзуңза, ол Сени арныңга албан бак сөглээр» — дээн.

¹²Дээрги-Чаяакчы буруудадыкчыга: «Ындыг бе? Ооң бар-ла кошкул-хөреңгизи сээң холуңче кирзин. Чүгле ооң бодунга дегбе» — дээн. Буруудадыкчы Дээрги-Чаяакчыдан ыңай чорупкан.

¹³Бир-ле хүн, Иовтуң оолдар, кыстары улуг акызының бажыңынга найырлап-дойлап, арага-дары чооглап турда,

¹⁴Иовка шапкынчы кижи келгеш: «Шарылар чер аңдарып турду, а элчигеннер чанынга оъттап турду.

¹⁵Хенертен Шева чурттуглар халдап келгеш, оларны сүрүп аппарды, а силерниң ажылчыннарыңарны хылыш-биле кыра шанчып каапты. Силерге дыңнадып болур чаңгыс мен дириг арттым!» — дээн.

¹⁶Ол төндүр чугаалаваанда-ла, өске шапкынчы чедип келгеш: «Бурганның оду дээрден баткаш, өшкү-хой болгаш ажылчыннарыңарны өрттедип каапты. Силерге дыңнадып болур чаңгыс мен дириг арттым!» — дээн.

¹⁷Ол төндүр чугаалаваанда-ла, база бир кижи чедип келгеш: «Халдей аймактан үш бөлүк халдап, тевелерже хөме келгеш, оларны сүрүп аппарды, а ажылчыннарыңарны хылыш-биле кыра шанчып кагды. Силерге дыңнадып болур чаңгыс мен дириг арттым» — дээн.

¹⁸Ол төндүр чугаалаваанда-ла, оон өске кижи чедип келгеш: «Силерниң оолдар, кыстарыңар улуг акызының бажыңынга найырлап-дойлап, арага-дары чооглап турда,

¹⁹ээн кургаг ховудан коргунчуг шуурган хадып келгеш, ол бажыңның дөрт азыын силгиптерге, бажың аныяктар кырынче кээп дүштү, олар өлүп калды. Силерге дыңнадып болур чаңгыс мен дириг арттым» — дээн.

²⁰Иов ынчан туруп келгеш, качыгдалдан хевин ора тыртып, бажын чүлүп каапкаш, черже кээп дүжүп, Бурганга мөгейген.

²¹Ол мынча дээн: «Иемниң иштинден делегейже чанагаш үнүп келген мен, чер-иемче дедир чанагаш кире бээр мен. Дээрги-Чаяакчы берген-дир, Дээрги-Чаяакчы дедир ап алган-дыр, Ооң ады алгаг-йөрээлдиг болзун!»

²²Ол бүгү болуп турза-даа, Иов черле бачыт үүлгетпээн, Бурган дугайында багай чүве чугаалаваан.